Patudu ni Paulu anu kasopoana
13
1 Masilolongamo aku ina lau mosondaki komi, i katolu mbelana. Nikaendo apa anu teuki i rara nu Sura Ngkora Magali anu manguli, “Ane ria sadua tau mangkeni kara-karana i topobotusi kara-kara, sangangaa ria rodua ba tolu dua tau anu raposabi anu mangita mata pewalina kara-kara etu, lako manotoda karabotusina kara-kara etu.”* 2 Tongoku simbela-mbela ai komi i karombelana naliu, kupopaingaakamo sira tau anu mobabei dosa, bona ineemo mobabei dosa. Mewali ei-ei, naudapae aku karao lako si komi, kusolaki mbui pololitaku si komi tau anu madosa ai i ope-ope tau ntanina. Ane dongka aku luwu ai ane baria mani sira mampenonsoi babeiara, baria ria mogalo sadua sira anu ina tepawia lako i pesuku. 3 Ria i olomi anu mamperade bona kupopeitaka komi tanda kuasa anu mopakanoto ka i Kerisituna anu mololita mampoliungi aku. Nipegia ngkimode! Ane dongka aku luwu si komi, ina niita mpuu kuasa anu nakiraka aku ni Kerisitu! I Kerisitu baria malede agaiana marosoda kuasaNa si komi. 4 I tempo ni Kerisitu rapaku i kau anu rapopombesape, malede Ia ewa manusia duduuna mamate. Agaiana nakeningkamakuasa ni Pue Ala, tuwu mpesolamo Ia. Kami suroNa malede mbui kami ewa i Kerisitu, agaiana nakenimposintuwuki ai Kerisitu, ane dongka kami luwu, ina niepeka kuasa ni Pue Ala anu nakiraka kami.5 Poka-poka, kono i pepotuumi si Kerisitu, nipepekiri lompe-lompe sala i rarami! Manotomo ka niinsanina i Kerisitu ria i rarami. Agaiana ane kalawiana baria monso-monso pepotuumi si Kerisitu, batena niinsani mbui, kabariana ria i Kerisitu i rarami. 6 Kusarumaka poka, roomo komi mampepekiri kono i pepotuumi si Kerisitu, ina niinsani mbui katetidaki i rara nu pepotuuki si Kerisitu. 7 Mekakae kami si Pue Ala bona Natulungi komi, ntena komi mobabei anu madaa, agaiana bona mobabei komi apa anu sintoto ai peundea ni Pue Ala, baria bona mampopetudoka kami kamanotoki. Mewali naudapae ria mani sira tau anu mosapuaka kuasaki, baria mangkia asala mobabei komi apa anu malompe. 8 Lawi baria kami pebai mobabei ba apa, moewa patudu anu mamonso, agaiana sangangaa kiulada patudu etu. 9 Ane maroso pepotuumi, matono kami nauda tongoki malede. Mekakae kami bona kalalaua manoto rarami i petotoki ni Pue. 10 Etumo mpane, kuukika komi sura ei i tempoku mani karao lako si komi, bona ane dongka aku luwu, bariamo komi kusuku ai kuasa anu nakiraka aku ni Pue, anu mopakaroso pepotuumi baria anu mepakanawu.
Tabea
11 Kasopoana poka, sangangaa matono-tono komi. Nipakaroso peulami si Pue! Nipeulai patuduku! Sangangaa sampepekiri komi ai tuwu komi mosintuwu. I Pue Ala puu nu asi, ai lompe nu katuwu, anu mamporangai komi.
12 Ane momberumpa komi, lako i rarami mpiida mombetabe-tabe. Ope-ope pokata sampepepotuu anu mewalimo tau ni Pue Ala i se ei, mopakatu mbui sira tabeara si komi.
13 Kisarumaka i Pue Yesu Kerisitu mowati komi, i Pue Ala mampokaasi komi, ai Inosa Magali mamporangai komi ope-ope.