Jumaa sangangaa mosuku poka sampepepotuu anu mobabei dosa
5
1 Ria kuepe anu mololita, kono i babeia nu tau i olomi anu baria sintoto, iamo ria komi anu mombekadipuraka ai towawine nu tuamami anu ntanina. Molentano mogaloda tau anu baria manginsani i Pue Ala, baria sira ria anu mobabei ewa etu. 2 Agaiana komi, nauda ria anu mobabei ewa etu i olomi, batena mampemabose mani komi! Kamonsona, sangangaa maparida rarami, ai tau etu sangangaa nipopeloso lako i olomi. 3-4 Naudapae karao aku lako si komi, agaiana peepeku, ria mboto aku simbela-mbela ai komi. Etumo mpane, ewa ria mboto aku i olomi manguli, “Ai kuasa anu nakiraka aku ni Pue Yesu Kerisitu kupakanotoka komi, tau anu madaa babeiana etu sangangaa rasuku.” Ai ane mogulu komi, niimba aku ewa ria simbela-mbela ai komi, ai kuperade i rara kuasa ni Yesu Kerisitu Pueta, 5 tau etu sangangaa nisusu i kuasa Datu nu Seta bona wotona rasuku, ai tanuanana ina tesorema i kadongka mpesola ni Pue Yesu.6 Lawi ria mani komi mobabei anu madaa, baria sintoto ane mampemabose liliu komi! Sadua tau anu madosa, pensani mampopewali komi mawori manawu i rara nu dosa, ewa ragi anu saudi, mampopembongke tampu anu saudi mewali maisi. 7 Tende sala ragi anu masae etu, iamo dosa, bona mewali komi ewa roti anu mabou, bariamo ria dosami ai kuinsani kalawiana ewa etu komi. Lawi, komi napawiamo komi ni Pue Ala lako i dosa mampoliungi i Kerisitu anu mamate mosuru dosata, ewa dimba anu rasambale i Posusa Pasa nu toYahudi. 8 Mewali, taposusaimo potendeta ragi anu masae iamo babeiata anu madaa. Mangkonimo kita roti anu bou anu baria raragii, lempona; sangangaa mangula kita peundea ni Pue Ala lako i kabula nu rarata.
9 I rara nu suraku ni banimpia, kuulika komi bona inee komi mamposimada tau anu mobabei sala, i babeia nu tau anu merikati. 10 Anu kutunggai kusomboka komi inee niposimada, baria tau anu baria manginsani i Pue Ala anu mobabei babeia anu merikati, anu masirokoa, anu mebagiu, ba anu menomba i anitu, agaiana tau anu manginsani i Pue Alada anu babeiara ewa etu mbui. Lawi ane ketau anu baria manginsani i Pue Ala anu kutunggai, lempona sangangaa malambu komi lako i dunia ei. 11 Agaiana, anu kutunggai iamo: inee komi mamposimada tau anu manguli ka sirana tau anu mepotuu si Kerisitu, agaiana mobabei liliu sira babeia anu merikati, masirokoa sira, menomba sira i anitu, metunda-tunda sira, malangu sira, ai mebagiu sira. Mogaloda nipogaloka sira mangkoni, inee! 12-13 Ane tau anu baria sira mepotuu si Kerisitu, baria ria kuasaku mosuku sira. I Pue Ala ngkida anu mosuku sira. Agaiana komi anu mepotuumo si Kerisitu, anu sangangaa nisuku iamo pokami sampepepotuumi anu mobabei liliu sira sala. Lawi ria anu teuki i rara Sura Ngkora Magali ewa ei, “Tau anu madaa babeiara lako i olomi, niliwu sira!”