I Yesu tuwu mpesola
24
1 Madondo-dondo ni eo Minggu, laumo sira towawine etu i talumba mangkeni rampa-rampa anu roomo rapasilolongara. 2 Dongkamo sira i talumba etu, raitara telolimo watu petuko boboka nu talumba. 3 Mesuamo sira i rara nu talumba, agaiana wotowata ni Yesu bariamo rasumbara i se etu. 4 Tongona mawuli rarara mampempekiri mangita etu, ungangkidamo dongka sira rodua tau anu mesampi mengkila-ngkila meongko i tumbirira. 5 Mewali maruminsi mpuu kaeka nu towawine aretu, etumo mpane molingkudu sira motumpa dongka i tana. Agaiana rauli nu tau anu rodua aretu, “Mangkiada mpane nikadelo Tau anu tuwu i olo nu tomate? 6 Baria ria Ia i se ei. Tuwu mpesolamo Ia! Nikaendo apa anu Naulika komi ni banimpia tempomi mani i tana Galilea. 7 Nauli: Ana Manusia sangangaa rasusu i tau anu madaa bona rapaku i kau anu rapopombesape, agaiana i katolu eona ina tuwu mpesola.”8 Roo awetu, lako rakaendorada lolita ni Yesu etu. 9 Awetu towawine aretu mesola lako i talumba, rapololitara ope-ope anu mewali etu i suro ni Yesu anu sampulu sadua, ai i ope-ope topeguruNa anu ntanina. 10 Towawine aretu, iamo i Maria Magdalena, i Yohana, ai i Maria tina ni Yakobu, ai ria mbui sira towawine anu ntanina. 11 Awetu raepe nu suroNa sira pololitara etu, baria rapotuura, raimbara ngkida lolita anu baria mamonso.
12 Agaiana i Peturu kasaliu meongko mpane melangka lau i talumba. Awetu ia dongka i talumba etu, napeita i rara, agaiana wule bana popebungkusiNadamo anu ria i se etu. Roo awetu, mesolamo ia, ai maruminsi mpuu ka napekirina kono i apa anu mewali etu.
I Yesu mampatongawa wotoNa i dala lau i boea Emaus
13 Ni eo etu mbui, ria rodua topeguru ni Yesu anu lau i boea Emaus. Kakaraona boea Emaus etu, kira-kira sampulu sakilo lako i Yerusale. 14 Tongora molumako, rapololitara liliu kono i ope-ope anu lako mewali. 15 Tongora mololita ai mombesonoi, ungangkidamo mai i Yesu mogompilisi sira mpane molumako simbela-mbela ai sira. 16 Raitara i Yesu, agaiana ria anu mopakawuli pekirira mpane baria rainsanira ka i Yesunamo etu. 17 Tongora molumako, napekune ni Yesu si sira, “Apada anu nipololita liliu tongomi molumako?”
Mewali mengkaroo sira, ai tongawa raita kasusana rarara. 18 Roo awetu, sadua anu rasanga i Kleopas mekune si Yesu, nauli, “Lako imbada Iko mai mpane baria Nuinsani apa anu mewali i se ei, i Yerusale basangkia eona anu naliu?”
19 Nauli ni Yesu, “Apada anu mewali?”
Mesono sira, raulira, “Anu mewali etu kono si Yesu toNasare! Ia sadua nabi anu makuasa i pobagoNa ai i pololitaNa, malompe i lio ni Pue Ala, malompe i lio nu manusia. 20 Kapala-kapala tadulako menomba ai tadulako-tadulako ntanina mosusu Ia i topoparenta bona rasuku mamate. Etumo mpane i Yesu rapakumo i kau anu rapopombesape. 21 Kamonsona, Iamo anu kisarumaka ina mopawia kita toSaraeli lako i iwalita. Ai eo ei, katolu eonamo lako i karapopateNa. 22-23 Agaiana basangkia towawine anu samporangaa ai kami, laumo sira i talumba madondo-dondo, agaiana wotowataNa bariamo ria rasumbara. Tingkara mpuu kami lawi awetu sira mesola, rapadongkakara kami apa anu nauli nu malaeka anu mampatongawa wotora si sira i talumba, anu manguli, katuwuna mpesolamo i Yesu. 24 Lako ni se etu, basangkia rangaki lau mbui sira i talumba. Kadongkara i se etu, raitara batena ewa anu rauli nu towawine ni mpongone. Agaiana baria raitara i Yesu.”
25 Roo awetu, i Yesu mangulika sira, “Madoio mpuu komi. Mangkiada mpane baria niinsani lempona apa anu mewali! Bariapae nipotuu ope-ope anu nauli nu nabi-nabi ni banimpia? 26 Eimo anu rapadongkaka komi nu nabi-nabi ni banimpia: Datu Topesorema, sangangaa narumpa nu kapari, lako mansumbada pomesoa anu meawa ai anu teadai.” 27 Lako ni se etu, i Yesu mopakanotoka sira ope-ope anu teuki i rara nu Sura Ngkora Magali kono i wotoNa, mepuu lako i sura ni nabi Musa, duduuna i ope-ope sura nu nabi-nabi anu ntanina.
