Inosa Magali mokiraka kita pewati anu montani-ntani
12
1 Kaliliuana poka, ina mololita aku kono i pewati anu tasumba lako i Inosa Magali. Tunggaiaku bona niinsani mpii apa anu mamonso. 2 Nikaendo poka, ni banimpia lako baria mani niinsani i Pue Ala, tedii rarami menomba i anitu anu baria mololita. 3 Etumo mpane kupopainsanika komi: sadua tau anu nanini nu Inosa Magali, baria pensani manguli, “Mangkasalaramo i Yesu!” Ewa etu mbui baria ria sadua tau anu pensani manguli, “I Yesu iamo i Pue!” ane baria nanini nu Inosa Magali.4 Maisi mpangkana pewati anu nakiraka kita nu Inosa Magali. Agaiana Inosa Magali etu sadua ngkida. 5 Maisi mpangkana bago morora i Pue agaiana i Pue anu tarora, sadua ngkida. 6 Maisi mpangkana kapande morora i Pue. Agaiana i Pue Ala anu mokiraka kapande i sadua-sadua tau, sadua ngkida.
7 Kita sadua-sadua rakiraka pewati lako i Inosa Magali, bona tapake motulungi pokata sampepepotuu. 8 I sadua tau, Inosa Magali mokiraka kapebuku pekiri mepatudu anu malompe. I tosaduana, Nakiraka kapande mopakanoto lempona Ngkora ni Pue Ala. 9 I tau ntanina, Inosa anu sadua etu mbui mokiraka pepotuu anu maroso. Ai i tosaduana, Inosa Magali mokiraka kuasa mepakaosa. 10 I sadua tau, Nakiraka kapande mobabei tanda kuasa; i tosaduana Nakiraka kapande mopadongka lolita lako si Pue Ala. I saduana mbui, Nakiraka kapande mampopontani apa anu lako i Inosa Magali ai apa anu baria lako i Inosa Magali. I tau ntanina Nakiraka nu Inosa Magali kapande mololita i rara basangkia basa anu baria rainsanira. Ai i sadua mbui, Nakiraka kapande mopakanotoka lempona basa etu bona rainsani nu singka rangana. 11 Ope-ope etu, nababeika kita nu Inosa Magali anu sadua ngkida etu. Iamo anu mokiraka kita pewati anu montani-ntani mangula peundeaNa saduduaNa.
Mawori kita, agaiana kita sawoto nakenimpepotuuta si Yesu
12 I Kerisitu, pensani rapandiri ewa woto nu sadua tau. Woto nu tau etu sambua ngkida, agaiana maisi kirana. Nauda maisi kirana, ope-ope kirana etu mewali sambua woto ngkida. 13 Ewa etu mbui kita, ope-ope kita: malompe toYahudi ba anu baria toYahudi, malompe anu batua katuwura ba anu baria batua, mewalimo kita sambua woto iamo woto ni Kerisitu, lawi ope-ope kita rariu ai Inosa Magali ai mansumbamo kita Inosa Magali etu.
14 Wotota sambua ngkida, agaiana maisi kirana, rapana ria paa, ria pale, ai maisi mpangkana kirana anu ntanina. 15 Ane rapana, paa manguli, “Aku, baria pale, etumo mpane baria aku sangkira lako i woto.” Agaiana nauda ewa etu, paa etu mia-mia ngkida sangkira lako i woto. 16 Ane talinga manguli, “Aku, baria mata, etumo mpane baria aku sangkira lako i woto,” talinga etu mia-mia ngkida sangkira lako i woto. 17 Ane ope-ope kira nu wotota mewali asa mata, apamo anu meepe. Ane ope-ope mewali asa talinga, apamo anu meenga. 18 Mewali i Pue Ala moatoro bona wotota rababei lako i pangka-pangkana kirana. Pangka-pangkana Naboli i wotota mangula peundeaNa i peariana anu sintoto. 19 Ane rapana sumambaa wotota ei sampangka ngkida, pensanipae rauli sumambaa woto? 20 Lawi, maisi kira nu wotota, agaiana sambua ngkida wotota.
21 Etumo mpane mata baria pensani mangulika pale, “Baria iko kuparaluu!” Ai woo baria pensani mangulika paa, “Baria iko kuparaluu!” 22 Agaiana, kamonsona kira nu wotota anu raimba malede, etuda kamonsona anu paraluu mpii. 23 Kira nu wotota anu raimba baria teadai, kirana etuda anu tatuko lompe. Kira nu wotota anu baria sintoto raita nu tau ntanina, kirana etuda anu takadipuraka lompe. 24 Agaiana kira nu wotota anu sintotomo raita nu tau ntanina, baria paraluu melumbu ka takadipurakana. I Pue Ala anu mampombedai-dai kira nu wotota. Agaiana ria sangkira wotota anu baria pensani raita, etuda anu takadipuraka lompe. 25 Mewali wotota ei, baria tegaa-gaa, mpane kira-kirana sangangaa sore mombekadipuraka, bona ntena ria posisala. 26 Ane ria kira nu woto anu madua, ope-ope kira nu woto anu ntanina madua mbui. Ane ria kira nu woto anu ratoia ope-ope kira nu woto anu ntanina matono mbui sira.
27 Ewa etu mbui kita anu mepotuu si Pue Yesu, rapandiri ewa woto ni Kerisitu ai kita sadua-sadua iamo kira-kirana. 28 I rara nu jumaa, napakanotomo ni Pue Ala basangkia dua tau iamo: Kaisa, ria sira anu mewali suroNa, kadua, ria sira anu mopadongka NgkoraNa, katoluna, ria sira anu mopaguruka tau NgkoraNa. Ria mbui sira anu mobabei tanda kuasa. Ria sira anu Nakiraka kuasa mepakaosa, ria sira anu motulungi singka rangana, ria sira anu mewali tadulako, ria sira anu nakiraka nu Inosa Magali kapande mololita i rara basangkia basa anu baria rainsanira. 29 Mewali, baria ope-ope anu mewali suroNa, ba mopadongka NgkoraNa, ba mopaguruka tau NgkoraNa. Baria ope-ope anu pensani mobabei tanda kuasa, 30 ba mopakaosa tau, ba mansumba kapande mololita i rara basangkia basa anu baria rainsanira ba mopalimba basa etu bona rainsani nu tau ntanina. 31 Agaiana, sangangaa nipari-pari mpii bona mansumba komi pewati lako i Inosa Magali anu melumbu kalompena. Agaiana ria anu melumbu mpii kalompena, anu ina kupadongkaka komi.