I Yesu i lio ni Gubernur Pilatu
23
1 Roo awetu, laumo sira ope-ope tadulako aretu mangkeni i Yesu lau mampombelioka i Gubernur Pilatu. 2 Kadongkara i se etu, rapepuuramo mosalai i Yesu, raulira, “Kisumba tau ei tongoNa mopakanawu tau wori! Nauli kabariata mobaiari asele si Kaisar. Ai Nauli mbui ka Ianamo sadua Datu anu rauli i Kerisitu.”3 Mewali, mekunemo i Pilatu si Yesu, nauli, “Ba Iko mpuu datu nu toYahudi?”
Nasonoi ni Yesu, “Iko saduduamu anu manguli.”
4 Lako ni se etu, nauli ni Pilatu i kapala-kapala tadulako menomba ai i tau wori, “Baria ria kusumba salana tau ei.”
5 Agaiana rapari-parira mosalai Ia, raulira, “NakenimpepatuduNa, mosuweki Ia rara nu tau wori moewa topeparenta i sumalele tana nu toYahudi, mepuu lako i Galilea duduuna dongka i se ei.”
6 Awetu naepe ni Pilatu pololitara etu, napekune sira, nauli, “Ba toGalilea tau ei?”
7 Rasonoira, “Io, Ia toGalilea.” Awetu naepe pesonora, natudumo tau mangkeni i Yesu lau si Datu Herode, lawi iamo datu anu meparenta i tana Galilea, anu ni tempo etu mbui, i Herode ria i Yerusale.
I Yesu napombelioka ni Datu Herode
8 Matono mpuu i Herode mangita i Yesu, lawi masaemo naepe lolita nu tau kono si Ia, ai naunde bona naita ai nasarumaka mbui kaina Napopeitakana sampangka tanda kuasa anu metingkarai. 9 Etumo mpane i Herode mopadongkamo mawori mpangka pampekune si Yesu, agaiana baria ria anu Nasonoi. 10 Ria mbui sira i se etu, kapala-kapala tadulako menomba ai guru-guru agama anu morai mpii sira i Yesu i lio ni Herode. 11 Etumo mpane, i Herode ai surudadona mampopowadi-wadi ai mopapakoimo sira i Yesu. Rabaduikamo Ia juba anu ewa saweweina napake nu datu-datu, roo awetu rakeni mpesola lau si Pilatu. 12 Ai mepuu ni eo etu mbui, i Herode ai i Pilatu mosintuwumo sira. Lawi ni banimpia mombeiwali liliu sira.
I Yesu rasuku mamate
13 Lako ni se etu, i Pilatu mogulu mbuimo ope-ope kapala-kapala tadulako menomba, ai tadulako-tadulako anu ntanina, ai tau wori sira, 14 mpane naulika sira, “Tau ei, nikeni mai si aku ai niuli ka Ianamo anu mopakanawu tau wori, ai moewa topoparenta. Eo ei kuparesamo i liomi, agaiana baria ria kusumba sampangka babeiaNa anu madaa ewa anu niraika Ia. 15 Awetu mbui pesumbaa pekiri ni Herode, etumo mpane napopesola ngkida mai si aku. Kamonsona tau ei baria mobabei ba apa ngkida kasala anu sintoto rasukuka Ia duduuna mamate. 16 Mewali, ina kupopantodisa ngkimo Ia, mpane kupawia.”
17 [I Pilatu manguli awetu, lawi pae-paena i Eo Posusa Pasa, ia sangangaa mopawiaka tau wori, sadua tau anu ratarunggu.]
18 Awetu raepe nu tau wori pololitana, monganga-ngangamo sira manguli, “Sangangaa rapopate Ia! I Baraba nupawia!” 19 (I Baraba etu, ratarunggu nakenimpepopatena ai peewana i topoparenta i rara nu kota.) 20 Sambela mani i Pilatu mololita i tau wori, lawi naunde ni Pilatu mopawia i Yesu. 21 Agaiana monganga-nganga liliu sira, raulira, “Pakumode Ia! Pakumode Ia i kau anu rapopombesape!”
