Basangkia mpangka popakanoto kono i pewati lako i Inosa Magali
14
1 Mewali, anu sangangaa tapailodo, iamo mampokaasi kita singka manusiata. Roo etu, sangangaa tapenoka mpii mansumba pewati lako i Inosa Magali. Agaiana kapande-kapande lako Inosa Magali anu melumbu pobunduana, iamo mopadongka lolita lako si Pue Ala. 2 Lawi tau anu nakiraka nu Inosa Magali kapande mololita, i rara basangkia basa anu baria rainsani, baria sira mololita i manusia, mololitada sira si Pue Ala. Lawi Inosa Magali anu monini ia mampololita, kono i apa anu tewunikai mani i manusia. 3 Agaiana tau anu mopadongka lolita lako si Pue Ala, pololitana mopakaroso pepotuu nu rangara, mosuweki rarara ai mopakalene sira. 4 Tau anu nakiraka nu Inosa Magali kapande, mololita sira i rara basa anu baria rainsanira, mopakaroso ngkida rarana saduduana. Agaiana, tau anu mopadongka lolita lako si Pue Ala mopakaroso sira rara nu rangara i rara nu jumaa.5 Peundeaku poka, malompe mpii ane nakiraka komi nu Inosa Magali kapande, mololita i rara basa anu baria rainsani nu tau. Agaiana, anu melumbu mpii kalompena iamo ane mopadongka komi lolita lako si Pue Ala, mpanena mololita komi i rara basa anu baria rainsani nu tau. Agaiana ane ria sira anu manginsani lempona basa etu, mpane mopalimba bona manoto lempona, lako riada pobunduana popakarosora rara nu jumaa.
6 Mewali poka, ane rapana lau aku si komi, ai mololita aku i rara basa anu nakiraka aku nu i Inosa Magali anu baria rainsani, apamo bunduna si komi? Agaiana ane mopakanoto aku tunggaia ni Pue Ala, ba mopadongka aku bambari lako si Pue Ala anu baria mani niinsani, ba mopadongka aku lolita lako si Pue Ala, ba mepatudu aku, lako riada pobunduana si komi. 7 Mogaloda anu-anu, anu baria tuwu ewa tulali ba kecapi, ane baria rapopowadi lompe, baria ria pobunduana. Pandirina, ane baria kono potawuina tulali ba pokawina kecapi, tau anu mangepe baria rainsanira kaapana anu napodulua. 8 Ba, ane ria tau anu motawui tatamburu pombeala, moronde surudado lau mombeala, agaiana baria malompe potawuina, imapae anu matimama lau mombeala? 9 Ewa etu mbui ai komi poka: ane mololita komi i rara basa anu baria rainsani nu rangami, adiwa karainsanina apa anu niuli? Komi ewa tau anu mololita i pambui ngkida.
10 I rara dunia ei, ria maisi mpangkana basa, ai pangka-pangkana basa, ria lempona. 11 Agaiana ane ria sira tau anu mololita si aku, i rara basa anu baria mani kuinsani, ina kuimba sira tosandarena, lawi baria kuinsani basara. Ewa etu mbui ane mololita aku, i rara basa anu baria rainsanira, ina raimbara mbui aku tosandarena lawi baria rainsanira basaku. 12 Ewa etu mbui ai komi, ane nipenoka mansumba pewati lako i Inosa Magali, sangangaa niperade si Pue, bona nakiraka komi kapande mopakaroso rara nu rangami i rara nu jumaa.
13 Etumo mpane kuulika komi: ima anu nakiraka nu Inosa Magali kapande, mololita i rara basa anu baria rainsani, aginamo naperade si Pue bona mansumba ia kapande, mopalimba lempona basa etu, bona ope-ope rangana manginsani lempona pololitana. 14 Lawi ane mekakae aku i rara basa anu baria rainsani, raraku ngkida anu mekakae, agaiana pekiriku baria manginsani apa anu kuuli. 15 Mewali, apa anu sangangaa kubabei? Anu sangangaa kubabei iamo, ria tempoku mekakae i rara basa anu baria rainsani, ria tempoku mekakae i rara basa anu rainsani. Ria tempoku motoia i Pue i rara basa anu baria rainsani, ria mbui tempoku motoia i Pue i rara basa anu rainsani. 16 Ane rapana mekakae komi, manguli maisi kalompena si Pue Ala i rara basa anu baria rainsanira, mpane baria manoto lempona pololitami i tau anu mangepe, tau aretu baria sira ina manguli “amin” lempona baria sira mampokono pekakaemi, lawi baria rainsanira apa anu niuli. 17 Naudapae malompe pekakaemi manguli maisi kalompena si Pue Ala, agaiana baria ina mobundu i rangata, lawi pekakaemi etu baria mopakaroso rarara.
18 Kuuli maisi kalompena si Pue Ala, lawi kamapandeku mololita i rara basa anu baria rainsani, melumbu lako si komi ope-ope. 19 Agaiana i rara pogulu-gulu nu jumaa, aginamo mololita aku santepo rontepo lolita anu rainsani nu rangaku, bona mopaguru tau ntanina, mpanena maisi pololitaku i rara lolita anu baria rainsani nu rangaku.
