I Paulu i Korintu
18
1 Roo awetu, malambumo i Paulu mopalengi kota Atena lau i kota Korintu. 2 I Korintu, i Paulu mampomberumpaka sadua tomoane toYahudi anu rasanga i Akwila. I Akwila etu rapoanaka i tana Pontus. Towawinena rasanga i Priskila. Sira samboko melimba lako i tana Italia, lawi ria parenta nu Datu Mabose Klaudius i Roma anu mampopeloso ope-ope toYahudi anu ria i kota Roma. Mewali i Paulu laumo mosondaki i Akwila ai i Priskila, 3 mpane meari simbela-mbela ai sira, lawi pobago ni Paulu simbela ai pobagora, iamo mobabei sira bambaru lako i kolimba binata. 4 I eo-eo penombaa nu toYahudi, i Paulu lau i tombi penombaa nu toYahudi mopatudu tau anu terusu i se etu, malompe toYahudi awetu mbui toYunani. Tunggaia ni Paulu bona mepotuu sira si Pue Yesu.5 Mewali, kadongka ni Silas ai i Timotiu lako i tana Makedonia, i Paulu bariamo mobago mobabei bambaru lako i kolimba, lawi mobambari liliu ia Ngkora Magali i toYahudi, napololitaka sira kono si Yesu, Datu Topesorema. 6 Agaiana toYahudi i kota Korintu mosapuaka ai mopakoi liliu sira patuduna. Etumo mpane i Paulu motaronta awu lako i sampina, lempona ka napalengiramo, naulika sira ni Paulu, “Ane nasuku komi ni Pue Ala, baria aku anu mosuru! Batena komi! Mewali mepuu ei-ei, kupalengimo komi, ina laumo aku mobambari Ngkora Magali i tau anu baria sira toYahudi!” 7 Mpane mangoka mpuumo ia lau i tombi anu ria i tumbiri nu tombi penombaa. Tumpu tombi etu, baria toYahudi, agaiana menomba ia si Pue Ala. Sangana i Titius Yustus. 8 Sadua tau anu motadulakoi tombi penombaa etu, sangana i Krispus. Ia ai ope-ope tau anu meari i tombina, mepotuu sira si Pue Yesu. Mpane ni tempo etu, mawori mbui toKorintu anu mampetingai bambari anu napadongka ni Paulu, duduuna mepotuu mbui sira mpane rariu sira.
9 Ni tongo mbengi, i Paulu mangita mbuimo sambua pampatongawa. I rara pampatongawa etu, i Pue mangulika ia, “Inee iko maeka, ai inee nupengkarooka mobambari NgkoraKu i kota Korintu ei, sangangaa nupadongka liliu. 10 Lawi Akumo anu mamporangai iko, ai Kurondemo tau wori i kota ei anu ina mewali tauKu. Baria ria sadua anu ina mopatoa palena si iko ba mampopesiasi iko.” 11 Mewali, i Paulu meari i Korintu sampae aono mbula kasaena, ai mopatudu liliu ia tau kono i Ngkora ni Pue Ala.
12 Ni tempona i Galio mewali gubernur i tana Akaya, sintuwu sira toYahudi moewa i Paulu ai rakeni ia i lio nu gubernur, mpane 13 rasalaira, niulira, “Tau ei mopakanawu tau wori. Lawi ia mepatudu kono i dala menomba si Pue Ala, anu moewa apa anu teuki, i Atura ni Musa!”
14 Lako ina mesonoda i Paulu, naulimo ni Galio, “ToYahudi! Ane tau anu nisalai etu mobabei posisala ba babeiana anu madaa mpii, sangangaa kupetingai popadongkami. 15 Agaiana popadongkami mombekonoi ngkida pololitana ai atura nu agamami. Mewali, komimo anu mourusi kara-kara etu. Aku, baria aku madota mobotusi kara-kara anu ewa etu!” 16 Roo awetu, natudumo sira meloso lako i tombi pobotusia. 17 I raoa tombi pobotusia etu, tau wori mosoko i Sostenes, sadua tadulako nu tombi penombaa, mpane rarurugii. Agaiana i Galio baria mopairara babeiara etu.
I Paulu mesola lau i Antiokia
18 Masae mani i Paulu meari i Korintu mpane lako metompada ia i pokana sampepepotuuna. Lako baria mani mangoka lau i Siria, lau nsalaa i Paulu mampopegundi wuluana i boea Kengkrea, lawi roomo dandina si Pue Ala.a Mewali memponemo ia i kapala tasi lau i tana Siria, simbela-mbela ai i Priskila ai i Akwila. 19-21 I polumakoara etu, mensopi sira i kota Epesu, mpane i Paulu lau i tombi penombaa mampombepakakonoi lolita ai toYahudi anu terusu sira i se etu. Tau aretu merade bona i Paulu masae saudi simbela-mbela ai sira, agaiana baria naunde. Naudapae ewa etu, i pangokana, naulika sira, “Ane napomakono ni Pue Ala, ina mesola ngkida aku mai i se ei.” I Priskila ai i Akwila meari liliu sira i Epesu, agaiana i Paulu mopapulomo polumakoana mensawi i kapala tasi lau i tana Siria.
22 Awetu ia dongka i kota Kaisarea, lau sala i Paulu i Yerusale motabe jumaa anu ria i se etu, lako lauda ia i kota Antiokia i tana Siria. 23 Basangkia kasaena simbela-mbela ai pokana sampepepotuuna i Antiokia, mpane mangoka mbuimo ia lau i tana Galatia ai Frigia mopakaroso pepotuu nu tau sira anu mepotuu si Pue Yesu i se etu.
I Apolo mobambari Ngkora ni Pue Ala i Epesu ai i Korintu
24 Ni tempo etu, ria sadua toYahudi anu dongka i kota Epesu, sangana i Apolo. I Apolo etu, rapoanaka i kota Aleksandria. Mapande ia molololita, ai manginsani ia isi nu Sura Ngkora Magali. 25 I Apolo rapatudukamo patudu kono si Pue Yesu. Mewali, kadongkana i Epesu, mololita ia lako i rarana, mopatuduka sira tau tunturaka ni Yesu i kanoto-notona, nauda periu ni Yohane ngkida anu nainsani. 26 Ni tempo etu, napepuumo mololita i tombi penombaa nu toYahudi ai baria ria kaekana. Awetu raepe ni Priskila ai i Akwila lolita ni Apolo etu, rakenira lau i tombira mpane rapakanotokara lompe Ngkora ni Pue Ala anu baria mani nainsani.
27 Roo awetu, i Apolo motunggai lau i tana Akaya. Mpane pokana sampepepotuuna i Epesu motulungi ia, ai mopakatu sira sura i jumaa anu ria i Akaya bona i Apolo radoko lompe. Mewali, kadongka ni Apolo i Akaya, patuduna mangkeni maisi pewati i ope-ope tau anu mepotuu sira si Pue Yesu nakeningkabula rara ni Pue Ala. 28 Nakeningkapandena mololita, i Apolo monangi sira toYahudi i rara pombesonoira i lio nu tau wori. Lako i Sura Ngkora Magali, napatongawa ka i Yesuna Datu Topesorema anu nadandi ni Pue Ala.