Inee komi mopadongka kara-karami i tau anu baria sira tau ni Pue Ala
6
1 Mangkiada ane ria kara-karami, niunde mopadongka i lio nu topobotusi kara-kara anu baria tau ni Pue Ala, bona rabotusira kara-karami? Kamonsona, i tau ni Pue Alada nipadongka kara-karami, 2 lawi niinsanimo poka, i eo pobotusi kasopoa dunia, kita anu napelisimo ni Pue Ala ina mobotusi kara-kara nu tau i dunia. Mewali, ane ina mewali komi topobotusi kara-kara nu tau i dunia, adiwamo ane baria nibuku mobotusi kara-karami anu kokoi i tempo ei-ei? 3 Bona niinsani, i eo pobotusi kasopoa dunia, kita tau anu mepotuu si Kerisitu ina mobotusi kara-kara nu malaeka. Apa mani wule kara-kara nu tau i dunia ei, sangangaa nibuku nibotusi. 4 Mewali, ane ria kara-karami, inee nipadongka i tau anu baria sira tepesua i rara nu jumaa bona rabotusira.5 Tunggaia nu pololitaku ei, bona maea komi. Lawi kamonsona, ria komi anu matopa anu pensani mobotusi kara-karami. 6 Mewali, ane ria komi anu matopa mobotusi kara-karami, mangkiada mpane niunde mani mangkeni kara-karami etu i lio nu tau anu baria tau ni Pue Ala! 7 Inee komi mangkeni kara-karami i tau anu baria tau ni Pue Ala. Mepakaea mpuu ane ria kara-karami, lawi etu anu mopakanoto kabariana sintoto babeiami i petotoki ni Pue Ala. Kamonsona, aginamo nipogeaka tau mobabei apa anu baria sintoto si komi ba anu mopakarugi komi, mpanena lau nipetumbui i topobotusi kara-kara, anu baria sira tau ni Pue Ala. 8 Agaiana komi saduduami anu mobabei apa anu baria sintoto ai apa anu mepakarugi, babeiami etu nibabeida i pokami sampepepotuumi.
9 Niinsanimo poka-poka, tau anu madaa babeiara, baria sira ina mewali tau ni Pue Ala i rara nu peparentaaNa. Etumo mpane, inee komi manawu, i babeia ewa: babeia nu tau anu merikati, anu menomba i anitu, anu mebualosi, mobabei anu merikati ewa tomoane anu mampotombika singka tomoanena, 10 anu manangka, anu masirokoa, anu malangu, anu metunda-tunda, anu modongko; tau anu ewa tau aretu, baria sira ina mewali tau ni Pue Ala. 11 Komi poka, ria komi anu ewa etu babeiami ni banimpia. Agaiana i Pue Ala mopakagalimo komi lako i dosa ai Napelisi komi. I Pue Ala mopakanoto komi i petotokiNa nakenimpobago ni Pue Yesu Kerisitu ai nakeningkamakuasa nu Inosa ni Pue Ala Pueta.
Pepatudu ni Paulu kono i babeia anu merikati
12 Ria komi anu manguli, “Pensani kita mobabei apa ngkida mangula peundeata.” Agaiana mangula pampekiriku; ria anu mobundu tababei, ria mbui anu baria mobundu. Naudapae pensani aku mobabei apa peundeaku, agaiana baria kuunde ane wotoku ei nakuasai ba apa ngkida. 13 Ria mbui komi anu manguli, “Pangkoni mobundu i taita, ai taita mobundu ane raisii pangkoni.” Mamonso lolita etu, agaiana sambela tempo, sinangka-nangkana etu ina Napakaropu ni Pue Ala. Agaiana wotota ei, baria napopewali ni Pue Ala bona mobabei babeia nu tau anu merikati. Wotota sangangaa tapake mobabei peundea ni Pue, anu motumpui wotota. 14 Ai ewa i Pue Yesu Napatuwu mpesola ni Pue Ala lako i kamate, ewa etu mbui wotota ei ina Napatuwu mpesola lako i kamate nakeningkamakuasaNa.
15 Bariapae niinsani poka, wotomi iamo kira lako i woto ni Kerisitu. Malompepae ane wotota anu mewali kira lako i woto ni Kerisitu, tapopewali sawoto ai towawine anu mampobalu wotona? Baria! 16 Bariapae niinsani, sadua tomoane anu sawoto-woto ai sadua towawine anu mampobalu wotona, mewalimo ia sawoto ai towawine etu! Lawi i rara Sura Ngkora Magali teuki ewa ei:
“Tau anu rodua aretu mewali sira sadua.” (Pewalina 2:24)
17 Agaiana sadua tau anu mosintuwu ai i Pue, tau etu sampepekiri ia ai Pue.
18 Mewali, inee nibabei babeia anu merikati. Lawi tau anu mobabei babeia anu merikati, mopakarugi ia wotona saduduana. Baria ria dosa ntanina anu mopakarugi wotota saduduata ewa dosa etu. 19 Bariapae niinsani poka, wotomi iamo pearia nu Inosa Magali. Inosa Magali etu meari i rarami. I Pue Ala saduduaNa mokiraka komi Inosa Magali. Ia anu makuasa i wotomi, mewali wotomi baria komi tumpuna. 20 Lawi kita ei nabalukimo ni Pue Ala, ai pirimo kita Nabaiari. Etumo mpane wotota sangangaa tapake mobila i Pue Ala.