I Paulu ai i Silas i Tesalonika
17
1 I Paulu ai i Silas mopaliliu sira polumakoara moliu i kota Ampipolis ai Apolonia dongka i kota Tesalonika. I Tesalonika etu, ria sambua tombi penombaa nu toYahudi. 2 Ewa saweweina, laumo i Paulu i tombi penombaa etu, mampombepakakonoi ai tau anu terusu i se etu, kono i isi nu Sura Ngkora Magali. Tolu minggu mombeunsu, i Paulu mobabei ewa etu i eo penombaa, 3 bona napakanotoka ai napatongawaaka sira lempo nu Sura Ngkora Magali, nauli, “Datu Topesorema anu nadandi ni Pue Ala ni banimpia, sangangaa mokolo kapari duduuna mamate, agaiana tuwu mpesola. I Yesu anu kupololita si komi ei iamo Datu Topesorema.” 4 Ria sira toYahudi anu modoko lolita etu ai anu meula sira si Paulu ai si Silas. Ria mbui sira tau ntanina anu mepotuu, tepesua mawori toYunani anu mengkoru si Pue Ala ai mawori towawine anu teadai.5 Agaiana toYahudi anu baria mepotuu, masina sira si Paulu ai si Silas. Etumo mpane rasuwekira rara nu tau anu malose sira mobago ai anu momeso-meso ngkida i pobalu-balua. Tau aretu, mopasintuwu rarara bona mobabei posisala ai mobabei silaka i rara nu kota. Kadongkara i tombi anu rapearii ni Paulu ai i Silas, kasaliu rasuakira. Tunggaiara mosoko i Paulu ai i Silas, mpane rakenira lau i lio nu tau wori, 6 agaiana baria ria rasumbara. Etumo mpane mosokomo sira tumpu tombi, sangana i Yason. I Yason etu ai basangkia dua tau anu mepotuu si Kerisitu rakeni lau i lio nu tadulako nu topoparenta, ai monganga-nganga sira tau wori, raulira, “I Paulu ai rangana ei mopakawuli tau i sumalele dunia. Ei-ei ria sira i se ei. 7 Mpane i Yason ei modoko sira i rara nu tombina! Sira aretu anu moewa parenta nu datuta i Roma, raulira kariana datu ntanina anu rasanga i Yesu.” 8 Awetu tau wori ai tadulakora mangepemo pololitara, marumpu mpuu sira. 9 Kasopoana, i Yason ai pokana sampepepotuuna mokira sira doi i tadulako nu topoparenta, mopakanoto kabarianamo ria posisala. Etumo mpane lako rapawiada sira.
I Paulu ai i Silas i Berea
10 Ni kawengi etu, pokara sampepepotuura anu i Tesalonika mangulika i Paulu ai i Silas, “Aginamo malambu komi lako i se ei lau i Berea.” Mewali, lau mpuumo sira. Awetu sira dongka i Berea, i Paulu ai i Silas lau i tombi penombaa nu toYahudi. 11 ToYahudi i Berea aretu, raundera ai matono sira mampetingai patudu kono si Yesu, anu napadongka ni Paulu ai i Silas, ai eo-eona moparesa sira Sura Ngkora Magali bona rainsanira ba mamonso pololita ni Paulu ba baria, baria ewa toYahudi anu i Tesalonika. 12 Mawori sira toYahudi anu mepotuu si Yesu. Mpane mawori mbui sira toYunani anu mepotuu, malompe tomoane ai towawine anu teadai.
13 Baria masae lako ni se etu, toYahudi anu i kota Tesalonika, mangepe i Paulu mobambari Ngkora ni Pue Ala i Berea. Etumo mpane lau mbuimo sira i Berea mosuweki rara nu tau wori, bona mobabei sira posisala. 14 Mewali, tau anu mepotuu si Kerisitu i se etu ragagura mamporangai i Paulu lau i wiwi nu tasi. Agaiana i Silas ai i Timotiu, meari liliu sira i Berea. 15 I Paulu raporangaira dongka i kota Atena. Roo awetu, tau anu meporangai aretu, mesolamo sira i Berea mangkeni tewai ni Paulu si Silas ai si Timotiu bona maliga sira lau mampomberumpaka ia.
