Pepatudu ni Paulu kono i posamboko
7
1 Kaliliuana poka-poka, ei-ei ina kusonoi pampekunemi i rara nu surami anu nipakatuka aku, anu manguli: ba malompe ane tomoane baria sambela mosamboko? Mangula pampekiriku, etu malompe. 2 Agaiana bona ntena ria komi anu tedii rarami, mobabei babeia nu tau anu merikati, aginamo mosamboko ngkimo komi. Mewali, malompe ane tomoane ba towawine ria sambokona.3 Tomoane sangangaa mopabukei ia peundea nu towawinena, ewa etu mbui towawine, sangangaa mopabukei ia peundea nu tomoanena, i tempona niunde sawoto-woto. 4 Towawine baria pensani nauli, makuasa ia i wotona saduduana, lawi tomoanena makuasa mbui ia i woto nu towawinena. Ewa etu mbui tomoane, baria ia pensani nauli makuasa ia i wotona saduduana, lawi towawinena makuasa mbui ia i woto nu tomoanena. 5 Komi anu motombimo, inee komi mogaa maturu. Ngkalina ngkida, ane i tempomi mekakae, pensani mboto basangkia kasaena. Agaiana roo awetu, sangangaa mogulu mpesola komi, bona ntena ria tempo Datu nu Seta mokelo komi, lawi baria nibuku morempeki peundea nu rarami. 6 Tunggaiana lolitaku ei, baria moparentai komi, agaiana mopatudu komida. 7 Kamonsona, kuunde ane ope-ope tau baria mosamboko ewa aku. Agaiana baria ope-ope tau rabukura, ane baria sira mosamboko. Lawi sadua-sadua tau mansumba pewati anu montani-ntani lako si Pue Ala.
8 I tomoane ba towawine anu bembamo, eimo lolitaku: malompe ane bariamo komi motombi ewa aku. 9 Agaiana, ane baria nibuku morempeki peundea nu rarami, aginamo motombi ngkimo komi mpanena nakuasai komi peundea nu rarami.
10 Komi anu motombimo, eimo parentaku, kamonsona baria parentaku, agaiana parenta ni Pue Yesuda: komi towawine anu motombimo, inee nipogaaki tomoanemi. 11 Agaiana ane ria komi anu mogaamo, nipelisi: ba baria komi pensani mosamboko ai tomoane ntanina, ba mesola mpesola komi i tomoanemi. Ai komi tomoane, baria komi pensani mampogaaki towawinemi.
12 Kaliliuana poka, eimo patuduku: patudu ei patuduku saduduaku, baria parenta ni Pue Yesu: ane ria sadua tomoane anu mepotuu si Kerisitu, anu mampotombika sadua towawine anu baria mepotuu si Kerisitu. Inee napogaaki, asala towawine etu, naunde liliu nasamboko. 13 Ewa etu mbui ane sadua towawine anu mepotuu si Kerisitu, mampotombika sadua tomoane anu baria mepotuu si Kerisitu. Inee napogaaki asala tomoane etu naunde liliu nasamboko. 14 Lawi tomoane anu baria mepotuu si Kerisitu, sintoto mewali sadua tau ni Pue Ala, nakenimposambokona ai towawine etu, anu mewalimo tau ni Pue Ala. Ewa etu mbui towawine anu baria mepotuu si Kerisitu, sintoto mewali sadua tau ni Pue Ala, nakenimposambokona ai tomoane etu, anu mewalimo tau ni Pue Ala. Ane rapana baria ewa etu, anara ina raimba baria manginsani i Pue. Molentano sadua lako i tomanana mepotuu si Pue Yesu.
15 Agaiana ane tau anu baria mepotuu si Pue etu, mampenoka mampogaaki towawinena ba tomoanena, pogeakamode napogaaki. Ane awetu, towawine ba tomoane anu mepotuu si Pue, bariamo ia tetaka i ada posamboko. Agaiana kamonsona i Pue Ala moronde kita mewali anaNa, bona tuwu kita i rara mposintuwu ai sambokota. 16 Lawi ane baria komi mogaa, komi towawine anu mepotuu, ria mani tempomi mangkeni tomoanemi mepotuu si Pue. Ai ewa etu mbui komi tomoane anu mepotuu, ria mani tempomi mangkeni towawinemi mepotuu si Pue.
