Bambari Malompe anu nauki ni
Yohane
Pepuua lolita
Anu mouki sura ei, iamo sadua topeguru ni Yesu anu Napokaasi (21:20-24; 13:23; 19:26; 20:2; 21:2-7). TopeguruNa etu iamo i Yohane.
Tunggaia nu sura ei tesumba i Yohane 20:31, anu manguli, “apa anu kuuki ei, kuuki bona nipotuu ka i Yesunamo Datu Topesorema, Ana ni Pue Ala, ai bona mansumba komi katuwu malompe anu baria mokasopoa lako i pepotuumi si Ia.” I rara watina 1 dongka i watina 12, tabasa kono i pitu mpangkana tanda kuasa anu nababei ni Yesu anu mopakanoto ka Iana mpuu Ana ni Pue Ala (2:1-11; 4:46-54; 5:1-18; 6:1-15; 6:16-21; 9:1-12; 11:38-44). I rara nu sura ei mawori mbela i Yesu rauli Ana ni Pue Ala (1:34; 1:49; 3:16-18; 5:23-25; 11:4; 11:27; 20:31).
Pitu mbela i rara nu sura ei i Yesu, wotoNa saduduaNa Napopandiri, Nauli, “Aku eimo pangkoni” (6:35, 41, 48, 51); “Aku eimo pewangka” (8:12); “Aku eimo boboka” (10:7, 9); “Aku eimo toporewu anu malompe” (10:11, 14); “Aku eimo anu mampopengkawangu tomate, ai anu mokiraka katuwu.” (11:25); “Aku eimo dala” (14:6); ai “Aku eimo puu anggoro” (15:1, 5).
Sambela mbui, i Yesu manguli, “Lako baria mani i Burahima rapoanaka, ria amimo Aku” (8:58). PololitaNa etu mopakanoto ka Iana mpuu Ana ni Pue Ala anu baria ria pepuuaana ai baria ria kaopeana.
Isi nu Sura
1. Pepuua lolita: Ngkora ni Pue Ala mewali manusia (1:1-18)
2. I Yohane Toperiu mopatimama rara nu tau modoko i Yesu (1:19-34)
3. I Yesu mepatudu ai mobabei tanda kuasa anu mopakanoto ka Iana Ana ni Pue Ala (1:35–12:50)
4. I Yesu mopaguru topeguruNa lako baria mani Ia rapopate (13:1–17:26)
5. I Yesu rasoko, rapopate, mpane tuwu mpesola (18:1–20:29)
6. Tunggaia nu sura ei (20:30-31)
7. Kasopoa lolita: Awetu rapatuwu mpesolamo, i Yesu mopatongawamo Ia wotoNa i topeguruNa anu pitu (21:1-25)