I Paulu i Atena
16 Tongo ni Paulu mampegia i Silas ai i Timotiu i Atena, mapari rarana mangita kaworina lense anitu anu rapenombai nu toAtena. 17 Etumo mpane i tombi penombaa, i Paulu mampombepakakonoi lolita ai toYahudi, ai tau ntanina anu mengkoru si Pue Ala. Eo-eona i Paulu mopatudu mbui ima-ima anu nasumba i pobalu-balua. 18 I kota Atena etu, ria mbui sira tau anu mapande anu mampeulai patudu ni Epikuros ai patudu ni Stoa. Tau anu mapande aretu mombesonoi ai i Paulu. Ria sira anu manguli, “Apada anu nauli nu tau anu mengkapande ei?” Ria mbui sira anu manguli, “Ba ina napadongkaka kita kono i sanga anitu lako i tana ntanina.” Raulira ewa etu, lawi i pepatudu ni Paulu mokabelai i Yesu ai katuwuna mpesola tau lako i kamate.
19 Etumo mpane tau aretu mangkenimo sira i Paulu i poterusua mabose anu rasanga Areopagus, raulikara, “Kipenoka kiepe patudumu anu bou etu. 20 Baria mani ria kiepe patudu ntanina anu ewa etu, ai kipenoka manginsani lempona.” 21 (Lawi ewa saweweina toAtena ai tau ntanina anu meari i Atena, mangunde ngkida sira mampetingai ai mampololita liliu apa anu bou.)
22 Lako ni se etu, meongkomo i Paulu i lio nu tau anu terusu i poterusua mabose Areopagus, nauli, “Komi toAtena! Kuita topoagama mpuu komi. 23 Kuinsani etu, lawi tongoku molulumako i kotami ei, kuita pearia-pearia penombaami, ai kuita mbui sambua watu penombaa anu ria ukina ewa ei: ‘Penombaa si Pue anu Baria Rainsani Sangana.’ Mewali, i Pue anu nipenombai agaiana baria niinsani sangaNa etumo, anu ina kupadongkaka komi. 24 I Pue Ala anu mampopewali dunia ai ope-ope isina, Iamo tumpu langi ai dunia. Baria Ia meari i tombi penombaa anu nababei nu manusia. 25 Baria mbui paraluu nadurei nu manusia, lawi Ia anu mokiraka kita katuwuta ai inosata ai sinangkana anu taparaluu. 26 Lako i sadua tau, i Pue Ala mampopemule ope-ope tau, mpane Natudu kita mampearii dunia ei. Napakanoto amimo lako i mpolinguruna tompo nu tana anu rapearii ope-ope kadatua ai tempo poparentara. 27 I Pue Ala mobabei ope-ope aretu bona takadelo Ia. Ai ane takadelo i Pue Ala, pensani tasumba. Kamonsona, Ia baria karao lako si kita ope-ope. 28 Lawi eimo anu nauli nu sadua ulububumi: ‘Lako si Ia ngkida katuwuta. Etumo mpane pensani kita meari ai mokale i dunia ei.’ Simbela mbui anu rauki nu ulububumi ni banimpia, rauli: ‘Kita ope-ope, ana ni Pue Ala.’
29 Mewali, poka-poka, baria malompe ane kita anu mewali ana ni Pue Ala moimba Ia ewa lense anu rababei lako i bulawa ba lako i salaka ba lako i watu mangula kapande nu manusia. 30 Naudapae ewa etu, baria kita nasuku ni Pue Ala. Natuko ngkida mataNa lako i kadoiota etu. Agaiana ei-ei, Natudu ope-ope tau i sumalele dunia bona menonso sira lako i dosara. 31 Lawi i sambela tempo anu Napakanoto ni Pue Ala, ina mobotusi kara-kara nu tau i sumalele dunia i kanoto-notona. Bago etu ina napopewali nu sadua tau anu napelisi ni Pue Ala. Mpane tau etu Napatuwu mpesola lako i kamate bona tongawa i ope-ope tau ka Iana anu Napelisi.”
32 Awetu raepera lolita ni Paulu, ria sira anu mopapantawai, lawi baria sira mampotuu kariana tau anu pensani tuwu mpesola. Agaiana, ria mbui sira anu manguli, “Kiunde mampetingai mpesola pololitamu etu.” 33 Roo awetu, malambumo i Paulu lako i poterusuara. 34 Agaiana ria sira anu meula si Paulu mpane mepotuu si Yesu. Sadua anu mepotuu si Yesu iamo i Dionisius, sadua tadulako i poterusua mabose Areopagus. Ria mbui sadua towawine anu rasanga i Damaris, mpane ria mbui sira anu ntanina.