Mainga-inga komi i suro-suro anu mangkeni patudu anu masala
11
1 Mewali poka, kuperade bona manoa komi mampetingai pololitaku, naudapae pololitaku ewa pololita nu todoio. Lawi kalawiana manoa mani komi mampetingai. 2 Mosiri aku si komi, agaiana posiriku ei sintoto ai peundea ni Pue Ala. Lawi akumo anu mpolinguruna mangkeni komi mepotuu si Kerisitu. Ai pensani komi rapandiri ewa anantowawine anu rapepamboliimo ai sadua tomoane, iamo i Kerisitu. 3 Agaiana mandanga raraku, inee mpuupae raakalangi mbuimo komi, mpane nasumba luwu bariamo komi tetida si Kerisitu, simbela ewa i Hewa anu naakalangimo nu ule. 4 Lawi pampekiriku ai pampeitaku ane ria luwu tau anu mepatudu mbui kono si Yesu niunde mani modoko ai mampetingai sira, agaiana patudura kono si Yesu etu mosisala ai apa anu kipatudukamo komi. Mewali niunde manipae modoko inosa ntanina anu karao posisalana lako i Inosa Magali ai Bambari Malompe anu nidokomo lako si kami? 5 Mangula pampekiriku, kamonsona baria aku tepaiwoi lako i tau anu manguli ka sirana suro anu melumbu kapandera etu. 6 Lawi nauda baria gaga kuinsani mololita, agaiana kuinsani mpii patudu anu mamonso. Ai patudu etu kipatongawamo si komi i sinangka-nangkana i rara nu babeiaki i olomi.I Paulu mopakanoto apa puuna mpane baria ia merade sarona
7 I tempoku mobambari Bambari Malompe si komi ni banimpia, mogalo saudi baria kuperade bona nisaro aku. Nakenimpengkaiwoiku, katuwumi tepaiwongko. Mewali, masalapae aku, ane baria aku merade saroku si komi? 8 Ni banimpia tempoku mobago i kotami, jumaa-jumaa anu ria sira i pearia ntanina anu mopakatuka aku doi. Pensani rauli: aku mopakarugi sira, lawi doi anu kupake i rara nu pobagoku mobambari Bambari Malompe si komi, sira anu mokiraka aku. 9 Ane ni tempo etu ria kamakuraku, baria aku merade si komi. Lawi ria sira pokata sampepepotuu anu dongka lako i Makedonia mai, mangkenika aku doi mopasondoi apa anu kuparaluu. Baria aku merade apa-apa si komi, baria komi kupakapari. Babeiaku etu, batena kubabei liliu 10 i sumalele tana Akaya. Anu kuuli ei mamonso mpuu, ewa kamanotona pololita ni Kerisitu. Etumo anu kupomabose i raraku, baria ria sadua tau anu pensani mosomboki. 11 Mewali, mangkiada mpane mololita aku ewa etu? Inee nipekiri baria komi kupokaasi. I Pue Ala manginsani kamaasi nu raraku si komi.
12 Apa anu kubabei etu, baria ina kupawia. Bona suro-suro ntanina etu, baria ria dalara mampemabose, mpane manguli sira simbela pobagora ewa kami. 13 Tau anu ewa etu, iamo suro-suro anu mepakanawu. Moakalangi sira tau raulira sira suro ni Kerisitu, molentano dongkorada! 14 Baria tapotingkara babeiara ewa etu, lawi ewa etu mbui babeia Datu nu Seta anu mobaliki wotona mewali ewa sadua malaeka anu mewangka. 15 Mewali etumo mpane, baria mbui tapotingkara ane topobago nu Datu nu Seta manguli, ka sirana topobago ni Pue Ala. Agaiana kasopoana, ina mansumba sira surungina anu sintoto ai kadaara.
