I Yesu tuwu mpesola
16
1 Awetu liumo eo penombaa nu toYahudi, i Maria Magdalena, i Maria tina ni Yakobu, ai i Salome, lau sira mobaluki lana wongi. Tunggaiara, bona lau rabumbusikara lana wongi etu i wotowata ni Yesu. 2 Mewali, madondo-dondo i eo Minggu, awetu mensibemo eo, laumo sira i talumba. 3 I tongo dala mololitamo sira, raulira, “Imamo anu ina motulungi kita moduli watu petuko boboka nu talumba dou?” 4 Agaiana awetu sira dongka i talumba, raitara watu anu mabose mpii anu rapopotuko talumba etu tedulimo. 5 Awetu sira mesua i rara nu talumba, raitara sadua anantomoane mebadu bula mbai i kuanara, tongona momeso. Tingkara sira towawine aretu mangita anantomoane etu.6 Nauli nu anantomoane etu, “Inee komi maeka! Kuinsani ka nikadelona i Yesu toNasare anu rapaku i kau anu rapopombesape. Tuwu mpesolamo Ia, bariamo Ia ria i se ei. Nipeita podampaa Ia! 7 Ei-ei laumode komi si Peturu, ai i topeguruNa anu ntanina, niulika sira: Tuwu mpesolamo i Yesu. Moilodomo Ia lau i tana Galilea. Ina niita Ia si dou ewa anu roomo komi Naulika.”
8 Melangkamo sira towawine aretu mesola, lawi tingkara ai maeka mpuu sira. Nakeningkaekara, baria kasaliu rapololitara bambari etu ba si ima ngkida.a
I Yesu mopatongawa wotoNa ai motudu topeguruNa
9 Pengkawangu ni Yesu lako i kamate madondo-dondo i eo Minggu, mpolinguruna mopatongawa Ia wotoNa si Maria Magdalena. I Maria etu, anu napakaosa ni Yesu ni banimpia i ka napesuangina nu pitu seta. 10 Mpane laumo i Maria Magdalena i topeguru ni Yesu, nasumba sira mapari rarara ai tongora motumangi nakeningkamate ni Yesu. 11 Naulika sira, “Kuitamo ni mpongone, tuwu mpesolamo i Pue!” Agaiana ope-ope anu napololita ni Maria Magdalena etu, baria mpuu rapotuura.
12 Roo awetu, i Yesu mopatongawa wotoNa i rodua topeulaNa, anu tongora molumako lau i raoa nu kota. Ni tempo etu, lenseNa baria ewa saweweina. 13 Awetu sira mesola, rapadongkara mbui i rangara apa anu mewali etu. Agaiana baria mbui sira rapotuu.
14 Roo awetu, i Yesu mopatongawa wotoNa i topeguruNa anu sampulu sadua tongora mangkoni. Nakambarokamo sira lawi baria buke pepotuura ai makoo rarara. Naudapae ria sira tau anu mangita i Yesu tuwu mpesolamo, baria sira kasaliu mampotuu lolita nu rangara. 15 Naulika sira ni Yesu, “Laumode komi i sumalele dunia, mopadongka Bambari Malompe lako si Pue Ala i ope-ope tau. 16 Ima ngkida anu mepotuu ai rariu, ina tesorema sira lako i suku dosara. Agaiana ima ngkida anu baria mepotuu, batena rasuku. 17 Tau anu mepotuu, ina rakiraka sira kuasa mobabei tanda kuasa, iamo i rara nu sangaKu, ina mampopeloso sira seta. Ina mololita sira i rara basa anu baria rainsanira. 18 Ane mopatoro sira ule, ba manginu sira rasu, baria mpuu sira mangkia-ngkia. Ane mampetui sira tau anu madua, tau anu madua etu batena ina maosa.”
I Yesu teongko lau i suruga
(Luk. 24:50-53; Sur. 1:9-11)
19 Awetu roomo i Pue Yesu mololita si sira, teongkomo Ia lau i suruga, ai meparenta simbela-mbela ai i Pue Ala. 20 Lako ni se etu, topeguruNa lau mopadongka Bambari Malompe imba-imba ngkida. I Pue simbela-mbela ai sira, mamporangai sira mobago, Nakiraka sira kuasa mobabei tanda anu metingkarai, bona tongawa kamonsona bambari anu rapadongkara.