I Yesu tuwu mpesola
20
1 Madondo-dondo ni eo Minggu, ni tempona mani madedi, i Maria Magdalena laumo i talumba. Dongka ni se etu, kasaliu naita watu petuko boboka nu talumba tebungkasimo. 2 Roo awetu, melangkamo ia lau si Simo Peturu ai sadua topeguruNa anu napokakaia ni Yesu, naulika sira, “Wotowata ni Pue raalamo lako i talumbaNa, ai baria kiinsani kaimbana raboli!”3 Laumo i Peturu ai topeguru anu napokaasi ni Yesu etu i talumba. 4 Roduara melangka simbela, agaiana melumbu kagasi nu topeguruNa anu sadua mpane i Peturu, etumo mpane ia ilodo dongka i talumba. 5 Awetu ia dongka, baria ia kasaliu mesua, napeita nsalaa i rarana. Naita bana anu rapopobungkusi i Yesu ria mboto i se etu. 6 Roo awetu, i Simo Peturu dongkamo mpane kasaliu mesua. Naita mbui bana popebungkuNa. 7 Agaiana bana anu rapopowewe woo ni Yesu, tewilulu ai tepatani lako i bana anu rapopobungkusi wotoNa. 8 Lako ni se etu, topeguruNa anu sadua, anu ilodo dongka i talumba ni mpongone, mesua mbui ia. Naitamo apa anu ria i rara nu talumba etu, mpane napotuu. 9 Duduuna dongka i eo etu, baria mani sira manginsani apa anu teuki i rara Sura Ngkora Magali anu mopakanoto, “Ia sangangaa tuwu mpesola.” 10 Roo awetu, mesolamo sira topeguruNa anu rodua aretu lau i tombira.
I Yesu mopatongawa wotoNa si Maria Magdalena
11 Agaiana i Maria Magdalena dongka mpesola, meongko i raoa gompi i talumba etu, motumangi liliu. Tongona motumangi, meloga ia i rara nu talumba. 12 Ungangkidamo naita rodua malaeka anu mebadu bula momeso sira i podampaa wotowata ni Yesu, ria sadua mbai i wooNa, ai sadua mbai i paaNa. 13 Malaeka aretu mepekune si Maria, raulira, “Tina, mangkiada mpane motumangi iko?”
Nauli ni Maria, “Pueku raalamo lako i se ei, ai baria kuinsani imba raboli.”
14 Lako ni se etu, membalilimo i Maria mpane naita sadua tau meongko i talikuna. Kamonsona i Yesumo, agaiana baria nainsani ka i Yesuna. 15 Mekunemo i Yesu si ia, “Tina, mangkiada mpane motumangi iko? Ima anu nukadelo?”
Nauli rara ni Maria: ba topokampai bonde anu kuita ei. Etumo mpane naulika, “Tua, ane Iko anu mangala wotowataNa, Nutudoka aku imba peariana, bona kuala.”
16 Nauli ni Yesu, “Maria.”
Membalilimo i Maria si Yesu, mpane nauli i rara basa nu toYahudi, “Rabuni!” (Lempona, “Guru.”)
17 Nauli ni Yesu si Maria, “Inee sala Aku nupatoro, lawi baria mani Aku mengkaore lau i TuamaKu. Laumode i poka-pokaKu, nuulika sira ina laumo Aku i TuamaKu ai Tuamamu mbui, Pue AlaKu ai Pue Alamu mbui.”
18 Laumo i Maria Magdalena mampomberumpaka sira topeguruNa, nauli, “Kuitamo i Pue!” Mpane napadongkakamo sira ope-ope anu nauli ni Yesu.
I Yesu mopatongawa wotoNa i topeguruNa
19 Kawengi ni eo Minggu etu, topeguru ni Yesu mogulu sira i tombi anu tegili bobokana, lawi mampokaeka sira tadulako nu toYahudi. Ungangkidamo dongka i Yesu meongko i olora, ai Natabe sira, Nauli, “Kalompe nu katuwu dongka si komi.” 20 Roo awetu, Napopeitakamo sira paleNa ai lompeNa. Matono mpuu rarara mangita Puera. 21 Nauli mbui ni Yesu, “Kalompe nu katuwu dongka si komi. Ewa TuamaKu motudu Aku, ewa etu mbui Aku motudu komi.” 22 Roo awetu, inosaNa Natawuika sira mpane Nauli, “Nidokomode Inosa Magali. 23 Ima anu niampuni dosana, i Pue Ala mbui ina moampuni dosa nu tau etu. Ima anu baria niampuni dosana, i Pue Ala baria mbui moampuni dosa nu tau etu.”
I Yesu mopatongawa wotoNa si Tomas
24 I Tomas, sadua lako i sampulu rodua topeguruNa anu rauli Toporopa, baria ia ria simbela-mbela ai rangana i kadongka ni Yesu mpolinguruna. 25 Etumo mpane rangana sira mangulika ia, “Kiitamo i Pue!”
Agaiana nauli ni Tomas, “Ane baria kuita pepakua i paleNa mpane kutosuka karaweku i pepakua etu, ai ane baria mbui kuperera petambukua anu i gumpetaNa batena baria kupotuu.”
26 Liumo saminggu, mogulu mbuimo sira topeguruNa i rara nu tombi etu. Ni tempo etu, i Tomas ria simbela-mbela ai sira. Ragilimo ope-ope boboka, agaiana nauda ewa etu, ungangkidamo dongka i Yesu meongko i olora, Naulika sira, “Kalompe nu katuwu dongka si komi.” 27 Roo awetu, Naulika i Tomas, “Peita pepakua anu i paleKu, tosukamode karawemu i pepakua i paleKu. Ai perera mbui petambukua i gumpetaKu. Inee bata-bata raramu. Potuumode!”
28 Nauli ni Tomas, “Ikomo Pue Alaku, Pueku anu kupenombai!”
29 Nauli ni Yesu si Tomas, “Mepotuu iko lawi nuitamo Aku. Matono sira tau anu mepotuu si Aku, naudapae Aku baria raitara.”
Tunggaia nu sura ei