Sura ni Suro Paulu anu karombelana napakatuka jumaa i kota
Korintu
1
1 Sura ei anu lako si aku i Paulu, anu napelisi ni Pue Ala mewali suro ni Yesu Kerisitu mangula peundeaNa, ai lako si Timotiu pokata sampepepotuu. Kipakatu si komi poka-poka anu mepotuu si Pue Ala i kota Korintu, ai i ope-ope jumaa-jumaa anu i propinsi Akaya. 2 Tabea, kisarumaka i Pue Ala Tuamata ai i Pue Yesu Kerisitu mokiraka komi pewati ai kalompe nu katuwu.I Pue Ala mopakaroso rarata i rara nu kapari
3 Tetoiamo i Pue Ala, Tuama nu Pueta i Yesu Kerisitu! Lawi Iamo Tuamata, anu mabose mpii asiNa ai anu mopakaroso liliu rarata. 4 Ia anu mopakaroso raraki, i rara nu pangka-pangkana kapari anu morumpa kami, duduuna kibuku mbui mopakaroso rara nu rangaki, anu narumpa nu pangka-pangkana kapari, ai roso anu kidoko lako si Pue Ala. 5 Pantodisa anu naepeka ni Kerisitu, etu mbui anu kitodisa. Kalalaua maisi pantodisa anu kiepeka, kalalaua maisi mbui karoso anu kisumba lako si Kerisitu. 6 Mewali, ane narumpa kami nu kapari, lako i kapariki etu ina mopakaroso rarami ai bona mansumba komi katesorema. Lawi ane raraki rapakaroso, komi mbui mewali maroso bona tetida komi i rara nu kapari ewa anu kisumba. 7 Etumo mpane, baria bata-bata raraki kono si komi. Kipotuu kaina tetidami i rara nu kapari, lawi pantodisami simbela ai pantodisa anu kiepeka, ai kiinsani i Pue Ala ina mopakaroso rarami simbela ai kami.
8 Bona niinsani poka, kapari anu kitodisa ni banimpia i Propinsi Asia, baria kibuku kitodisa. Etumo mpane mapari mpii raraki, bariamo ria pesarumakaki kaina tuwuki mani. 9 Ni tempo etu kiepeka, ewa tau anu rasuku mamatemo. Nakeningka narumpaki nu kapari etu, baria kami mesarumaka i rosoki saduduaki, agaiana wule mesarumaka kami si Pue Ala anu mopatuwu tomate. 10 Iamo anu mopawia kami lako i kapari anu mewulungati etu, mpane kami tepawia lako i kamate. Ai kipotuu, Ia anu ina mopawia kami lako i sinangka kapari, malompe anu morumpa kami ei-ei ba i eo anu ina mai, lawi si Iamo kami mesarumaka. 11 Kipotuu i rara pampekakaekami kami, i Pue Ala batena motulungi kami. Lawi nipekakaeka liliu kami, etumo mpane mawori tau ina manguli maisi kalompena si Pue Ala.
I Paulu mobaliki tunggaiana mosondaki toKorintu
12 Matono raraki poka, lawi raraki mamponotoka kami kamanotona babeiaki i dunia ei, pelumbunamo babeiaki si komi. I sinangka-nangkana anu kibabei, kibabeimo ai kabula-bula nu raraki ai i kanoto-notona. Apa anu kibabei etu, baria lako i kamatopa nu manusia, agaiana lako i roso anu lako si Pue Ala. 13-14 Isi nu suraki anu niinsani lempona ngkida, baria ria anu kiwunikai. Agaiana ei-ei baria mani niinsani mpii tunggaiaki. Kusarumaka bona komi ope-ope ina manginsani mpii tunggaiaki, bona i tempona dongka mpesola Pueta i Yesu Kerisitu, ina matono rarami nakeningka kamina, ai kami mbui ina matono raraki nakeningka komina.
15 Mewali, nakeningka kupotuuna kaina matonona rarami nakeningka kamina, etumo mpane ria tunggaiaku ni banimpia mosondaki komi rombela, bona rombela komi mansumba pewati. 16 Mangula tunggaiaku anu mpolinguruna etu, kekusondaki komi i polumakoku lau i tana Makedonia, ai ane mesola aku lako i tana Makedonia, ina mensopi mbui aku si komi, bona pensani aku nitulungi i polumakoku lau i tana Yudea. 17 Agaiana tunggaiaku etu tebaliki, mewali: ba niuli baria mamonso dandiku? Ba niuli: kubabei tunggaiaku mangula peundeaku saduduaku, roomo kuuli, “io,” kubaliki mbuimo kuuli, “baria!” 18 Baria ewa etu! I rara sanga ni Pue Ala anu mopabukei liliu dandiNa: Baria kiuli “io” ane tunggaiaki “baria.” 19 Lawi aku i Paulu, i Silas ai i Timotiu, mopadongkaka komi bambari kono si Yesu Kerisitu, Ana ni Pue Ala. I Yesu Kerisitu, baria ria katebalikina tunggaiaNa si kita. Baria sambela Nauli “io” ane tunggaiaNa “baria.” Agaiana ane Naulimo “io” bariamo ina tebaliki. 20 Lawi mampoliungi i Pue Yesu, i Pue Ala mangulimo “io” i ope-ope dandiNa. Etumo puuna kita manguli “Amin” si Pue Ala nakeningka i Kerisituna. Ope-ope etu kibabei bona i Pue Ala ratoia. 21 I Pue Ala saduduaNa anu mopakaroso raraki ai rarami, bona ope-ope kita mosintuwu ai Kerisitu. Napelisimo kita, 22 ai Napekatandaimo kita mewali tauNa. Ai Nakiraka mbui kita Inosa Magali, mewali pempatoroata, kaina Napabukeina dandiNa si kita.
23 Poka baria aku modongko, i Pue Ala sabiku. Ia anu manginsani isi nu raraku. Baria aku lau i Korintu i tempo etu, lawi baria kuunde mopakadua rarami ai pololitaku. 24 Lempona baria kiunde mopaso komi i panguliki adiwa ka nipopolumakona pepotuumi. Agaiana kiunde mobago simbela ai komi duduuna mabuke kamatonomi, lawi nakenimpepotuumi saduduami maroso komi i pepotuumi.