ToKorintu rapandiri ewa sambua sura anu nauki ni Kerisitu
3
1 Mewali inee nipenoka mampopetoia mbuimo kami, ewa basangkia guru-guru agama ntanina anu dongka si komi? Mangkeni sira sura petoia lako i rangara bona nidoko sira, ai ane mesola sira, raperadera mbuimo sura petoia si komi! Ane kami, baria kami moparaluu sura anu ewa etu. 2 Komimo anu ewa sura petoia anu kikeni ai anu teuki i raraki. Nakeningkatebalikina rarami, ope-ope tau anu mangita katuwumi manginsani kalompena pobagoki mobambari Bambari Malompe si komi.a 3 Nipopeitaka i ope-ope tau wua nu pobagoki mangkeni bambari kono si Kerisitu si komi. Komi ewa sambua sura anu nauki ni Kerisitu. Sura etu baria Nauki ai tinta ba i watu poukia. Agaiana i Kerisitu mouki pololitaNa i rarami ai Inosa ni Pue Ala anu tuwu.4 Kipololita ewa etu, nakenimpepotuuki si Pue Ala mampoliungi i Kerisitu. 5 Baria kiuli kibuku mpuu mampopolumako bago ni Pue lako i kapandeki saduduaki; i Pue Alada anu mokiraka kami mpane kibuku. 6 Nakiraka kami kapebuku mewali topobagoNa anu mopadongka dandiNa anu bou i tau. Baria sira kipatudu bona mampeulai sira atura-atura anu teuki, agaiana kipatudu sira bona modoko sira katuwu anu bou lako i Inosa Magali. Lawi ane mampenoka kita mewali manoto i petotoki ni Pue Ala i pangulata atura anu teuki, ina mansumba kita kamate. Agaiana ane meula kita si Pue Ala, nakeningkamakuasa nu Inosa Magali, mansumba kita katuwu.
Melumbu kalompena dandi ni Pue Ala anu bou lako i dandiNa anu masae
7 Ni banimpia, tempo ni Pue Ala mouki aturaNa i watu poukia anu Nakiraka i Musa. I tempo etu mbui, peawa ni Pue Ala tongawa mewangka i lio ni Musa, etumo mpane baria rabuku nu toSaraeli mototoki lio ni Musa. Naudapae atura etu simbela-mbela ai pewangka ni Pue Ala, atura etu batena mangkeni kamate, lawi baria rabukura mangula atura etu. Mewali ane peawa ni Pue Ala anu mabose, tongawa i atura anu mangkeni kamate etu, 8 melumbu mani kabosena peawa ni Pue Ala i pobago nu Inosa Magali. 9 Mewali ane dandi i Atura ni Musa anu mangkeni tau i kamate, mewangka, manotomo mewangka mpii mani dandi anu mampopewali tau mombesingkalompe ai i Pue Ala. 10 Kamonsona Atura ni Musa ni banimpia raimba mewangka, agaiana ei-ei bariamo mewangka ane rapasimbela ai dandi anu mabou anu melumbu pewangkana. 11 Lawi ane dandiNa anu sampalai ngkida etu, mabose pewangkana, apa mani dandiNa anu mabou anu baria mokasopoa.
12 Mewali, nakenimpesarumakaki i dandi ni Pue Ala anu mabou, etumo mpane baria kami maeka mopadongka Bambari Malompe i kanoto-notona. 13 Baria ria anu kiwunikai. Baria kami ewa i nabi Musa ni banimpia anu mowuni liona ai tolombu. Motolombui ia liona bona toSaraeli baria mangita pewangka i liona anu kasae-saea kalalaua mapaia. 14 Ai ane toSaraeli, tetuko pampekirira. Duduuna ei-ei, ane mobasa sira sura podandi ni Pue Ala anu masae etu, pampekirira tetuko ewa tau anu metolombu, etumo mpane baria sira manginsani tunggaia nu atura ni Pue Ala. Wule tau anu mepotuu si Kerisitu, anu pensani manginsani tunggaiaNa. 15 Duduuna ei-ei, ane mobasa sira Atura ni Musa, ria mani anu motuko pampekirira ewa tau anu metolombu. 16 Agaiana ane mepotuu sira si Pue, anu motuko pampekirira etu ina tewungkesi. 17 Lawi i Pue iamo Inosa Magali. Ane Inosa ni Pue ria si kita, baria ria anu mosomboki kita lau si Pue Ala. 18 Mewali, ope-ope kita anu mepotuu si Pue, bariamo ria tolombu anu mobalungkusi rarata. Agaiana mopatongawamo kita peawa ni Kerisitu. Etumo mpane, kalalaua Nabaliki kita mewali simbela ewa Ia, kasae-saea kalalaua meawa. Peawa etu lako i Inosa Magali ai Inosa Magali etu iamo i Pue.