20 Poka-poka i pampekirimi, inee komi ewa pampekiri nu anakoi, sangangaa pampekirimi ewa pampekiri nu tau anu manginaomo. Agaiana i babeia anu madaa, sangangaa ewa sadua analei komi anu baria mani manginsani apa-apa. 21 I rara Sura Ngkora Magali, teuki ewa ei,
Nauli ni Pue Ala:
“Mampoliungi tosandarena anu baria manginsani basa, ina mololita Aku i tauKu. Agaiana nauda ewa etu, baria rahailera pololitaKu.” (Yesaya 28:11-12)
22 Mewali, ane ria kita anu nakiraka nu Inosa Magali kapande, mololita i rara basa anu baria rainsani, pololitata etu mewali tanda i tau anu baria mepotuu si Pue Ala, baria i tau anu mepotuu. Agaiana ane mopadongka kita lolita lako si Pue Ala, pololitata etu mewali tanda i tau anu mepotuu, baria i tau anu baria mepotuu. 23 Nauda awetu, ane ria sira tau anu baria mepotuu si Kerisitu, ba anu baria mani manginsani Ngkora ni Pue Ala, lau sira maminggu ai komi, apamo anu ina raulira ane ope-ope komi mololita i rara basa anu nakiraka komi nu i Inosa Magali? Manoto ina raulira, magila komi. 24 Agaiana ane ope-ope komi, mopadongka lolita lako si Pue Ala, mpane mesua sadua tau anu baria mepotuu si Kerisitu ba anu baria mani manginsani Ngkora ni Pue Ala, mpane naepe ai nainsani lempona pololitami, duduuna manoto i rarana kamadosana, ai 25 ope-ope anu tewunikai i rarana ina tewungkesi. Kasopoana, ina molingkudu ia menomba si Pue Ala, nauli, “Monso-monso mpuu i Pue Ala ria i olomi!”
I rara pogulu-gulu nu jumaa, ope-ope sangangaa rababei mangula atura anu malompe
26 Mewali poka, apa lempona ope-ope etu? Ane menomba komi si Pue: ria sira anu modulua, ria sira anu mepatudu, ria sira anu mopadongka lolita lako si Pue Ala, ria sira anu nakiraka nu Inosa Magali kapande mololita i rara basa anu baria rainsani, ria sira anu mopalimba lempona pololitara etu, bona rainsani nu ope-ope tau. Agaiana sinangka-nangkana etu, sangangaa nibabei bona nipakaroso rara nu rangami. 27 Ane ria sira mansumba pewati mololita i rara basa anu baria rainsani, rodua ngkida, kaisinamo ane tolu dua inee melabi. Ai inee sira mololita asa i tempo anu simbela, sangangaa mombesuru-suruda sira. Ai sangangaa ria tau anu mopalimba lempona pololitara. 28 Ane baria ria anu mopalimba lolita nu tau, anu mololita i rara basa anu nakiraka nu Inosa Magali, anu baria rainsanira, sangangaa mandii-ndii sira i rara pogulu-gulu nu jumaa; aginamo i rarara ngkida mololita sira si Pue Ala.
29 Ane ria sira anu mopadongka lolita lako si Pue Ala i pogulu-gulu nu jumaa, aginamo rodua ngkida, kaisinamo ane tolu dua, mombesuru-suru sira mololita, ai sangangaa ria sira tau ntanina anu moparesa pololitara. 30 Ane rapana, ria sadua tau anu tongona momeso i pogulura menomba etu, anu mansumba lolita lako si Pue Ala merade mololita, aginamo tau anu tongona mololita etu mengkaroo sala, mokiraka tempo i tau etu mololita. 31 Ane awetu, pensani komi mombesuru-suru mopadongka lolita lako si Pue Ala, bela-belami mogulu menomba, mewali ope-ope komi modoko patudu anu mopakaroso pepotuumi. 32 Tau anu mopadongka bambari lako si Pue Ala, sangangaa pensani morempeki pololitana i tempona mopadongka bambari etu. Impia ia mololita, impia ia mandii. 33 Lawi mangula peundea ni Pue Ala, penombata sangangaa tapakalompe, baria naunde ni Pue ane ria sira tau anu mogeo-geo.
34 Mangula anu paka rababei i pogulu-gulu nu jumaa, towawine malompe ane mandii sira i rara pogulu-gulu nu jumaa. Baria sira rapaliu mololita, sangangaa mengkoru sira ewa anu teuki i rara Atura Agama. 35 Ane rapenokara manginsani ba apa ngkida, aginamo rapekunera i tomoanera i tombi, lawi baria sintoto ane towawine mololita i rara penombaa nu jumaa.
36 Ane ria komi anu baria mangunde mangula patuduku etu, bona niinsani baria komi anu mpolinguruna modoko Ngkora ni Pue Ala, ai baria wule si komi ngkida Ngkora ni Pue Ala etu rapadongka. 37 Ane ria sira tau anu manguli, “Mansumba aku kapande mopadongka lolita lako si Pue Ala,” ba “Mansumba aku pewati lako i Inosa Magali,” tau etu sangangaa mopangaku apa anu kuuki ei, iamo parenta lako si Pue. 38 Agaiana ane baria sira mohaile patuduku ei, inee mbui sira nihaile!