Matono i Paulu lawi i Titu mangkeni bambari kono i toKorintu
7
1 Mewali, pokaku anu kupokaasi, nakeningka nakirakata ni Pue Ala dandiNa etu, etumo mpane sangangaa tapakagali wotota ai rarata, bona tepawia kita lako i sinangka-nangkana anu madaa. Sangangaa mampeulai mpuu kita peundea ni Pue Ala lako i rarata, bona pensani kita tuwu i rara nu kamagali.2 Nidokomode kami i rarami. Baria kami masala ba si ima ngkida, ai baria sambela ria tau anu kipakarugi. Ai baria mpuu kami mangkadelo rasi lako si ima ngkida. 3 Kuuli ewa etu, baria bona mosasalai komi. Lawi roomo kiuli, kipokaasi mpii komi, malompe matuwu ba mamate batena samporangaa liliu kita. 4 Kupotuu mpii komi ai kabuke-bukena nu raraku, ai baria wule etu, matono mpii mbui raraku si komi! Naudapae mansumba komi maisi kapari, raraku tepakalene nakeningka komina. Raraku monso-monso matono!
5 I tempoki mangoka lako i Troas mai i Makedonia ei, awetu kami dongka baria ria tempoki mengkangkaroo. Imba ngkida kalauaaki, narumpa kami maisi kapari, malompe lako i raoa ewa etu mbui lako i rara; Lako i raoa maisi posisala ai lako i rara maeka kami.* 6 Agaiana kuuli maisi kalompena si Pue Ala, anu mopakalene tau anu bariamo ria pesarumakana, lawi ni tempo etu dongkamo i Titu mangkeni bambari kono si komi. Mewali, raraki anu mapari napakalene ni Pue Ala i kadongka ni Titu. 7 Ai melumbu lako i se etu, matono kami mangepe pololitana kono si komi. Napadongka ni Titu si kami adiwa ka nipakalenena rarana, tongona meari i olomi. Nauli maruminsi kamabilami si aku ai nipenoka mpuu bona dongka aku si komi. Nauli mbui: tebaliki rarami ai niperade ampu si aku lawi nipenoka mosintuwu ai aku lako i rarami. Awetu kuepe etu, tetambaimo katonoku, poka.
8 Mewali nauda isi nu suraku ni banimpia mobelai rarami, agaiana bariamo kupenonsoi mopakatuka komi sura etu. Mpolinguruna mapari mpuu kuepe, lawi kuinsani mapari rarami ane mobasa komi sura etu. Agaiana kamapari nu rarami etu sampalai ngkida. 9 Etumo mpane, kuuli bariamo mapari raraku; matono ngkida aku. Baria aku matono nakeningkaparimi, agaiana matono aku lawi kamaparimi etu mangkeni komi menonso lako i babeiami anu baria malompe. Lawi nauda mapari rarami mobasa suraku etu, kamapari nu rarami napodala ni Pue Ala mangkeni pewati si komi. Mewali, pololitaku i rara nu sura etu baria mopakarugi komi. 10 Lawi ria kapari anu mangula peundea ni Pue Ala, ai kapari etu mangkeni kita menonso lako i babeiata anu madaa, duduuna nasorema kita ni Pue Ala lako i kamate. Kapari etu baria tapenonsoi, agaiana tauli maisi kalompena lawi etu mangkeni kita gompi si Pue Ala. Agaiana ane mapari rarata ewa tau anu baria mepotuu si Pue Ala, kapari etu baria mangkeni kita menonso lako i babeiata anu madaa, duduuna mangkeni kita i kamate anu mogaaki kita lako si Pue Ala.
11 Ei-ei niitamo apa wuana i kapari anu sintoto ai peundea ni Pue Ala etu. Nipekiri lompe ba apa wuana kamaparimi etu. Nakeningkaparimi etu, mampenoka komi mobabei apa anu manoto. Baria niunde babeia nu tau anu mosapuaka patuduki. Nikasisi babeiara anu madosa, ai maeka komi mangula babeiara. Mabila komi si aku, mampeulai komi parentaku, ai matimama komi mosuku tau anu masala. I sinangka-nangkana, tongawamo kabariami masala.
12 Poka-poka, tunggaia nu suraku si komi ni banimpia, baria i tau anu mobabei kamasala, ba i tau anu mantodisa kamasala. Agaiana tunggaiaku mouki sura etu, bona nipatongawa i petotoki ni Pue Ala, adiwa kabosena asimi si kami. 13 Mewali maroso raraki nakeningka kiepena bambari kono si komi.
Ai melumbu lako i se etu, matono mbui kami mangita katono ni Titu. Malene rarana mangita babeiami anu malompe tongona meari i olomi. 14 Lako baria mani kutudu ia lau si komi ni banimpia, kupadongka amimo adiwa kalompena rarami, kutoia sangami. Morasi mpuu aku poka, baria aku nipakaea. Ope-ope anu kuulika komi, mamonso mpuu. Ewa etu mbui ope-ope anu kupadongkaka i Titu kono si komi, baria ria anu masala, mamonso mpuu ope-ope. 15 Ai ia mbui, tetambai asina si komi, lawi nakaendo adiwa peulami i parentana. Nidoko lompemo ia ai matundu mpuu komi si ia.
16 Mewali poka, sambela mani kuuli: matono mpuu aku ei, lawi pensani komi kupotuu ai kusarumaka i sinangka-nangkana.