Sura ni Suro Paulu anu karombelana napakatuka jumaa i kota
Korintu
Pepuua lolita
I Paulu anu mpolinguruna mobambari Bambari Malompe i kota Korintu (Suro 18:1-17). Tongo ni Paulu lau mobago i boea ntanina, ria sira toKorintu anu mosapuaka kuasana, raulira baria ia suro ni Pue Yesu. Mewali, i Paulu motudu i Titu lau mosondaki sira. I Titu mopadongkaka sira lolita ni Paulu anu mokambaroka tau i olora anu mosapuaka kuasana. Tempo ni Titu mesola lako i Korintu, naulika i Paulu, “Mawori tau i olora menonso sira lako i pesapuakara. Agaiana ria mani sira anu makoo rarara anu mosapuaka kuasamu.”
Awetu naepe ni Paulu bambari etu, naukimo sura ei. I rara nu sura ei, napololita pobagona mobambari Bambari Malompe (2:14–6:10), ai napadongkaka sira kabosena asina si sira (6:11-13; 7:2-4, 13-16). Matono rarana lawi mawori sira anu menonso lako i pesapuakara (7:5-13). Roo awetu, naperade bona toKorintu mogulu sira doi, bona ane dongka ia luwu, doi etu, nakeni lau ni Paulu i kota Yerusale ai nakiraka i tau anu mepotuu si Kerisitu anu mesiasi katuwura (8:1–9:15). Lako ni se etu, i Paulu mokambaroka sira tau anu mosapuaka mani kuasana (10:1–13:10).
Isi nu Sura
1. Pepuua lolita (1:1-11)
2. I Paulu mopakanoto apa puuna mpane tebaliki tunggaiana mosondaki sira (1:12–2:13)
3. I Paulu mampololita pobagona mobambari Bambari Malompe (2:14–6:10)
4. I Paulu mopadongka basangkia mpangkana patudu si sira (6:11–7:16)
5. I Paulu merade bona mogulu sira doi rapakatu i tau anu mepotuu si Kerisitu anu mesiasi katuwura i kota Yerusale (8:1–9:15)
6. I Paulu manguli notona ai mokambaroka sira anu mosapuaka mani kuasana (10:1–13:10)
7. Lolita kasopoana (13:11-13)