I Paulu mosuweki rara nu toKorintu bona mogulu sira doi ewa anu rababei nu toMakedonia
8
1 Kaliliuana poka, kipenoka bona niinsani kabosena asi ni Pue i jumaa anu ria i se ei, i propinsi Makedonia. 2 Naudapae mansumba sira pekelo anu mantimi mpii, agaiana i rara ngkarakelora etu, matono sira. Ai nauda mesiasi mpuu katuwura, mabose asira mogulu doi rapopotulungira rangara. 3 Kuitamo adiwa kalompe nu rarara mokiraka doi. Mokiraka sira doi etu i sukana pebukuara, ba melumbu mbui lako i pebukuara nakeningkabula nu rarara. 4 Lako i kabula nu rarara, raperadera mpii mbui si kami, bona pensani sira motulungi pokata sampepepotuu i kota Yerusale.* 5 Ai kabula nu rarara melumbu lako i apa anu kisarumaka. Baria wule doi anu rakirara, agaiana mpolinguruna, mosusu mbui sira wotora si Pue Ala, ai mengkoru mbui sira si kami mangula peundea ni Pue Ala.6 Nakeningka i Tituna anu mampepuu bago etu, etumo mpane kitudu mpesola ia lau si komi, bona mopaliliu bago anu malompe etu, iamo modurei komi mogulu doi petulungimi i pokami sampepotuumi anu mesiasi katuwura.
7 Poka-poka, i pangka-pangkana komimo anu tepaiwongko: tepaiwongko komi i pepotuumi, i kapandemi mololita, i kapandemi mepatudu, i katesuweki nu rarami motulungi kami, ai i kabosena kamaasimi si kami. Etumo mpane poka, kuperade sangangaa tepaiwongko mbui komi i rara nu pobagomi anu malompe etu, iamo motulungi rangami anu mesiasi katuwura.
8 Anu kuulika komi etu, baria ewa parenta. Agaiana bona niinsani adiwa kabosena asi nu toMakedonia mokiraka doi petulungira i rangara. Lako i se etu, kuunde mbui manginsani dongka imba kabosena kamaasimi, 9 lawi niinsani mpuu kabosena asi nu Pueta i Yesu Kerisitu si kita: Pebuku Ia, agaiana mengkameasiasi Ia, bona mewali kita pebuku i petotoki ni Pue Ala.
10 Mewali, anu kutunggai si komi poka: aginamo nipasopo bagomi anu nipepuumimo ni pae naliu, lawi komimo anu mpolinguruna motunggai mogulu doi anu pensani rapakatu i rangami anu ria i rara nu kabilala. 11 Mewali mangula tunggaiami anu nipenoka nibabei ni banimpia, sangangaa nipobago liliu duduuna sopo. Aginamo mokira komi mangula kabula nu rarami ai i sukana pesauruami sadua-sadua. 12 Lawi i Pue Ala naunde modoko pokirami etu ane lako i kabula nu rarami mokira, ai anu sintoto ai pebukuami baria lako i apa anu baria nibuku. 13 Lawi baria tunggaiaku mopakapari katuwumi mpane mampoporasi tau ntanina. Agaiana bona simbela-mbela kita baria ria kamakurata. 14 Ei-ei, nakenimpelabina pesumbaami, sangangaa mopasondoi komi kamakura nu pokata sampepepotuuta i Yerusale. Ai ane rapana ria mbui kamakurami luwu, mpane i tempo etu ria pelabia nu pesumbaara, sira mbui sangangaa mopasondoi apa kamakurami etu. Ane ewa etu anu nibabei, baria komi ina mansumba kamakura. 15 Lawi ria teuki i rara nu Sura Ngkora Magali anu manguli:
“Tau anu maisi poguluna roti manna,
baria ina melabi si ia.
Ai tau anu saudi ngkida poguluna roti manna,
baria mbui ia mansumba kamakura.” (Pensuwu nu toSaraeli 16:18)
I Paulu motudu i Titu ai rodua rangana lau i Korintu
16 Maruminsi panguliku maisi kalompena si Pue Ala, lawi Ia anu mampopokale rara ni Titu, mpane tesuweki rarana motulungi komi, simbela ai aku. 17 Lawi i Titu baria wule mopabukei pamperadeki, agaiana lako i rarana mpuu napenoka lau motulungi komi. 18 Kitudu mbui sadua pokata lau si komi simbela-mbela ai i Titu. Ratoia ia i ope-ope jumaa nakenimpobagona mobambari Bambari Malompe. 19 Tau etu rapelisi mbui ia nu ope-ope jumaa, bona mamporangai kami i polumakoki lau mangkeni doi petulungimi i pokata sampepepotuuta i Yerusale, anu ria i rara nu kamakurara. Kusarumaka bona tempoki lau mosondaki komi luwu, sanga ni Pue ratoia, ai bona tongawa kabula nu raraki motulungi pokata sampepepotuuta.
20 Tunggaiaki motudu pokata ei lau simbela-mbela ai i Titu, bona ntena ria anu morai kami i pogulumi doi petulungimi anu maisi. 21 Mpane kibabei ewa etu, bona tongawa kamanotona babeiaki. Baria wule manoto i petotoki ni Pue, agaiana manoto mbui i petotoki nu tau.
22 Ria mbui sadua tau, anu kitudu simbela-mbela ai sira lau si komi. Kiinsani kamadotana medurei i rara bago ni Pue, lawi kisabikimo babeiana i rara nu pangka-pangkana bago. Ai ei-ei, lako i rarana mpuu motulungi komi, lawi nainsani tunggaiami motulungi pokata sampepepotuuta. 23 Ane ria sira tau anu mampekune kono si Titu i Korintu, niuli ka iana rangaku sampopobagoku anu kutudu lau motulungi komi. Ai ane ria mbui anu mampekune kono i rangana anu rodua, niuli ka sirana tau anu ratudu nu jumaa i Makedonia ei lau motulungi komi i pobagomi. Lako i pobago nu tau anu rodua aretu sanga ni Kerisitu ratoia. 24 Mewali, kuperade bona nidoko lompe sira, ai nipopeitaka sira asimi bona ope-ope jumaa manginsani kamaasimi si sira, ai tongawa apa anu kipomabose kono si komi.