I Pue Ala ina mokiraka kita woto anu bou
5
1 Tainsanimo, ane wotota ei anu rapandiri ewa tombi i dunia ei ragero, i Pue Ala mopasilolongaaka kita sambua tombi i suruga, anu baria nababei nu manusia ai anu baria mokasopoa. 2 Tongota mani tuwu i dunia ei, mantodisa kita lawi mampenoka kita mansumba peariata anu bou i suruga. 3 Lawi pearia anu bou etu, iamo wotota anu bou. 4 Tongota mani tuwu i dunia ei, meraroa kita lawi mantimi kolongata. Agaiana baria taunde mopalengi wotota ei. Baria taunde mamate, agaiana taunde bona wotota ei kasaliu rapasuru ai woto anu baria mokasopoa. 5 Agaiana, i Pue Ala saduduaNa anu mopasilolongaakamo kita sinangka-nangkana etu, ai Ia anu mokiraka kita Inosa Magali mewali sambua katongawaana, kono i ope-ope anu Nadandi etu, batena mewali.6 Etumo mpane, maroso liliu rarata. Naudapae tainsani, tongota mani tuwu i dunia ei, karao mani kita lako i pearia ni Pue Yesu, anu ina tapearii simbela-mbela luwu ai Ia, 7 Lawi katuwuta anu tapolumakoi ei-ei, nakenimpepotuuta si Kerisitu, baria wule i apa anu raita. 8 Etumo puuna mpane tetida rarata, lawi ane mogaa kita ai wotota ei, ina tuwu kita simbela ai i Pue Ala. 9 Mewali, tapari-pari liliu mopakatono rara ni Pue, malompe tongota mani tuwu i dunia ei, ba i tempota i surugamo. 10 Lawi sambela tempo, ope-ope kita sangangaa lau si Kerisitu bona Naparesa pobagota, ai ope-ope kita ina mansumba surungina lako i apa anu tababei tongota mani tuwu i dunia ei, malompe ba madaa.
Sangangaa mepotuu kita si Kerisitu lawi Ia ngkida anu mopasintuwu tau ai i Pue Ala
11 Mewali nakeningkalako i raraki mpii moadai i Pue Ala, etumo mpane kipari-pari mangkeni tau mepotuu si Pue Yesu. Nainsani ni Pue Ala raraki. Peundeaki bona komi mbui ina manginsani kabula nu raraki. 12 Ai inee nipenoka kiperade bona motoia komi wotoki. Kipopainsanika komi babeiaki anu malompe, bona matono komi nakenimpobagokimo i olomi, ai bona niinsani adiwa mosonoi sira tau anu motoia wotora ai kapandera, agaiana madaa rarara. 13 Baria mangkia-ngkia, ane ria anu manguli magila kami nakenimpobagoki si Pue Ala, lawi kiunde mpuu mobago si Pue Ala lako i kabula nu raraki. Agaiana ane pampekirimi kami ei tau anu manoto, etu malompe lawi mobago kami bona motulungi komi. 14 Lawi, kiinsani asi ni Kerisitumo anu mokuasai kami, ai kiinsani nakeningkamate ni Kerisitu etumo, anu mopakanoto ope-ope tau bariamo sira tuwu i pangkeniakara anu masaemo. 15 Mewali nakeningkamate ni Kerisitu mampoporasimo ope-ope tau. Kita anu tuwu mani i dunia ei bariamo kita mangula peundeata saduduata, agaiana mangulada kita peundea ni Kerisitu. Lawi i Kerisitu mamate mpane tuwu mpesola, nakeningka kitana.
16 Mewali etumo mpane, bariamo kami mosoka tau mangula posoka nu manusia. Kalawiana ni banimpia mosoka kami i Kerisitu, mangula posoka nu manusia, agaiana ei-ei bariamo ewa etu pekiriki. 17 Mewali, ane ria sadua tau anu mosintuwumo ai i Kerisitu, mewalimo ia manusia anu mabou. Katuwuna anu ni banimpia liumo, ope-opena mewalimo mabou. 18 I Pue Ala mampoliungi i Yesu Kerisitu, mampopewali kita mabou. Ai mampoliungi i Kerisitu, mopasintuwumo kita ai i Pue Ala. Mpane Natudu kita mopadongka bambari etu i tau ntanina, bona mosintuwu mbui sira ai i Pue Ala. 19 Eimo bambari anu kipadongka: mampoliungi i Kerisitu, i Pue Ala mobungkasi dala bona ope-ope tau i dunia mosintuwu ai Ia, ai bariamo Napairara kamasalata. Kami ei, Nakiraka kami bago mangkeni bambari etu i tau ntanina, bona mosintuwu sira ai i Pue Ala.
20 Mewali kami iamo tudua ni Kerisitu. Mampoliungi kami, i Pue Ala mopadongka pololitaNa si komi. Etumo mpane mangula peundea ni Kerisitu, kiperade mpii si komi bona mosintuwu komi ai Ia. 21 I Kerisitu baria madosa, agaiana natudu Ia ni Pue Ala mosuru dosata. Tunggaia ni Pue Ala bona mosintuwu kita ai i Kerisitu, mpane raimba kita manoto i petotoki ni Pue Ala.