28 Gompimo i boea anu ratunggaira, i Yesu mengkapulo molumako liliu. 29 Agaiana tau anu rodua aretu mobawai Ia, raulira, “Mensopimo kita i se ei, lawi ina kawengimo.” Mewali mensopi mpuumo i Yesu simbela-mbela ai sira.
30 TempoNa momeso ai sira ina mangkoni simbela, nadoamo ni Yesu roti, Nauli maisi kalompena si Pue Ala, Nabinse-binse mpane Nasusuka sira. 31 Ni tempo etumo, lako manotoda rarara kamonsona Ia etu, i Yesumo. Agaiana kasaliu mapaia lako i olora. 32 Mololitamo sira, raulira, “I tongo dala ni mpongone, maroso mpuu rarata i ka Napakanotokanamo kita ope-ope anu teuki i rara nu Sura Ngkora Magali!”
33 Kasaliu mangoka sira mesola lau i Yerusale. Kadongkara i se etu, rasumbara topeguru ni Yesu anu sampulu sadua mogulu sira ai rangara. 34 Rauli nu tau anu mogulu aretu, “Monso mpuu, i Yesu tuwu mpesolamo. Napatongawamo wotoNa si Simo!”
35 Mewali, tau anu rodua etu, motuntuka mbui sira ope-ope anu mewali i tongo dala ni mpongone, ai rapadongkaramo apa anu mewali i tempona i Yesu mobinse-binse roti, lawi ni tempo etu, lako manotoda i rarara, ka i Yesunamo anu ria simbela-mbela ai sira.
I Yesu mopatongawa wotoNa i topeguruNa
36 Tongora mani mololita, ungangkidamo ria i Yesu meongko i olora, mpane motabe sira, Nauli, “Lompe nu katuwu dongka si komi.”
37 Tingkaramo sira ai maeka sira, lawi rapenokara tanuana. 38 Etumo mpane i Yesu mangulika sira, “Mangkiada mpane maeka komi ai baria gaga nipotuu? 39 Nipeita lari i paleKu ai i paaKu ei. Akumo ei! Nipetui Aku ai nitotoki Aku. Baria Aku tanuana, lawi ria wotoKu ai ria wukuKu.”
40 TongoNa mololita, Napopeitaka sira paleNa ai paaNa. 41 Tongona mani rapokatonora ai rapowulira mani, ai baria mani gaga rapotuura. Etumo mpane napekune ni Yesu, Nauli, “Ba, ria pangkonimi i se ei?” 42 Rasusukara Ia sampua bau anu lesamo. 43 Nadokomo ni Yesu mpane Nakoni, bona raitara kabariana mpuu tanuana.
44 Roo awetu, Naulikamo sira, “Anu mewali ei-ei, etumo anu niulikaKumo komi i tempoKu simbela-mbela mani ai komi. Sinangkana anu teuki i rara Sura Atura ni Musa ai sura nu nabi-nabi ai Sura Dulua Petoia ni Daudi kono i wotoKu, ope-ope sangangaa mewali.”
45 Roo awetu, Nabungkasi pampekirira bona rainsanira lempona apa anu teuki i rara nu Sura Ngkora Magali, 46 Nauli, “I rara nu Sura Ngkora Magali teuki awei: Datu Topesorema sangangaa mansumba kapari ai kamate, ai i katolu eona ina tuwu mpesola. 47 Ai ope-ope tau sangangaa menonso lako i dosara, bona dosara ina naampuni ni Pue Ala. Bambari etu sangangaa rabambari i tau santina-santina i sumalele dunia, mepuu lako i Yerusale ei. 48 Komimo anu mewali sabiKu lawi niita matamo ope-ope anu mewali ei.
49 Ina Kutudu Inosa Magali mai si komi mangula dandi nu TuamaKu. Agaiana sangangaa nipegia sala i se ei i kota Yerusale, duduuna rapasilolonga komi ai kuasa anu dongka lako si Pue Ala.”
I Yesu mengkaore lau i suruga
50 Roo awetu, nakeni sira ni Yesu lau i raoa nu kota Yerusale, gompi i boea Betania. Naongkomo paleNa mpane Nawati sira. 51 TongoNa mewati, teoremo wotoNa lau i suruga, mogaamo sira. 52 Molingkudumo sira menomba si Ia, mpane mesola sira i Yerusale, ai matono mpuu rarara. 53 I Yerusale, i Tombi ni Pue Ala motoia liliu sira i Pue Ala.