Pogulu doi anu rapopotulungi pokata sampepepotuu i Yerusale
9
1 Kamonsona, bariamo paraluu kuukika komi sura kono i petulungimi anu tongona niguluka ope-ope pokata sampepepotuuta i kota Yerusale. 2 Kuinsani niunde mpii metulungi, ai kutoia amimo komi i jumaa-jumaa i Makedonia. Kuulika sira, “Ane pokata sampepepotuu anu meari sira i tana Akaya,a mepuu ni pae naliumo, masilolongamo sira motulungi pokata sampepepotuuta anu mesiasi katuwura.” Mewali, awetu raepe nu toMakedonia, adiwa kabose nu rarami mokiraka petulungimi etu, tesuweki mbui rarara. Etumo mpane mawori sira anu mokiraka petulungira. 3 Mewali ei-ei, kutudu i Titu ai rodua rangana moilodo lau si komi, bona apa anu kitoiaka komi i toMakedonia, baria ina nauli nu tau dongkoku ngkida. Etumo mpane sangangaa masilolonga komi, lawi roomo kupadongka si sira kateguluna amimo doi petulungimi. 4 Lawi anu kupokaeka, ane ria sira toMakedonia anu mamporangai aku lau si komi, mpane kisumba baria mani matimama petulungimi, ina maruminsi kaeaki, lawi roomo komi kutoia i liora. Ai komi, ina maea mbui komi. 5 Etumo mpane, kutudu i Titu ai rodua rangana moilodo bona motulungi komi mopasilolonga ami petulungimi anu aminamo nidandi. Tunggaiaku mobabei ewa etu, bona ane dongka aku luwu si komi, petulungimi etu masilolongamo. Ai petulungimi anu nikiraka etu, mopatongawa kabula nu rarami, baria nakeningka rapasomi.Ane motulungi kita rangata, mansumba kita pewati, ai i Pue Ala rapomabose
6 Nipairara pololitaku ei: Ima anu saudi ngkida pantudana, saudi ngkida mbui wuana anu napupu. Ima anu maisi pantudana, maisi mbui wuana anu napupu. 7 Mewali ope-ope tau sangangaa mokira lako i kabula nu rarana, inee nakeningka rapasona. Lawi i Pue Ala mampokaasi tau, anu mokiraka lako i kabula nu rarana. 8 Inee malipa rarami, i Pue Ala makuasa mokiraka komi sinangka pewati, mopabukei apa anu niparaluu, duduuna bariamo ria kamakurami bona nibuku mampopolumako sinangka bago motulungi rangami. 9 Lawi ria teuki i rara nu Sura Ngkora Magali anu manguli:
“I Pue Ala motibo-tiboka pewatiNa i tau anu mesiasi katuwura.
Kamanoto nu raraNa baria mokasopoa.” (Dulua Petoia 112:9)
10 I Pue Ala mopasilolongaka tinuda i toposawu, bona ria tinudara ai moparia pangkonita. I Pue Ala mbui anu motambai apa anu ria si komi, bona tetambai mbui kamanoto nu rarami i petotoki ni Pue Ala i potulungimi tau ntanina. 11 Nakenimpewati ni Pue Ala si komi i sinangka-nangkana, nibuku liliu mokira lako i kabula nu rarami. Ai nakenimpetulungimi anu kitibo-tibokamo i tau, mampopewali mawori tau ina manguli maisi kalompena si Pue Ala. 12 Babeiami anu malompe ei, baria wule ina mopabukei kamakura nu pokata sampepepotuu i Yerusale ngkida. Agaiana mampopewali mbui mawori tau ina manguli maisi kalompena si Pue Ala. 13 Ai nakenimpobabeimi ewa etu, mawori topepotuu i Yerusale ina motoia i Pue Ala, lawi raitara katetida nu pepotuumi i Bambari Malompe kono si Kerisitu anu nipotuu etu. Ai nakeningkabula nu rarami i toYerusale ai i tau ntanina, nitibo-tiboka sira apa anu ria si komi, etumo mpane motoia mbui sira i Pue Ala. 14 Ane mekakae sira, rapekakaekara mbui komi lako i kabula nu rarara, lawi mabose mpuu asi ni Pue Ala si komi.
15 Mewali nakenimpewati ni Pue Ala i sinangka-nangkana si kita, tauli maisi kalompena si Pue Ala!