Tau anu mobambari Bambari Malompe sangangaa manoto babeiara
4
1 I Pue Ala anu moongko kami mewali topobagoNa, mpane kibuku mampopolumako bago ei nakeningkamaasiNa si kami. Etumo mpane baria ope pesarumakaki si Pue Ala. 2 Kitendemo sinangka babeia anu mepakaea; baria ria anu kiwunikai; baria kami mopakanawu tau, baria kami mobaliki tunggaia Ngkora ni Pue Ala. Kipadongka apa anu mamonso i kanoto-notona, bona ope-ope tau mopakanoto i rarara kamonsona bambari anu kibambari. 3 Ane ria tau baria modoko ai baria mampotuu i Bambari Malompe anu kipadongka, tau anu ewa etu tongona monontosi karopu. 4 Napakawuli sira Datu nu Seta anu mokuasai dunia ei, ntena sira mampotuu Bambari Malompe. Etumo mpane, baria sira mangita pewangka lako i bambari anu malompe, kono i peawa ni Kerisitu. Mewali, baria sira mangita peawa nu katuwu ni Kerisitu anu simbela ai peawa ni Pue Ala. 5 Baria kami mopadongka bambari kono i wotoki saduduaki. Anu kipadongka, bambari anu manguli: I Yesu Kerisitu iamo i Pue. Ai kami ei, nakenimpeundea ni Kerisitu, mewali kami batuami. 6 I Pue Ala mongkora, Nauli, “Lako i kamadedi, mewalimo mabaa”, ai Ia mbui anu mopakabaa rarata, bona taita ai tongawa si kita peawa ni Pue Ala mampoliungi katuwu ni Yesu Kerisitu.Kipadongka Bambari Malompe lako i kuasa anu kisumba lako si Pue Ala
7 Kami manusia ngkida kami, agaiana mabose mpuu kuasa ni Pue Ala anu mobago i raraki. Pensani kami rapandiri ewa kura tana anu buke ai anu-anu, anu masuli balukina. Lako i ngkora pandiri ei, tongawamo kuasa anu ria si kami baria kuasaki saduduaki, agaiana kuasa etu kisumba lako si Pue Ala. 8 Imba ngkida kalauaaki, narumpa kami maisi kapari, agaiana baria kami rapakanawu. Mawuli kami, agaiana baria ope pesarumakaki si Pue Ala. 9 Rapopesiasi kami, agaiana baria kami napalengi ni Pue. Rawombe kami duduuki madungka, agaiana baria kami mamate. 10 Imba ngkida kalauaaki, baria kami sambela tepawia lako i karaliwoakaki nu tau rapopate ewa i Pue Yesua bona katuwu ni Pue Yesu rapatongawa i rara nu wotoki. 11 Tongoki mani tuwu i dunia ei, mawori sira tau anu mampenoka mampopate kami nakenimpeulaki si Pue Yesu. Agaiana etu mewali, bona i rara nu wotoki anu sampalai ngkida ei, tongawa katuwu ni Pue Yesu. 12 Ei lempona, i rara nu wotoki kamate mobago liliu. Agaiana matono raraki lawi Bambari Malompe anu kipadongka ei, moparia katuwu malompe si komi.
13 I rara Sura Ngkora Magali, teuki ewa ei, “Nakenimpepotuuku, etumo mpane baria aku maeka mololita.” Ewa etu mbui ai kami. Mepotuu kami si Pue Ala, etumo mpane baria kami maeka mopadongka Bambari Malompe. 14 Lawi kipotuu mpii, i Pue Ala anu mopatuwu mpesola i Pue Yesu, ina mopatuwu mpesola mbui kami lako i kamate ai mangkeni kami ai komi i lioNa. 15 Ope-ope ei mobundu si komi, bona kalalaua mawori tau mansumba kabula rara ni Pue Ala. Mpane mawori tau manguli maisi kalompena si Pue Ala, duduuna sangaNa rapakabosera.
Tuwu i rara pepotuu
16 Mewali, etumo mpane kuuli baria ope pesarumakaki si Pue Ala. Naudapae kalalaua malede wotoki ei, agaiana eo-eona kisumba karoso rara anu bou lako si Pue. 17 Lawi kapari anu tasumba ei-ei, anu sampalai ngkida baria mantimi. Agaiana kapari etuda anu mopariaka kita katuwu anu meawa, anu baria mokasopoa. 18 Mewali, inee kita wule mampempekiri pantodisa anu taita ei-ei, agaiana anu tapepekiri iamo peawa anu baria mani taita. Lawi anu taita sampalai ngkida, agaiana anu baria mani taita etu, ria liliu duduuna kasae-saeana.