Ane mampokaasi kita singka manusia, melumbu kalompena
13
1 Ane rapana, mansumba aku kapande lako i Inosa Magali, bona mololita aku i rara basa nu malaeka ba ope-ope basa nu manusia, agaiana ane baria aku mampokaasi singka manusiaku, baria mpuu ria bunduna. Ope-ope kapande etu ewa pomomoni ndonge ba timbonga anu wule kario-rio ngkida.2 Ane rapana, mansumba aku kapebuku mopadongka lolita lako si Pue Ala, ai mansumba aku kapande manginsani sinangka-nangkana ai sinangka anu tewunikai mani, ai ane maroso pepotuuku mpane kubuku mopalimba bulu, agaiana ane baria aku mampokaasi singka manusiaku, baria mpuu ria bunduna katuwuku.
3 Naudapae ope-ope anu-anuku kukiraka sira tau, anu mesiasi katuwura ai kususu wotoku rasuwe, agaiana ane baria aku mampokaasi singka manusiaku, ope-ope aretu baria mpuu ria bunduna.
4 Tau anu mampokaasi singka manusiana iamo: manoa ia ai malompe rarana, baria ia masina, baria ia motoia wotona, baria ia mampemabose. 5 Baria ia mobabei babeia anu baria sintoto, ai baria ia mangkadelo rasina saduduana. Baria ia maliga marumpu ai baria ia mopairara tau ntanina. 6 Baria ia mampokatono apa anu madaa, agaiana mampokatonoda ia apa anu manoto, 7 tetida ia i rara nu sinangka kapari, mepotuu liliu ia, mesarumaka liliu ia i apa anu malompe, ai sabara liliu ia nauda ba apa ngkida anu morumpa ia.
8 Asi baria mokasopoa. Ane ria kita anu mansumba kapande mopadongka lolita lako si Pue Ala, sambela tempo kapande etu bariamo ria. Ane ria kita anu nakiraka nu Inosa Magali kapande mololita, i rara basangkia basa anu baria rainsani, sambela tempo kapande etu ina mokasopoa. Ane mansumba kita kapande lako si Pue Ala, bona manginsani kita apa anu baria rainsani nu rangata, sambela tempo kapande etu ina matonto. 9 Lawi ei-ei, makura mani kapande nu ope-ope tau, ai baria mani sondo kapande nu tau anu mopadongka lolita lako si Pue Ala. 10 Agaiana ina dongka tempona, i Pue Ala ina mampopewali sinangka-nangkana baria ria kamakurana, ai anu ria mani kamakurana ina bariamo ria.
11 Pandirina, ane anakoi mani aku, mololita aku ewa anakoi; pekiriku ai raraku ewa anakoi mbui. Agaiana ei-ei, manginaomo aku; kupalengimo apa anu kubabei ni banimpia. 12 Lawi ei-ei, baria mani tainsani sinangka-nangkana i kamonso-monsona, ewa tau anu mampeita sambua lense i pampebaoa anu mogawu-gawu, agaiana i eo anu ina mai, lako tainsanida sinangka-nangkana. Ei-ei, makura mani kapandeku, agaiana i eo anu ina mai, ina kuinsani mpii sinangka-nangkana, ewa i Pue Ala manginsani aku.
13 Mewali ei-ei, ria tolu mpangkana anu sangangaa tababei: mepotuu kita si Pue Ala, mesarumaka liliu kita si Pue Ala, ai mampokaasi kita singka manusiata. Lako i katolu mpangkana etu, anu melumbu mpii pobunduana iamo: mampokaasi kita singka manusiata.