I Paulu mampololita pantodisana mobago si Pue
16 Mewali, kusolaki kuuli, inee ria anu manguli aku ei tau anu madoio, agaiana ane kalawiana ria anu moimba aku madoio, kuperade bona nipaliu aku tau anu madoio ei mengkaiwongko mbui aku saudi i rara mpololitaku. 17 Ei-ei ina kupololita apa anu kupomabose i raraku. Agaiana baria i Pue anu motudu aku mololita ewa etu. Ei-ei kalawiana ina mololita aku ewa pololita nu todoio. 18 Kalawiana mawori tau motoia sira wotora saduduara, ai mampololita bagora anu rababeira lako i karoso nu wotora. Mewali ei-ei ina mengkaiwongko mbui aku i rara mpololitaku. 19 Lawi lensena, nipokatono mani mampetingai patudu nu suro-suro ntanina anu madoio aretu anu mengkaiwongko i rara mpololitara, lawi pampekirimi mapande komi! 20 Agaiana mangkiada! Ane ria sira tau anu mampobatua komi, nipogeaka ngkida sira. Ane ria sira anu mopakanawu komi ai mobagiu komi, nipogeaka mbui sira. Ane ria sira anu mampemabose mpane mosopo komi, nitodisa ngkida. 21 Inee mpuupae i rara nu pekirimi niuli, baria kubuku mobabei apa anu nababei nu suro-suro ntanina anu mepakanawu aretu, lawi nipekiri maroso mani sira mpane aku, baria!
Agaiana apa anu napomabose nu suro-suro ntanina etu i rara mpololitara, pebai mbui aku mampomabose apa anu rapomabosera etu. (Nikaendo mololita aku ewa todoio.) 22 Ane rauli nu suro aretu, toIbrani sira, aku mbui toIbrani aku! Ane raulira pemulea nu toSaraeli sira, aku mbui pemulea nu toSaraeli! Ane raulira pemulea ni Burahima sira, ewa etu mbui aku. 23 Ane raulira, ka sirana topobago ni Kerisitu, apa mani aku! (Nikaendo, pololitaku ei ewa tau anu bariamo manoto pekirina.) Maruminsi mani pobagoku mpane sira. Lawi basangkia mbelamo aku ratarunggu! Maruminsi karapopesiasiku! Mawori mbela aku ina mamate. 24 Lima mbelamo aku rapopesiasi nu toYahudi, i rarana lima mbela aku rapopesiasira etu, rasepea aku tolu mpulu sasio mbela. 25 Tolu mbela aku rasepe nu toRoma, ai sambela aku kemamate rawatuira. I rarana basangkia mbela aku mensawi i kapala tasi, tolu ogu kapala tasi, magero narumpa nu balumba anu mabose, sambela lako i se etu motitinanto aku i tasi, i rarana rompulu iba jaa. 26 I rara nu polumakoku, mawori mbelamo aku morumpa kapari: Narumpa aku nu ue maowo, mansumba aku kapari i toperampaki, rapopesiasi aku nu toYahudi ai tau anu baria sira toYahudi, mansumba aku kapari i rara nu kota ai i raoa nu kota, mansumba aku kapari i tasi, mansumba aku kapari lako i tau anu manguli ka sirana pokaku sampepepotuuku, agaiana kamonsona baria! 27 Mantimi bagoku, i rara mpobagoku etu: Mawori mbela aku baria maleta, baria mangkoni, baria manginu, mawori mbela mbui aku motaha kaoroku nakeningkabariana ria pangkoniku, ai malengi aku nakeningkabariana ria pesampiku anu makumba. 28 I raoa lako i sinangkana aretu, eo-eona karao raraku, lawi mampekiri liliu aku adiwa katuwu nu jumaa-jumaa sira. 29 Ane ria sira pokaku sampepepotuuku anu malede, malede mbui aku. Ane ria sira anu rapakanawu i rara nu dosa, marumpu aku i tau anu mepakanawu etu.
30 Mewali, ane sangangaa mengkaiwongko aku i rara mpololitaku, aginamo mengkaiwongko aku i rara mpololitaku, mampololita kamaledeku. 31 Ope-ope anu kuuli ni mpongone mamonso, baria aku modongko. I Pue Ala, Tuama ni Pue Yesu, iamo sabiku! Tatoiamo sangaNa duduuna i kasae-saeana! 32 I tempoku ria i kota Damsik, gubernur anu meparenta anu naongko ni Datu Aretas. Motudu surudadona mokampai ope-ope boboka bente i kota etu bona tesoko aku. 33 Agaiana ria anu motulungi aku. Raunsa aku i rara nu karanji, mpane raulu aku lako i pelogaa i bente etu, etumo mpane baria aku rasumba rasokora.