I Paulu manguli kamanoto nu pobagona
10
1 Aku i Paulu, kuinsanimo, ria sira tau i olomi anu manguli, “Ane i Paulu karao lako si kita, pebai ia i rara nu surana, agaiana ane mombelio kita, maeka ia.” Mewali, nakenimpengkaiwoiku ai kamaalusuku ewa rara ni Kerisitu, 2 kuperade bona ane dongka aku luwu si komi, inee nipari-pari bona kupopeitaka kapebaiku si komi. Lawi pebai aku mampopeitaka kapebaiku i tau anu manguli babeiaki ewa babeia nu tau anu mangula peundea nu manusia. 3 Kalawiana kami manusia mani, agaiana baria kami mopari-pari mampeulai kapande nu manusia. 4 Kuasa-kuasa anu kipopobundu i rara nu pobagoki, baria kuasa lako i manusia, agaiana kuasa lako si Pue Alada. Ai kuasa etu kipake mogero kuasa nu iwaliki ai kipake mbui monangi karoso kapande nu manusia, anu moewa pepatudu kono si Pue Ala, 5 ai anu mosomboki peundea nu tau anu mampenoka manginsani i Pue Ala. Nakeningka nakirakaki ni Pue Ala roso etu, kinangi karoso kapande nu manusia, bona pampekirira mampeulai peundea ni Kerisitu. 6 Malompe ane tetida liliu komi si Kerisitu, lawi masilolongamo kami mosuku tau anu baria tetida si Ia.7 Nipekiri lompe-lompe! Ane ria tau mopakanoto ka iana topeula ni Kerisitu, sangangaa napairara liliu ai napangaku mbui ka kamina mbui topeula ni Kerisitu. 8 Ba niuli mampemabose aku? Baria! Baria aku mampemabose, agaiana baria aku maea mopatongawa kuasaku mopatudu komi. Lawi kamakuasa anu rakiraka kami etu, baria kuasa anu megero, agaiana kuasa anu mopakaroso pepotuumida. 9 Mewali, baria kuunde ane ria komi anu manguli i rarami, kupakaeka ngkida komi ai isi nu suraku anu mampololita kanoto-notona ngkida. 10 Lawi ria sira tau i olomi anu mokaisii aku lolita, raulira, “Ane i surana, apa anu napololita makuasa ai kanoto-notona ngkida anu nauli, agaiana ane tempona simbela-mbela ai kita, malede ia ai baria tainsani kaapana nauli.” 11 Mewali, peundeaku tau anu ewa etu pampekirira, ane dongka kami luwu si sira, ina manoto i pampekirira kamonsona pangkeniakaki sintoto ai apa anu kiukimo i suraki.
12 Baria kami madota mangula babeia nu tau, anu mengkapande gaga sira i olomi. Baria kami simbela ai sira. Tau aretu motoia sira wotora saduduara, raulira, “Manoto mpuu babeiata.” Molentano maruminsi kadoiora, lawi pololitara mangula pampekirira saduduara ngkida. 13 Agaiana kami baria ewa babeiara etu, lawi ane motoia kami bagoki, baria melumbu lako i apa anu kipobago. Batena ngkida tetida kami i bago anu napakanotomo ni Pue Ala si kami, ai komi mbui tepesua i bago anu kipobago ei. 14 Mewali, tempoki mangoka mobambari Bambari Malompe kono si Kerisitu, baria kami moliungi tompo nu pobagoaki. 15 Lawi baria kami motoia wotoki ai bago anu napobago nu tau ntanina, agaiana i rara mpobagoki batena ria kami i rara popakanoto ni Pue. Ai pesarumakaki kalalaua maroso pepotuumi si Kerisitu, bona i rara pobagoki i olomi kalalaua tetambai tau anu mepotuu sintoto ai peundea ni Pue. 16 Mewali nakeningkaewa etuna, pensani mbui kami mobambari Bambari Malompe i pearia ntanina, ai baria kami motoia wotoki ai bago anu napobago nu tau ntanina, i pearia ntanina. 17 Ria teuki i rara nu Sura Ngkora Magali ewa ei:
“Ima anu naunde mengkaiwongko,
sangangaa mengkaiwongko ia, i apa anu nababeimo ni Pue.” (Yeremia 9:24)
18 Lawi tau anu tetoia, iamo tau anu natoia ni Pue, baria tau anu motoia wotona saduduana.