Petulungi i poka sampepepotuu
16
1 Kaliliuana poka-poka, ina mololita aku kono i doi anu nigulu bona motulungi pokata sampepotuuta anu mesiasi katuwura i kota Yerusale.* Kuperade bona nibabei etu, mangula apa anu kuposawaaka sira jumaa-jumaa anu ria i tana Galatia. 2 Inee nipegia kadongkaku, lako nipaterusuda apa anu ina nikiraka sira. Agaiana minggu-mingguna, nipatani sala doi etu i tombimi sintoto ai pesumbaami sadua-sadua, ai niboli lompe doi etu duduuna dongka mpesola aku i se etu. 3 Ane dongka aku luwu, nipelisi basangkia rangami anu nipotuu. Ina kutudu sira lau i Yerusale mangkeni doi petulungimi, ai sura pepopainsani ka kutudura. 4 Ai ane raparaluu mbui aku lau simbela-mbela ai sira, lau mbui aku.I Paulu motunggai lau i Korintu
5 Ria mboto tunggaiaku mosondaki komi roo aku mosondaki toMakedonia, lawi kupenoka lau nsalaa si sira. 6 Peundeaku bona masae aku saudi simbela-mbela ai komi. Malompe ane meari aku si komi duduuna liumo tempo malengi, roo awetu pensani aku nitulungi i apa anu kuparaluu mopapulo polumakoku. 7 Baria kuunde ane lau sangka ngkida aku mosondaki komi. Ane sintoto ai peundea ni Pue, kupenoka bona masae aku saudi simbela-mbela ai komi. 8 Agaiana ei-ei, sangangaa meari sala aku i se ei i Epesu duduuna dongka eo mabose Pentakosta, 9 lawi nauda mawori tau anu moewa aku, agaiana ria mani tempoku mobago i se ei.
I Timotiu ai i Apolo
10 Ane dongka i Timotiu, kusarumaka nidoko lompe ai niadai, lawi mampopolumako ia bago ni Pue, ewa aku. 11 Mewali, inee ria tau anu baria mohaile ia. Nitulungi ia i apa anu naparaluu i tempona mesola si aku, lawi kupegia ia i se ei simbela-mbela ai pokata sampepepotuu.
12 Kaliliuana, ane pokata i Apolo, mawori mbelamo kutudu, bona lau simbela-mbela ai pokata sampepepotuu anu ina lau mosondaki komi i Korintu. Ei-ei baria mani naunde lau. Agaiana ane ria tempona, ina lau ia mosondaki komi.
Kasopoa nu sura
13 Mainga-inga komi. Nipakaroso pepotuumi! Inee komi maeka! Tetida komi i pepotuumi! 14 Apa ngkida anu nibabei, babeimode lako i rarami anu buke asi.
15 Poka-poka, niinsanimo i Setepana santombira anu mpolinguruna mewali tau ni Pue Ala i propinsi Akaya. Mosusu sira katuwura si Pue, bona motulungi sira pokara sampepepotuu. 16 Mewali, kuperade poka-poka bona niula patuduna ai patudu nu ope-ope rangara anu mampopolumako liliu bago ni Pue.
17 Matono raraku lawi dongkamo i Setepana, i Fortunatus ai Akaikus. Etumo mpane baria komi mampaka motulungi aku, agaiana kuimba siramo pasurumi anu motulungi aku i se ei. 18 Pokata aretu mopakaroso raraku, ewa etu mbui karapakarosona rarami. Etumo mpane kuperade, bona nibila tau anu ewa sira.
19 Ope-ope jumaa anu ria i propinsi Asia mopakatu tabeara si komi. I Akwila ai towawinena i Priskila simbela-mbela ai ope-ope tau anu mepotuu si Kerisitu, anu maminggu i tombira, mopakatu sira tabea i rara sanga ni Pue. 20 Tabea lako i ope-ope pokami i se ei. I tempomi mogulu menomba, mombetabe-tabe komi mewali tanda pombepokaasimi.
21 Anu kasopoana ei, aku saduduakumo anu mouki: Tabea lako si aku i Paulu! 22 Tau anu baria mampokaasi i Pue Yesu, pogeakamode nasuku ni Pue Ala.
Maranata: O Pue, maingkomode!