I Paulu mampololita kono i katuwu mpesola ni Kerisitu
15
1 Ei-ei poka-poka, kupenoka mampopaingaka komi kono i Bambari Malompe anu kupadongkakamo komi. Bambari Malompe etu, nidokomo ai batena nipotuu liliu i rara nu katuwumi. 2 Lako i Bambari Malompe anu kupadongkakamo komi etu mosoremamo komi, asala nipotuu liliu. Ane baria ewa etu, mbero-mbero ngkida pepotuumi.3 Lawi kupadongkakamo komi bambari anu mobundu mpii anu kudokomo mbui, iamo: i Kerisitu mamate bona mosuru dosata ewa anu teuki i rara Sura Ngkora Magali. 4 Awetu mamatemo Ia, rapaiwumo Ia, ai i eo katoluna napatuwu mpesola Ia ni Pue Ala, ewa anu teuki i rara Sura Ngkora Magali. 5 I katuwuNa mpesola, mopatongawamo Ia wotoNa i suroNa; mpolinguruna si Kefas anu rauli mbui i Peturu, ai roo awetu i suroNa anu ntanina. 6 Lako ni se etu, mampatongawa mbuimo Ia i topeulaNa anu lima atu labi. Kaworina tau aretu tuwu mani sira duduuna ei-ei, agaiana riamo sira basangkia anu mamate. 7 Roo awetu, Napatongawa mbuimo wotoNa si Yakobu ai i ope-ope suroNa. 8 Kasopoana, kuita mbui Ia i pampatongawaNa si aku. Aku, baria ewa suro anu ntanina. Raongko aku mewali suroNa ewa sadua anakoi anu rapoanaka anu baria mani sondo wulana. 9 Lawi aku ei, suro ni Pue Yesu anu baria mobundu, mpane lako i ope-ope suroNa. Kamonsona, baria aku sintoto rauli suro, lawi ni banimpia mampopesiasi aku tau anu mepotuu sira si Kerisitu. 10 Agaiana nakeningkabula rara ni Pue Ala, ai nakenimpetulungiNa si aku, etumo mpane raongko aku mewali suroNa dongka ei-ei. Ai mobundu mpuu kabula raraNa ai petulungiNa si aku. Lawi mepuu i karaongkoku, maruminsi pobagoku si Pue, mpane lako i ope-ope suro ni Pue Yesu anu ntanina. Ane lako i rosoku saduduaku, baria kubuku mampopolumako bago etu, agaiana nakeningkabula rara ni Pue Ala ai nakenimpetulungiNada si aku, etumo mpane kubuku. 11 Mewali, ria komi anu kubambarika, ria mbui komi anu rabambarika nu suro ni Pue Yesu anu ntanina, agaiana baria tau anu mangkeni bambari etu anu mobundu mpii. Agaiana anu mobundu mpii, iamo bambari etuda, anu kibambarikamo komi ai anu nipotuu.
Ane rapana i Yesu baria rapatuwu mpesola, baria mobundu pepotuuta
12 Mewali, ane kibambari katuwu mpesola ni Kerisitu lako i kamate, mangkiada mpane ria tau i olomi anu mosapuaka katuwura mpesola tau anu mamatemo? 13 Ane rapana, baria sira rapatuwu mpesola tau anu mamate, manoto mbui i Kerisitu baria tuwu mpesola. 14 Ane rapana i Kerisitu baria tuwu mpesola, baria ria bunduna pobagoki mopadongka Bambari Malompe, ai baria mbui ria bunduna pepotuumi. Lawi ane i Kerisitu baria tuwu mpesola, mepotuu komi i bambari anu baria mamonso. 15 Melumbu lako i se etu, pensani kami raimba topodongko kono si Pue Ala, lawi kipadongka bambari anu manguli: I Pue Ala mopatuwu mpesolamo i Kerisitu. Molentano baria Ia napatuwu mpesola ni Pue Ala. Mewali ane rapana tau anu mamatemo baria rapatuwu mpesola, baria mamonso pololitaki. 16 Lawi ane tau anu mamatemo, baria sira rapatuwu mpesola lako i kamatera, i Kerisitu baria mbui rapatuwu mpesola. 17 Ai ane i Kerisitu baria rapatuwu mpesola, baria mobundu pepotuumi ai baria mani komi tepawia lako i kuasa dosa. 18 Ai ane ewa etu, tau anu mepotuu si Kerisitu anu mamatemo sira, baria ria pesarumakaara. 19 Ane mesarumaka kita si Kerisitu wule tongota mani tuwu i dunia ei ngkida, mpane roo awetu bariamo ria pesarumakata, lako i ope-ope tau i dunia ei, kita eimo anu mapari mpii katuwuta.
