2
1 Mewali, kupakanotomo i raraku: ineemo sala aku lau mosondaki komi, lawi ei-ei baria kuunde mopakapari rarami, ewa kalauku ni banimpia. 2 Lawi ane dongka aku si komi mpane mapari rarami, aku mbui ina mapari raraku. Mewali imamo anu mopakalene aku? Batena komi ngkida anu kupakaparimo rarami. 3 Etumo puuna mpane kupakatukamo komi sura ni banimpia, bona ane dongka aku luwu, bariamo nipakapari raraku. Lawi kamonsona, komida anu sangangaa mopakatono raraku. Ai kuinsani, ane matono aku, komi mbui ina matono. 4 I tempona kuuki sura etu, mapari kuepe ai karao raraku; tudomo ue mataku. Baria kuuki sura etu bona kupakapari rarami, agaiana kuuki sura etu, bona niinsani adiwa kabosena asiku si komi.I Paulu merade bona toKorintu moampuni sadua rangara anu masala
5 Ane ria sadua tau anu moparia kapari rara, baria wule raraku anu napakapari, agaiana melumbu mani kapari nu rarami, ba basangkia dua tau i olomi. Baria kuunde mangkasara gaga pololitaku si ia. 6 Lawi pesuku nu tau wori i olomi si ia sondomo. 7 Ei-ei sangangaa niampuni ia. Ai nipakaroso ia bona ntena mapari gaga rarana, duduuna bariamo ria pesarumakana. 8 Etumo mpane kuperade bona nipopeitaka ia kamaasimi, bona tongawa mpuu ka nipokaasina. 9 Tunggaiaku mouki sura etu, kupetandaka komi ba nipeulai ope-ope parentaku. 10 Ane niampuni ia, aku mbui moampuni ia. Lawi peundeaku baria wule, bona mosintuwu komi sadua ai sadua, agaiana bona mopakatono mbui rara ni Kerisitu. 11 Kubabei ewa etu, bona ntena ria tempo Datu nu Seta mokuasai kita. Lawi tainsani, Datu nu Seta etu mapande moakalangi tau.
Baria roo-roo rara ni Paulu
12 Kaliliuana poka, ni banimpia i kalambuku lako i kota Epesu, lau aku mobambari Bambari Malompe kono si Kerisitu i kota Troas. Kadongkaku i Troas, i Pue mobungkasikamo aku dala bona mobago aku i se etu. 13 Agaiana nauda ewa etu, baria roo-roo raraku, lawi baria mani aku momberumpa ai i Titu anu ina mopadongka bambari kono si komi. Etumo mpane, metompa aku i pokaku i se etu bona mai aku i Makedonia ei, mangkadelo i Titu.
I Paulu mampololita pobagona mobambari Bambari Malompe
14 Agaiana kuuli maisi kalompena si Pue Ala, lawi i Kerisitu mewali tadulakota anu monini kita i rara pamposusaita penangiNa. Imba ngkida kalauaaki, kipadongka Bambari Malompe i ope-ope tau bona pensani sira manginsani i Pue Ala. Bambari Malompe etu, pensani rapandiri ewa lana wongi anu engaana mangulele kaimba-imbaana. 15-16 Lawi i petotoki ni Pue Ala, kami ewa dupa anu rasuwe, anu raenga nu ope-ope tau. I tau anu mampotuu Bambari Malompe, kami ewa dupa anu mawongi, lawi kiulika sira bambari anu mangkeni sira i katuwu malompe. Agaiana i tau anu mosapuaka Bambari Malompe, kami ewa mau nu tomate anu mawau, lawi tau anu ewa etu ina nasuku sira ni Pue duduuna kasae-saeana.
Ima anu pensani mampopolumako bago ei? Ane lako i rosota saduduata, baria ria. 17 Agaiana kami, baria kami ewa tau anu mangkadelo sira doi lako i popadongkara patudu lako si Pue Ala. Agaiana kipadongka patudu lako si Pue, lako i kabula nu raraki nakenimposintuwuki ai i Kerisitu mangula tunggaia ni Pue Ala anu motudu kami mampopolumako bagoNa. Iamo anu manginsani raraki.