I Paulu manguli notona ka iana mpuu suro ni Pue Yesu
9
1 Kamonsona aku ei, tau anu baria tetaka i apa ngkida. Aku sadua suro. Kuitamo i Pue Yesu, Pueta. Komi ope-ope, iamo wua nu pobagoku si Pue. 2 Nauda tau ntanina baria mopangaku ka akuna suro ni Pue Yesu, agaiana komi poka, sangangaa nipangaku. Lawi akumo anu mobambari Bambari Malompe, dongka i boeami. Pepotuumi si Pue Yesu mopakanoto mpuu, ka akuna suro ni Pue Yesu.3 I tau anu baria mopangaku kasuroku, eimo pesonoku. 4 Kami anu mewali suro ni Pue Yesu, bariapae sintoto ane kisumba pangkoniki ba panginuki, lako i pobagoki mobambari Ngkora ni Pue? 5 Bariapae kami pensani mangkeni towawineki i polumakoaki, ewa anu rababei nu suro ni Pue Yesu anu ntanina, poka-poka ni Pue Yesu ai i Peturu?a 6 Ba i Baranaba ai aku ngkida, anu sangangaa mobago mangkadelo bilalaki? Baria!
7 Lawi baria ria sadua surudado, anu moongkosoi wotona saduduana lau mombeala. Tau anu mowia, pensani sira mangkoni wua nu tuda-tudara. Tau anu mamporewu dimba, pensani sira manginu ue susu nu dimbara. 8 Apa anu kuuli etu, baria nakenimpewalina i rara nu katuwuta eo-eona. Agaiana melumbu lako i se etu, tasumbamo i rara Atura ni Musa, 9 teuki ewa ei:
“Inee rasamaaku ngudu nu japi ane tongora rapopobago.” (Pepopainga 25:4)
Japipae anu natunggai ni Pue? Baria. 10 Kitada anu Natunggai nu parenta etu. Tau anu mowia ba anu mombau, mobago sira lawi rasarumakara kaina mansumbara kirara lako i wua nu pobagora. 11 Kami anu mopadongka Ngkora ni Pue i rara nu katuwumi, simbela ai tau anu mosawu ai mantuda. Kamonsona, sintoto mpuu ane kisumba apa anu kiparaluu, i rara nu katuwuki lako si komi. 12 Ane tau ntanina anu mopaguruka komi Ngkora ni Pue, pensani mansumba sarora lako si komi, pelumbunamo kami!
Agaiana baria sambela kuperade. Naudapae maisi kapari anu morumpa aku, baria kuperade apa ngkida si komi, bona ntena ria anu mopakasusa pekirimi duduuna baria komi mepotuu i Bambari Malompe, kono si Kerisitu anu kibambari. 13 Ewa anu niinsanimo: Tau anu mobago i rara Tombi ni Pue Ala mansumba pangkonira lako i Tombi ni Pue Ala. Tadulako menomba anu mokadipuraka popenomba nu tau wori i meja potunua popenomba, mansumba sira kirara lako i popenomba etu. 14 Ewa etu mbui, napakanotomo ni Pue, sira anu mopadongka Bambari Malompe, sangangaa mansumba bilalara, lako i popadongkara Bambari Malompe etu.
15 Mewali naudapae sintoto aku merade saroku si komi, agaiana baria kubabei ewa etu. Ai inee nipenoka tunggaiaku mouki sura ei, bona kupari-pari komi mokiraka aku ba apa ngkida. Kupomabose i raraku, lawi baria aku sambela merade si komi. Agikumo mamate, mpanena apa anu kupomabose i raraku etu matonto. 16 Baria aku pensani mampemabose, nakenimpobagoku mobambari Bambari Malompe, lawi mopadongka Bambari Malompe iamo bago anu sangangaa kupobago. Masurewu aku, ane baria aku mobambari Bambari Malompe! 17 Ane rapana mobambari aku Bambari Malompe nakenimpeundeaku saduduaku, sangangaa rakiraka aku saroku, agaiana baria ewa etu. Ba kuunde ba baria, sangangaa kupadongka Bambari Malompe, lawi etumo bago anu nakiraka aku ni Pue Ala. 18 Mewali ane ewa etu, apamo saroku? Saroku iamo: mobambari aku Bambari Malompe, ai baria aku sambela merade saroku, i tau anu kubambarika Bambari Malompe etu.
I Paulu baria mampeulai peundea nu rarana bona tetambai tau anu mepotuu si Yesu
19 Aku ei baria batua nu tau, etumo mpane pensani aku mangula peundeaku. Agaiana nauda ewa etu, kuoaka tuwu ewa batua nu ope-ope tau. Kubabei etu bona tetambai tau anu kukeni mepotuu si Kerisitu. 20 Ane kubambari Bambari Malompe i toYahudi, mewali aku ewa sadua toYahudi, bona mawori toYahudi kukeni mepotuu si Kerisitu. Naudapae baria aku tetaka i Atura ni Musa, ane ria aku simbela-mbela ai tau anu mangula Atura ni Musa, tuwu aku ewa tetaka i Atura etu. Kubabei ewa etu, bona mangkeni sira mepotuu si Kerisitu. 21 Ane kubambari Bambari Malompe i tau anu baria manginsani Atura ni Musa, mewali aku ewa sadua tau anu baria mangula Atura ni Musa, bona kukeni sira mepotuu si Kerisitu. Etu kubabei, baria kabariana kupeulai parenta ni Pue Ala, kamonsona nakuasai liliuda aku parenta ni Kerisitu. 22 Ane ria aku i olo nu tau anu malede mani pepotuuna, mewali aku ewa tau anu malede, bona kukeni sira meula si Kerisitu. Mewali i ope-ope tau anu kupombesumbaka, kukadelo dala bona mewali aku ewa sira, bona ria sira anu kukeni mepotuu si Kerisitu. 23 Ope-ope etu kubabei, bona tetambai tau anu mepotuu i Bambari Malompe ai bona mansumba mbui aku pewati simbela-mbela ai sira.
Topobago ni Pue Ala rapandiri ewa tau anu momberiri melangka
24 Poka-poka, ope-ope tau anu mesua momberiri melangka, momberiri asa sira, agaiana sadua ngkida anu mansumba hadia. Ewa etu mbui komi, sangangaa nipari-pari mampeulai peundea ni Pue Ala, ewa tau anu tongora momberiri melangka, bona mansumba sira hadia. 25 Tau anu ina mesua momberiri aretu, sangangaa rapari-parira mpii molati wotora i pangka-pangkana, bona mansumba sira songko tanda penangira. Songko tanda penangi etu,b anu baria masae ope. Kita ewa etu mbui tababei i sinangka-nangkana, bona mansumba kita songko tanda penangi anu baria ina ope. 26 Tau anu momberiri melangka, baria sira melangka mbero, ria mpuu anu ratunggaira. Tau anu mombejangguru, baria peunde-undeana ngkida mejangguru. Ewa etu mbui aku, pensani rapandiri ewa tau anu baria melangka mbero ba anu peunde-undeana mejangguru. 27 Agaiana aku, kulati wotoku bona mokuasai aku wotoku saduduaku lako i sinangka-nangkana anu madaa. Baria kuunde ane roo aku mopadongka Bambari Malompe i tau, akuda anu baria mansumba hadia.