Sangangaa tapokatono katuwuta anu napakanotoka kita ni Pue
17 Sangangaa tapokatono katuwuta, anu tepakanoto amimo lako si Pue Ala i tempota Naronde mewali anaNa. Etumo parenta anu kupatuduka sira ope-ope jumaa, imba ngkida kalauaaku. 18 Pandirina, ane sadua toYahudi anu mepotuu si Pue Yesu, inee napari-pari mopakatonto tanda karatindinamo. Ewa etu mbui, ane sadua tau anu baria toYahudi mepotuu si Pue Yesu, baria ia sangangaa ratindi ewa toYahudi. 19 Lawi i petotoki ni Pue Ala, baria gaga mobundu ratindi ba baria ratindi. Lawi anu mobundu mpii, iamo pangulata parenta ni Pue Ala. 20 Kita ope-ope, nauda ba adiwa katuwuta i tempota naronde ni Pue Ala mewali tauNa, aginamo tapokatono katuwuta etu anu tepakanotomo lako si Pue Ala. 21 Ane rapana, batua katuwuta i tempota naronde ni Pue Ala mewali tauNa, inee mapari rarata mampekiri kabatuata. Agaiana ane sambela tempo rapawia komi lako i kabatuana katuwumi, aginamo nipopobundu katepawiami etu. 22 Lawi sadua tau anu batua katuwuna anu narondemo ni Pue Ala mewali tauNa, tepawiamo ia lako i kuasa dosa. Ewa etu mbui tau anu baria batua nu manusia katuwuna, anu narondemo ni Pue Ala mepotuu si Kerisitu, mewalimo ia batua ni Kerisitu. 23 Nabalukimo kita ni Pue Ala, pirimo Nabaiari. Etumo mpane inee komi mangula peundea nu tau i dunia ei. 24 Mewali poka-poka, ewa anu kuuli ni mpongone: ba adiwa katuwuta i tempota naronde ni Pue Ala mewali tauNa. Katuwuta etu, aginamo tapokatono inee tabaliki.
Patudu i tau anu baria mani mosamboko ai i tobemba anu mamatemo tomoanena
25 Ei-ei kupatuduka sira tau anu baria mani mosamboko. Patuduku ei baria kudoko lako si Pue, agaiana mangula pekiriku saduduaku. Patuduku ei sintoto mpuu rapotuu, lawi naongko aku ni Pue mewali suroNa nakeningkamaasiNa si aku. 26 Mewali, eimo pesumbaa nu pekiriku: i tempo ei, kita tau ni Pue Ala narumpa kita maisi mpangkana kapari. Etumo mpane kuuli, malompe mani ane tuwu liliu komi ewa katuwumi anu ei-ei. 27 Pandirina: komi tomoane anu mosambokomo, inee komi mangkadelo dala mampogaaki towawinemi. Komi anu baria mani mosamboko, inee nipari-pari bona mosamboko. 28 Agaiana ane ria tomoane anu mampenoka mosamboko, baria ia mobabei dosa. Ewa etu mbui, ane sadua towawine mampenoka mosamboko, baria mbui ia mobabei dosa. Sangangaa nikaendo: I tempo kapari ei, tau anu mosamboko mapari raepera mampolumakoi posambokora i dunia ei. Peundeaku bona ntena mapari niepe.
29 Poka-poka, tunggaiaku ewa ei: kita tau ni Pue Ala, sangangaa takaendo kabarianamo maisi tempota i dunia ei. Etumo mpane kuuli, mepuu ei-ei, komi anu mosambokomo, sangangaa nipopolumako lompe bago ni Pue, inee wule towawinemi anu nipekiri. 30 Komi anu motumangi, inee mapari gaga rarami. Komi anu matono, inee melumbu kamatonomi. Komi anu mobaluki ba apa-apa, inee mentaka rarami i anu-anu etu. 31 Komi anu mowulai kapebuku i dunia, inee wule etudamo anu nipekiri. Lawi dunia anu tapearii ei ina mapaia.
32 Peundeaku poka-poka, bona inee komi mampondanga rara liliu, kono i katuwumi i dunia ei. Tomoane anu baria mani sira mosamboko, pensani sira mampopolumako liliu bago ni Pue, lawi mampenoka sira mopakatono i Pue. 33 Agaiana tomoane anu mosambokomo sira, pampekirira maisi mampekiri katuwura i rara dunia ei, lawi mampenoka sira mopakatono rara nu towawinera, 34 etumo mpane mogaa rarara. Agaiana towawine anu baria mani mosamboko, pensani sira mampekiri liliu apa peundea ni Pue si sira, bona pensani sira mosusu katuwura batena si Pue ngkida. Agaiana towawine anu mosambokomo, pampekirira maisi mampekiri katuwura i dunia ei, lawi mampenoka sira mopakatono rara nu tomoanera.
35 Ope-ope ei kuulika komi poka, bona malompe katuwumi. Baria kuunde ane tetaka komi ai maisi mpangkana parenta. Tunggaiaku bona nibabei liliu apa anu sintoto, bona mangula komi peundea ni Pue ai bona ntena ria anu mosalempori pobagomi si Ia.
36 Agaiana ane sadua anantomoane i pampekirina ina mobabei ia anu baria malompe ba bariamo nabuku morempeki peundeana bona sawoto-woto ai anantowawine anu roomo napepambolii, aginamo naperade polo napotombika, ane kalawiana napekiri etu sintoto nababei, etu baria dosa. 37 Agaiana ane anantomoane nabuku morempeki peundea nu rarana, ai lako i rarana mpii mobotusi kabariana mosamboko, babeiana etu malompe. 38 Mewali, tau anu mosamboko, malompe babeiana. Pelumbunamo tau anu baria mosamboko.
39 Sadua towawine anu mosambokomo tetaka liliu ia i tomoanena tongona mani tuwu. Ane mamatemo tomoanena, tepawiamo ia lako i atura ada posamboko. Towawine etu pensani mosamboko mpesola, asala mamposambokoka ia tomoane anu mepotuu si Kerisitu. 40 Agaiana melumbu kalompena ane bariamo mosamboko. Etu pesumbaa nu pekiriku ngkida. Agaiana kupekiri patuduku ei napadongkaka aku nu Inosa ni Pue Ala anu ria i raraku.