20 Agaiana anu mamonso iamo: I Kerisitu napatuwu mpesolamo ni Pue Ala, ai Ia anu mpolinguruna tuwu mpesola lako i kamate. Etu mewali pempatoroata kaina rapatuwura mpesola mbui tau anu mamatemo. 21 Nakeningkamadosa nu sadua tau iamo i Adama, etumo mpane ope-ope tau sangangaa mamate. Ewa etu mbui, nakeningkariana kamate ai katuwu mpesola nu sadua tau iamo i Yesu, etumo mpane tau anu mamatemo ina rapatuwu mpesola. 22 Ope-ope pemulea ni Adama sangangaa mamate. Ewa etu mbui, ope-ope tau anu mosintuwu ai i Kerisitu ina mansumba sira katuwu anu bou anu baria mokasopoa. 23 Kono i katuwu mpesola ewa eimo pombeunsuna: anu mpolinguruna iamo i Kerisitu. Roo awetu i kadongkaNa mpesola i dunia ei, tau anu meula si Ia ina rapatuwu mpesola mbui sira. 24 Awetu rapatuwu mpesolamo sira, lako dongkada kasopoa dunia ei. I tempo etu, i Kerisitu ina monangi ope-ope topoparenta, ope-ope tadulako, ai ope-ope kuasa anu madaa. Kasopoana, ina Nasusu kadatuaNa si Pue Ala Tuamata. 25 Lawi i Kerisitu sangangaa meparenta mewali datu, duduuna napopengkoru ni Pue Ala ope-ope iwaliNa si Ia, 26 ai iwaliNa anu kasopoana anu ina Nanangi, iamo kuasa nu kamate. 27 Lawi ria teuki i rara Sura Ngkora Magali anu manguli, ewa ei:
“I Pue Ala mampopengkoru sinangka-nangkana si Ia.” (Dulua Petoia 8:7)
Mewali tainsani mpii: sinangka-nangkana anu ria ina rapopengkoru si Kerisitu. Batena ngkida i Pue Ala anu baria mengkoru si Ia, lawi Iamo anu mampopengkoru sinangka-nangkana si Kerisitu. 28 Mewali, ane sinangka-nangkana rapopengkoru si Kerisitu, i Kerisitu ina mengkoru si Pue Ala TuamaNa, bona tongawa kamakuasa ni Pue Ala i sinangka-nangkana.
29 Adiwamo poka-poka? Ane tau anu mamatemo baria rapatuwu mpesola, mangkiada mpane ria sira tau anu rariu mopasuru rangara anu mamatemo? Ane tomate baria ina rapatuwu mpesola, apa puuna mpane ada etu rababei? 30 Ai kami mbui, mangkiada paka mangkeni kami wotoki i rara kapari? 31 Eo-eona mampombelioka aku kamate, nakenimpobagoku mopadongka Bambari Malompe. Mamonso mpuu pololitaku ei, ai matono mpuu raraku nakeningka komina, lawi mepotuu komi si Yesu Kerisitu, Pueta. 32 Tongoku i se ei i kota Epesu, raewa aku nu tau sira anu maruminsi kasekera. Ane rapana tau anu mamatemo baria ina rapatuwu mpesola, apa bunduna sinangka-nangkana anu kutodisa ei? Ane rapana tomate baria ina rapatuwu mpesola, taula ngkimo lolita anu manguli, “Aginamo mangkoni ai manginu ngkida kita mangkadelo katono-tono, lawi i neile ina mamate kita.”
33 Inee komi rapakanawu! I pampekiri nu tau, anu manguli kabariana rapatuwu mpesola tau anu mamatemo, lawi babeiami anu malompe ina tebaliki mewali madaa, ewa babeiara. 34 Etumo mpane kuulika komi: nipakanoto rarami mangula patudu anu mamonso, ai ineemo komi mobabei dosa. Sintoto ane nipokaea, lawi ria komi anu baria mani manginsani i Pue Ala.
I Paulu mopakanotoka sira adiwa woto nu tau anu mamate i katuwura mpesola
35 Pekiri ria sira anu ina mampekune, “Adiwa kamonsona tomate ina rapatuwu mpesola? Woto anu adiwa ina rakiraka sira?” 36 Madoio mpuu tau anu mampekune ewa etu! Ane mantuda kita ba apa ngkida, tinuda etu sangangaa ratiwu nsalaa i tana, mpane lako tuwuda tinuda etu. 37 Bariamo kauna anu mpolinguruna anu tuwu. Lawi apa anu tatuda etu, wule tinuda nu tuda-tuda etu ngkida, rapana gandu ba tinuda anu ntanina. 38 Awetu roomo ratuda, i Pue Ala mopatuwu mangula peundeaNa, duduuna tuwu sampuu gandu ba tinuda anu ntanina. Pangka-pangkana tuwu mangula lense nu tuda-tuda etu.
