I Paulu mampololita kono i pangkoni anu rapopenomba i anitu
8
1 Kaliliuana, ina mololita aku kono i pangkoni anu rapopenombamo i anitu. Niuli, “Kita tau anu mepotuu si Kerisitu, tainsanimo patudu anu mamonso.” Pololitami etu mamonso, agaiana kuulika komi: nakeningka niinsanina patudu anu mamonso etu, ria komi anu mampemabose. Aginamo maasi kita i rangata bona tapakaroso rara nu singka rangata sira. 2 Ane ria tau i olomi anu manguli, “Mawori mpangkamo anu kuinsani,” agaiana ane baria ria asina, baria mani buke mpii ka nainsanina. 3 Agaiana tau anu monso-monso mampokaasi i Pue Ala, i Pue Ala manginsani rarana.4 Mewali, kono i pangkoni anu rapopenombamo i anitu, niuli ba pensani rakoni? Kalawiana pensani rakoni, lawi tainsani kamonsona anitu baria ria kuasana. Tainsani baria ria pue ntanina, batena i Pue Ala ngkida. 5 Kalawiana, maisi mpangkana anu napenombai nu manusia, anu raulira pue ba anitu, malompe i langi ba i wongko dunia. 6 Agaiana si kita, sadua ngkida i Pue Ala, iamo Tuamata, anu mewali puu nu sinangka-nangkana anu ria. Tuwu kita nakeningka Iana ai sadua ngkida Pueta, iamo i Yesu Kerisitu, mampoliungi Ia sinangka-nangkana napopewalimo ni Pue Ala ai nakeningka Iana ngkida, mansumbamo kita katuwu.
7 Agaiana nauda ewa etu, baria ope-ope tau anu mepotuu si Kerisitu, manginsani kabariana ria kuasa nu anitu. Lawi ria sira anu menomba i anitu, lako baria mani sira mewali tau anu mepotuu si Kerisitu. Etumo mpane, ane mangita sira pangkoni anu rapopenomba i anitu, nauli nu rarara, “Pangkoni etu pangkoni nu anitumo!” Mewali, ane mangkoni sira pangkoni etu, nauli nu rarara, “Madosa kita,” lawi bata-bata mani rarara ba pensani rakoni ba baria. 8 Kamonsona, pangkoni etu baria mangkeni kita gompi si Pue Ala. Ane takoni, baria kita morasi, ai ane baria takoni, baria mbui kita marugi.
9 Agaiana sangangaa mainga-inga komi. Naudapae pensani kita mangkoni sinangka pangkoni, agaiana inee tapopewali sampepepotuuta anu baria mani maroso pepotuuna madosa, nakenimpangkonita pangkoni etu. 10 Tunggaiaku ewa ei: rapana ane komi anu manginsanimo kapensanina rakoni pangkoni etu, mpane tongomi mangkoni i pearia posusua popenomba i anitu, mpane ria pokami sampepepotuumi anu bata-bata mani rarara, mangita komi mangkoni i se etu, mpane nakoni mbui. 11 Kasopoana, lako i pangkonimi pangkoni etu, mopakarugi nu pokami anu bata-bata mani rarana etu. Molentano ia mbui pokami sampepepotuu anu napasuru ni Kerisitu i posusuNa wotoNa rapopate. 12 Mewali, ane nibabei ewa etu, madosa mpuu komi i pokami etu, lawi nipopewali pokami anu bata-bata mani rarana etu, naimba wotona madosa. Ai babeiami etu, simbela ngkida ai mobabei komi dosa si Kerisitu. 13 Etumo mpane kuulika komi: ane rapana kupakadosa pokaku sampepepotuuku i ka kukonina bau ba pangkoni ntanina, aginamo bariamo kukoni pangkoni etu, bona ntena kupakadosa sampepepotuuku nakeni nu babeiaku.