I Pue saduduaNa iamo Topobotusi
4
1 Mewali ane niimba kami tudua ni Kerisitu, anu rakiraka pepotuu bona mopadongka bambari lako si Pue Ala, anu baria mani rainsani nu tau i dunia. 2 Anu sangangaa nababei nu sadua batua, sangangaa matundu liliu ia i parenta nu toiwongkona. 3 Mewali, ane ria komi anu mampenoka mosalai pobagoku, baria mangkia. Ewa etu mbui, ane ria sira tau ntanina anu mampetandaka kamonsona pobagoku, baria mangkia. Baria mbui kupakanoto ba malompe pobagoku ba baria. 4 Panginsaniku baria aku masala, agaiana baria etu anu mopakanoto, ka akuna tau anu manoto. I Pueda anu mopakanoto, ba manoto aku ba baria. 5 Etumo mpane kuuli, inee komi mosalai pobago nu singka rangami. Nipegia sala kadongka mpesola ni Pue. Iamo anu ina mobungkasi ope-ope anu tewunikai mani i rara nu kadediana. Ina Napatongawa ope-ope tunggaia nu tau anu rabolira i rarara. I tempo etumo, sadua-sadua tau ina mansumba petoia lako si Pue Ala anu sintoto nadoko.Pengkaiwoi nu suro-suro mewali pandiri i tau
6 Poka-poka, apa anu kuuli ni mpongone, kono si Apolo ai aku saduduaku, bona mampeulai komi apa anu kipandirikamo komi. Mewali lako i se etu, niinsani mampegurui parenta anu manguli, “Inee komi moliungi atura anu teuki.” Tunggaiaku, bona ntena ria komi anu mampemabose, nakenimpeulami i sadua tadulakomi. Inee komi motoia sadua tadulakomi ai mopakoi nu tosaduana. 7 Imada anu manguli, komi melumbu lako i tau ntanina? Bariapae niinsani ope-ope anu ria si komi, nidokomo lako si Pue Ala? Mangkiada mpane mampemabose komi, ane ope-ope anu ria si komi nakiraka komi ni Pue Ala? 8 Ba nipenoka bariamo ria kamakurami? Ba nipenoka sondo mpuumo karoso nu pepotuumi si Pue? Ba nipenoka meparenta komi ewa datu, ai kami suro ni Pue Yesu bariamo kami niparaluu? Malompe mpuu ane monso komi mewali datumo, bona pensani kami meparenta simbela-mbela ai komi.
9 Kuuli ewa etu, lawi mangula pesumbaa nu pekiriku, kami suro ni Pue Yesu napopewalimo kami ni Pue Ala, ewa tau anu ina rapopate anu rasabiki nu tau wori. Kami ewa tau anu baria rahaile, tepaiwoi katuwuki i lio nu manusia ai malaeka. 10 Raimba kami todoio, lawi mobambari kami bambari kono si Kerisitu, agaiana niulida ka komina tau anu mepotuu si Kerisitu anu mapande! Kami malede kami, agaiana niulida maroso pepotuumi! Komi raadai nu tau i dunia, agaiana kami, rakaisii lolita kami! 11 Duduuna ei-ei, baria sondo pangkoniki, baria sondo panginuki, baria sondo pesampiki, rapopesiasi liliu kami, baria ria peariaki anu manoto, 12 mobago mantimi kami ai paleki saduduaki. Ane ria sira anu motunda-tunda kami, kisurungi sira ai pewati. Ane ria sira anu mampopesiasi kami, tetida kami. 13 Ane ria sira anu mosasalai kami, kisonoi sira ai lolita anu maalusu. Duduuna ei-ei, raimba mani kami ewa parupu dunia, ai babeiara si kami ewa parewa anu baria ria bunduna.
14 Poka-poka! Tunggaiaku mouki aretu, baria bona mopakaea komi. Agaiana bona mopatudu komi, lawi kuimba komi anaku anu kupokaasi. 15 Lawi nauda ba i nsobuna gurumi anu monini komi i peulami si Kerisitu, aku ngkida anu nipotuama, lawi aku anu mpolinguruna mobambari Bambari Malompe si komi, duduuna mepotuu komi si Yesu Kerisitu. 16 Etumo mpane kuperade mpii si komi, bona nipeulai babeiaku. 17 Mewali, kutudumo i Timotiu lau mampomberumpaka komi. I Timotiu etu, mampopolumako liliu bago ni Pue, ai kuimbamo anaku anu kupokaasi, ai pensani ia rapotuu. Ane dongka ia si komi, ina napopaingaaka komi adiwa peulaku si Kerisitu, simbela ewa anu kupatuduka liliu i ope-ope jumaa, imba-imba ngkida.
18 Basangkia komi anu mampemabose, lawi nipenokami bariamo aku lau mampomberumpaka komi. 19 Agaiana bariamo masae ina lau aku mosondaki komi ane sintoto ai peundea ni Pue. I tempo etu, ina kuita apa anu rababei nu tau anu mampemabose etu, ai ina kuinsani ba ria mpuu si sira kuasa ni Pue ba wule pololitara ngkida. 20 Lawi ane i Pue Ala moparenta rarata, sangangaa mangula kita peundeaNa, baria wule i pololitata ngkida, agaiana ai babeiata mbui, lawi mansumbamo kita kuasa lako si Ia. 21 Mewali, umba anu niunde? Ina lau aku mokarumpui komi, ba lau aku ai kalompe ai pepokakaia?