ToKorintu baria mosintuwu nakenimpangulara peundea nu rarara sadua-sadua
3
1 Poka-poka, tempoku mani simbela-mbela ai komi ni banimpia, baria komi pensani kupatudu ewa tau anu modokomo sira Inosa Magali. Agaiana kupatudu komi, ewa tau anu mampeulai mani pangkeniakara anu madaa. Lawi ni tempo etu, baria mani maroso pepotuumi si Kerisitu, ewa analei mani pepotuumi. 2 Ane analei anu mesusu mani, baria pensani rakiraka pangkoni anu makoo. Ewa etu mbui komi ni banimpia, kupadongkaka komi patudu anu sintoto i tau, anu baria mani maroso pepotuura. Baria mani komi kupadongkaka patudu anu sintoto, ewa i tau anu marosomo pepotuura, lawi baria mani nibuku modoko. Ai duduuna ei-ei, baria mani nibuku modoko, 3 lawi mangula liliu mani komi pangkeniakami anu madaa. Ane masina mani komi ai mobungka-bungka mani komi, etumo anu mopakanoto pangkeniakami anu madaa, ewa tau anu baria mani sira manginsani i Pue. 4 Lawi, ria komi anu manguli, “Aku meula si Paulu,” anu sadua manguli, “Aku meula si Apolo,” bariapae babeiami etu, ewa babeia nu tau anu baria mani manginsani i Pue?5 Ane aku ai i Apolo, wule tudua ni Pue Ala ngkida kami anu monini komi, bona mepotuu komi si Pue Yesu. Sadua-sadua kami mampopolumako bago anu nakiraka kami ni Pue. 6 Kami ewa topobonde: aku anu mosawu, i Apolo anu mobumbusi, agaiana i Pue Alada anu mopatuwu. 7 Mewali, toposawu ai topobumbusi, baria sira puu nu bago etu. Batena ngkida i Pue Ala anu mewali puu nu bago etu, lawi Iamo anu mopatuwu. 8 Anu mosawu ai anu mobumbusi, simbela ngkida sira. Sira roduara mansumba sarora mangula kamantimina pobagora. 9 Lawi kami sampopobago ngkida i rara bago ni Pue Ala, ai komi pensani rapandiri ewa bonde ni Pue Ala.
Pensani mbui komi rapandiri ewa tombi ni Pue Ala. 10 Nakeningkabula rara ni Pue Ala, Naongko aku mewali suroNa, ai aku anu mpolinguruna mobambari Bambari Malompe si komi. Aku ewa sadua topowangu tombi anu mapande, anu mpolinguruna mamboli watu peongkoa nu tombi, mpane tau ntanina mowangu i wongko watu peongkoa nu tombi etu. Ai ope-ope topobago sangangaa mopakalompe-lompe pobagora si Pue. 11 Lawi baria ria dala anu ntanina mewali tau ni Pue Ala, batena ngkida mepotuu si Yesu Kerisitu. Etumo mpane, i Yesu Kerisitu rapandiri ewa watu peongkoa nu tombi anu nawangu ni Pue Ala. Baria ria peongkoa nu tombi anu ntanina. 12 Ane ria tau, anu malompe pampopolumakora bago ni Pue, pensani sira rapandiri ewa topowangu tombi anu mopake parewa anu malompe, ewa bulawa, salaka ai watu paramata. Ai ane ria tau, anu baria malompe pampopolumakora bago ni Pue, sira ewa topowangu tombi anu mopake parewa anu baria malompe, ewa kau, owo ai deami. 13 Mewali, ane tombi etu nakoni nu apu, ina tainsani mpuu parewa anu malompe ai parewa anu baria malompe, lawi parewa anu malompe baria ina pumpu, agaiana parewa anu baria malompe batena ina pumpu nakoni nu apu. Ewa etu mbui i kadongka mpesola ni Pue, ina Napetandaka moparesa pobago nu ope-ope tau: ba malompe ba baria. 14 Ane pobago nu sadua tau malompe i poparesa ni Pue, ina mansumba ia sarona. 15 Agaiana ane pobagona baria malompe, ina mansumba ia karugi. Ina tepawia ia lako i suku dosana, agaiana baria ia mansumba sarona. Ia ewa tau anu pensani mensuwu lako i rara nu tombina anu tongona nakoni nu apu: matonto ope-ope anu-anuna, wotonadamo anu melabi.
16 Bariapae niinsani poka: komi iamo jumaa anu napearii ni Pue Ala, ai Inosa ni Pue Ala ria liliu simbela-mbela ai komi. 17 Ane ria sadua tau anu mogero posintuwu nu tau ni Pue Ala, tau etu ina nasuku ni Pue Ala. Lawi pearia ni Pue Ala magali. Ai komi poka, iamo tombi pearia ni Pue Ala.
Inee mangula katopa nu manusia
18 Inee komi mopakanawu wotomi saduduami. Ane ria sadua tau i olomi anu mengkatopa i lio nu manusia, aginamo tau etu mewali todoio i lio nu manusia, bona mewali matopa ia i lio ni Pue Ala. 19 Lawi apa anu rauli katopa nu manusia, iamo kadoio i petotoki ni Pue Ala. Lawi ria teuki i rara Sura Ngkora Magali ewa ei:
“I Pue Ala monangi tau anu matopa ai katopara saduduara.” (Ayubi 5:13)
20 Ria mbui anu teuki i rara Sura Ngkora Magali:
“I Pue Ala manginsani pampekiri nu tau anu matopa,
baria ria pobunduana.” (Dulua Petoia 94:11)
21 Etumo mpane, kuperade bona inee komi mampemabose nakenimpeulami i sadua tadulako. Lawi sinangka-nangkana anu niparaluu, nakirakamo komi ni Pue Ala. 22 Ewa etu mbui i Apolo, i Peturu ai aku, natudu ni Pue Ala si komi bona motulungi komi. Ai i Pue Ala mokiraka komi katuwu anu bou ai mopawia komi lako i kamate. Ai apa anu mewali ei-ei, ba apa anu mewali i eo-eo anu ina mai, ope-ope etu mewalimo kirami. 23 Ai komi iamo kira ni Kerisitu, ai i Kerisitu iamo kira ni Pue Ala.