39 Ane tapekiri, ope-ope anu tuwu i wongko dunia, baria simbela lensera. Lense manusia baria ewa lense nu tosi. Lense nu bau ue, ntanina mbui. Pangka-pangkana binata, montani-ntani lensena. 40 Ewa etu mbui i langi, ria eo, wula ai betue, agaiana ope-ope etu baria simbela ai apa anu ria i dunia. Pewangka nu eo, wula ai betue, baria simbela ai perae nu ba apa, anu ria i dunia ei. 41 Pewangka nu eo montani lako i pewangka nu wula, ai pewangka nu wula montani lako i pewangka nu betue sira, ai pewangka nu betue anu saogu montani ai pewangka nu betue anu ntanina.
42-43 Ewa etu mbui posisalana ai woto nu tomate, ane i tempona rapatuwu mpesola sira. Woto anu rapaiwu iamo woto anu pensani magoro. Agaiana woto anu rapatuwu mpesola iamo woto anu baria pensani magoro. I tempona woto etu rapaiwu, woto etu madaa ai malede; Agaiana i tempona rapatuwu mpesola woto etu, rabalikimo ai woto anu malompe ai maroso.
44 Woto anu rapaiwu, iamo woto anu sintoto tuwu i dunia ei. Agaiana woto anu rapatuwu mpesola, iamo woto anu nakuasai nu Inosa Magali. 45 Ria teuki i rara nu Sura Ngkora Magali anu manguli: tau anu mpolinguruna napopewali ai napatuwu ni Pue Ala iamo i Adama. Agaiana i Kerisitu pensani rauli i Adama anu kasopoana. Iamo anu mokiraka kita katuwu malompe anu baria mokasopoa. 46 I Pue Ala baria kasaliu mobaliki wotota. Mpolinguruna Nakiraka kita wotota ei, anu sintoto meari i dunia ei. I eo anu ina mai, lako Nakirakada kita woto anu sintoto meari i suruga. 47 I Adama anu mpolinguruna meari i wongko dunia ei, rapopewali lako i tana. Agaiana i Adama anu kadua dongka lako i suruga. 48 Ope-ope woto nu tau i dunia, ewa woto ni Adama, lawi kita ope-ope pemuleana. Agaiana ope-ope kita anu mosintuwu ai i Kerisitu, ina mansumba kita woto anu lako i suruga, ewa woto ni Kerisitu. 49 Ei-ei, wotota ewa woto ni Adama, lawi wotota ei iamo woto anu sintoto meari i dunia. I eo anu ina mai, lako mansumbada kita woto ewa woto ni Kerisitu, ai i tempo etu ina mansumba kita woto, anu sintoto meari i suruga.
50 Poka-poka, tunggaiaku ewa ei: wotota i dunia ei rapopewali lako i isi ai raa. Ai wotota ei ina mamate. Ane kebaria tebaliki wotota, kebaria kita pensani meari i rara peparentaa ni Pue Ala i suruga, lawi si ndete baria ria kamate.
51 Mewali, bona niinsani, kupadongkaka komi patudu anu tewunikai ni banimpia: Ane i tempo kadongkana mpesola i Pue Yesu, ria kita anu baria ina mamate. Agaiana ope-ope kita ina rabaliki, malompe anu tuwu mani, malompe anu mamatemo. 52 I tempona tatamburu anu kasopoana ratawui, ope-ope etu ina mewali i rara sampidi mata ngkida. Lawi ane tatamburu etu ratawui, i Pue Ala ina mopatuwu mpesola tomate, ai Nakiraka sira woto anu bariamo ina mamate. Mpane kita anu tuwu mani, ina rabaliki mbui kita. 53-54 Lawi wotota ei ina mamate, ai masae-sae ina magoro. Etumo mpane, wotota sangangaa rabaliki mewali woto anu bariamo ina mamate. Ai i tempona wotota rabaliki, ina tepabukei apa anu teuki i rara Sura Ngkora Magali anu manguli, ewa ei:
“I Pue Ala monangi kamate.” (Yesaya 25:8)
55 “Ee kamate, menangi manipae iko?
Ee kamate, ria manipae pesiimu?” (Hosea 13:14)
56 Pesii nu kamate iamo dosa, ai dosa tongawa nakeningkariana Atura ni Musa. 57 Agaiana kiuli maisi kalompena si Pue Ala, lawi mampoliungi i Yesu Kerisitu Pueta, Nakiraka kita penangi.
58 Mewali poka-poka anu kupokaasi, sangangaa nipakaroso pepotuumi. Inee bata-bata rarami. Sangangaa nipopolumako liliu bago ni Pue ai kabuke-bukena nu rarami, lawi niinsani sinangka bago anu nipobagoka i Pue, baria ina mbero-mbero.