6
1 Mewali kami ei, batua ni Pue Ala mobambari NgkoraNa i tau. Etumo mpane kiperade mpii poka, bona inee nipopewali mbero-mbero kabula rara ni Pue Ala anu nidokomo etu. 2 I rara Sura Ngkora Magali, i Pue Ala manguli ewa ei:“I tempo anu Kupakanoto, Kupetingaimo pekakaemu,
I eo pesorema, Kutulungimo iko.” (Yesaya 49:8)
Poka-poka, kuulika komi, ei-eimo tempo anu napakanoto ni Pue Ala etu, tempomimo Nasorema.
3 Mewali, sangangaa kipakalompe-lompe mpii babeiaki bona ntena ria tau anu kipakanawu nakeningkamasalana babeiaki, ai bona ntena ria tau anu mopakoi bagoki mobambari Ngkora ni Pue Ala. 4 Etumo mpane, i pangka-pangkana, kibabei liliu apa anu malompe, bona tongawa ka kamina topobago ni Pue Ala anu manoto, lawi tetida kami i rara mampopengaa kapari, 5 rapopesiasi kami, ratarunggu kami, ai rarurugii kami nu tau wori, mobago mantimi kami, mawori mbela baria kami pensani leta, ai mawori mbela baria ria pangkoniki. 6 Naudapae ewa etu, i pangka-pangkana kipakanoto ka kamina topobago ni Pue Ala lako i kabula-bula nu raraki, lako i kamatopaki, lako i kasabaraki, kalompe nu raraki i ope-ope tau, mopadongka kami Ngkora ni Pue Ala i kanoto-notona. Nakuasai kami nu Inosa Magali, ai mampokaasi kami rangaki lako i kabula nu raraki, 7 ai mobambari kami bambari anu lako si Pue Ala ai kuasa ni Pue Ala. Anu mewali pempatoroaki iamo, babeiaki anu manoto mangula peundea ni Pue Ala, anu mewali parewaki mampeparai wotoki. 8 Tempoki mampopolumako liliu bago ni Pue Ala, naudapae ria tau anu mobila kami, agaiana ria mbui anu mokaisii lolita si kami, naudapae ria tau anu mosalai kami, agaiana ria mbui tau anu motoia kami. Naudapae ria tau anu manguli topodongko kami, agaiana ria mbui anu manguli mamonso anu kiuli. 9 Naudapae rainsanimo kami, agaiana baria kami rahailera. Mawori mbela kami ina mamate, agaiana tuwu mani kami. Rarurugii kami, agaiana baria kami mamate. 10 Naudapae rapakapari raraki, agaiana matono liliu kami. Mesiasi katuwuki, agaiana mangkeni kami pewati i tau wori. I petotoki nu manusia, maisi kamakuraki, agaiana kamonsona sinangka-nangkana ria si kami.
11 Pokaki toKorintu! Baria ria anu kiwunikaika komi. Niita mpuumo kalompe nu raraki si komi. 12 Baria kami anu baria mampokaasi komi, agaiana komida anu baria mampokaasi kami. 13 Ei-ei, mololita aku si komi, ewa mampololitaka aku anaku saduduaku. Mewali adiwa ka kipokaasimi, kiperade bona nibungkasika mbui kami rarami bona nipokaasi mbui kami!
I Paulu mampopaingaka bona inee sira mosintuwu ai tau anu baria mepotuu si Pue
14 Inee komi mosintuwu ai tau, anu baria sira mepotuu si Pue Yesu. Baria sintoto tau anu mangula sira peundea ni Pue Ala, mosintuwu ai tau anu mosapuaka sira i Pue Ala! Pensanipae anu mabaa mosintuwu ai anu madedi? 15 I Kerisitu, baria pensani sampepekiri ai Datu nu Seta. Ewa etu mbui, tau anu mepotuu si Kerisitu, baria pensani mosintuwu ai tau anu baria mepotuu si Kerisitu. 16 Baria ria kasimbelaana Tombi ni Pue Ala, ai tombi penombaa i anitu. Kita ei rapandiri ewa tombi ni Pue Ala, lawi i Pue Ala anu tuwu meari i olota. Etumo mpane baria sintoto ane kita anu menomba si Pue Ala, mpane meula mbui kita i tau anu menomba i anitu. Lawi nauli ni Pue Ala:
“Ina meari Aku i rarara
ai ina Kuporangai sira.
Ina mewali Aku Pue Ala anu rapenombaira,
ai ina mewali sira tauKu.” (Atura Penomba 26:12; Yeheskiel 37:27)
17 “Mewali, sangangaa nipawia pangulami babeia nu tau anu baria manginsani Aku,
inee sira niposintuwuka!
Nipakarao wotomi lako i ope-ope babeia anu madaa,
ane nibabei ewa etu, ina Kudoko komi.” (Yesaya 52:11)
18 Lawi i Pue Ala anu makuasa manguli:
“Aku ina mewali Tuamami,
ai komi ina mewali anaKu.” (2 Semueli 7:14, 1 Tawari 17:13, Yesaya 43:6, Yeremia 31:9)