2 Korintu 12

I Paulu mopadongka pepopeitaka lako si Pue

1 Kalawiana, baria ria bunduna mampomabose kita wotota saduduata. Agaiana nauda ewa etu, kuunde mbui mampololita apa anu napopeitaka ai anu napatongawa ni Pue si aku. 2 Sampulu iba mpae naliu, ria sadua tau anu mepotuu si Kerisitu, teongko lau i pearia anu mawane mpii i suruga. (Baria kuinsani ba monso-monso mpuu wotona anu teongko, ba wule pepopeitaka ngkida. I Pue Ala ngkida anu manginsani.) 3 Tau etu, kuinsani mboto, (Kusolaki kuuli ba monso-monso mpuu wotona anu teongko, ba wule pepopeitaka ngkida. Baria kuinsani, i Pue Ala ngkida anu manginsani.) 4 Tau anu teongko lau i bonde Paradesi etu, naepe rapololita apa anu baria rabuku nu manusia rapololitara, ai baria mpuu rapaliu manusia mampololita. 5 Kono i tau etumo anu kupenoka kupomabose, baria kono i wotoku saduduaku. Kono i wotoku, anu kupololita wule apa-apa anu mopatongawa kamaledeku ngkida, etumo anu kupomabose. 6 Ane rapana kuunde mbui mampomabose wotoku saduduaku, baria kuunde mampololita dongko, lawi apa anu ina kupololita kamonso-monsona ngkida. Agaiana kurempeki raraku, bona ntena ria tau anu manguli mampomabose aku wotoku saduduaku melumbu lako i apa anu raitara i wotoku, baria sintoto ai apa anu raepera kupololita ai anu raitara kubabei.

7 Agaiana nakenimpepopeitaka anu Napatongawa ni Pue Ala si aku ntena aku mampemabose, etumo mpane Napoposaki aku. Saki etu, ewa dui anu natosuka Datu nu Seta i isiku, bona mampopesiasi aku. 8 Tolu mbelamo aku mekakae si Pue, bona maosa aku lako i saki etu. 9 Agaiana nasonoi ni Pue, “PewatiKu anu nudokomo mopabukei apa anu nuparaluu. Lawi i tempomu malede, i tempo etumo tongawa kuasaKu.” 10 Etumo mpane, i pobagoku mewali tudua ni Kerisitu kupeguruimo mampokatono i tempoku narumpa nu kamalede, rakaisii lolita, rapopesiasi, ba mansumba kapari. Lawi i tempo etumo, nakenimpetulungi ni Pue si aku, maroso aku.

I Paulu mamposusa rara toKorintu

11 Mamonso ewa todoio aku, agaiana komi anu mampopewali aku ewa todoio, lawi kamonsona komida anu sangangaa motoia aku. Naudapae aku malede, baria aku tepaiwoi lako i suro ntanina aretu. 12 I tempoku ria i olomi, mobabei aku tanda kuasa anu metingkarai nakeningkaroso anu kudoko lako si Pue Ala. Mobago liliu aku i rara kasabara. Tanda-tanda anu metingkarai etu mopatongawa ka akuna suro ni Pue Yesu. 13 Mobago aku i olomi ai i jumaa-jumaa anu ntanina baria komi kupopontani-ntani. Posisalana komi ai sira sampangka ngkida, iamo kabariana kuperade saroku si komi. Ane etu niimba masala, merade ampu aku!

14 Nipetingai lompe! Ina lau aku mosondaki komi i katolu mbelana. Ai baria aku ina merade apa-apa si komi. Anu kukadelo, baria anu-anumi, agaiana raramida bona nipokaasi aku. Lawi baria anakoi anu mopangkadeloka pangkoni nu tomanara; agaiana tomanada anu mopangkadeloka pangkoni nu anara. 15 Mewali, matono aku mokiraka sinangkana anu ria si aku duduuna wotoku saduduaku motulungi komi. Ane ewa etu kabosena asiku si komi, sintotopae ane asimi makura mani si aku?

16 Niinsani poka baria komi sambela kupakapari. Agaiana ria sira tau anu mokaisii lolita si aku, raulira kuakalangi komi, bona mansumba aku rasi lako si komi nakeningka kuakalangimi. 17 Mewali, riapae sira tau anu kutudu lau moakalangi komi bona mansumba aku rasi? Baria ria! 18 Ni banimpia kutudu i Titu bona lau mosondaki komi, ai ria mbui pokata anu kutudu mamporangai ia. Ba niakalangi komi ni Titu ni tempo etu? Niinsani mboto poka, i Titu ai aku sampepekiri ngkida kami, ai simbela pangkeniakaki.

19 Inee nipenoka, kiuki ope-ope ei bona manguli kami notoki ngkida. Masala pampekirimi! Agaiana nainsani ni Pue Ala anu kiuli etu, sintoto ai peundea ni Kerisitu. Ai ope-ope anu kipadongka ai kibabei, bona mopakaroso pepotuumi. 20 Lawi anu kupondanga rara, ane lau komi kusondaki kusumba komi baria ewa anu kupenoka ai baria ewa anu nisarumaka si aku. Mandanga raraku ane ria mani komi anu mosisala ai mombekasinai, mombekarumpui sadua ai sadua, mengkaiwongko, mombekaisii lolita, mombepodongkoka, ai ria komi anu mampemabose, ai anu mepakaguneo. 21 Ai anu kupondanga rara mbui i kadongkaku si komi luwu, ane rapana ria mani tau i olomi anu tuwu baria sintoto mewali topeula ni Kerisitu, etu simbela ewa napakaea aku ni Pue Ala. Ai ina mawiora raraku ane mawori tau i olomi baria mani sira menonso lako i babeiara anu madaa, babeia anu merikati, pebualosira, ai anu baria sintoto rababei.