22 Katolu mbelana, i Pilatu mangulika sira, “Apa babeiaNa anu madaa? Mogaloda sampangka salaNa anu sintoto rapopateka Ia, baria ria kusumba. Kupopesiasi ngkimo mpane kupawia.”
23 Agaiana tau wori aretu mongare-ngare sira mamperade bona i Yesu rapaku i kau anu rapopombesape. Kasopoana menangi sira nakenimponganga-ngangara. 24-25 I Pilatu mobotusimo bona i Yesu rasuku mamate, mpane i Baraba rapawiaka sira mangula pamperadera. I Baraba etu anu ratarunggu nakenimpepopatena ai peewana i topoparenta. Roo awetu, nasusumo i Yesu i surudado nu toRoma bona rapopate mangula peundea nu toYahudi.
I Yesu rapaku i kau anu rapopombesape
26 Lako ni se etu, surudado nu toRoma mangkenimo i Yesu lau i raoa nu kota. Mewali tongora molumako, mampomberumpaka sira sadua toKirene anu lako dongka i Yerusale, sangana i Simo. I Simo etu rapari-pari bona lau mosimbu kau anu rapopombesape meula i taliku ni Yesu. 27 Tongo ni Yesu rakeni lau i raoa nu kota, mawori mpuu tau meula si Ia, tepesua mbui sira basangkia towawine anu mandawi motumangisi Ia. 28 Agaiana i Yesu mampembalilingi sira, Nauli, “Towawine toYerusale, ineemo Aku nitumangisi. Aginamo nitumangisi wotomi saduduami ai anami. 29 Lawi bariamo masae tau ina manguli: ‘Morasi mpuu sira towawine anu malalo, anu baria sambela mopasusu!’ 30 Ni tempo etumo, tau ina manguli: ‘Bulu limbangi kami! Ai mungku-mungku tuko kami!’ 31 Mogalo Aku anu baria masala batena mansumba pesuku, apa mani komi.”a
32 Ria mbui rodua tau anu madaa babeiara anu rakeni simbela-mbela ai Ia bona rapopate. 33 Kadongkara i bulu anu rasanga Bulu Bangawoo, i Yesu rapakumo i kau anu rapopombesape. Rapaku mbui rodua tau anu madaa babeiara i kau anu rapopombesape popakua sira sadua-sadua. Sadua mbai i kuanaNa, mpane sadua mbai i kabeoNa. 34 I Yesu mekakae, Nauli, “Uma, Nuampuni kowo tau arei, lawi baria rainsanira apa anu rababeira.”
Surudado aretu motendemo sira undi, bona mopakanoto kaimana anu mansumba pesampiNa. 35 Mawori tau meongko i woi nu kau anu rapopombesape, mampengoa i Yesu. Ria mbui sira tadulako nu toYahudi anu mopakoi Ia, raulira, “Peita! Tau ntanina Natulungi, agaiana wotoNa saduduaNa baria Nabuku Natulungi. Ane monso-monso mpuu ka Iana Datu Topesorema anu napelisi ni Pue Ala, sangangaa Nabuku motulungi wotoNa saduduaNa!” 36 Surudado aretu, mopapakoi mbui sira i Yesu, mpane ragompilisira rapanginuira ai anggoro anu mangilu, 37 raulira, “Ane monso-monso Iko datu nu toYahudi, tulungimode wotoMu!”
38 I kau anu rapopombesape popakua Ia, i wongko wooNa, teuki ewa ei, “Eimo Datu nu toYahudi.”
39 Sadua tau anu madaa babeiana anu rapaku i kau anu rapopombesape simbela-mbela ai i Yesu, mopapakoi i Yesu, nauli, “NiuliMuwo Datu Topesorema Iko! Ane mamonso mpuu apa anu Nuuli etu, tulungimode wotoMu mpane Nutulungi mbui kami!”
40 Agaiana anu sadua mokambaroka rangana, naulika, “Bariapae iko mengkoru si Pue Ala? Bona nuinsani, iko ai Ia simbela-mbela rasuku mamate. 41 Iko ai aku, sintoto kita rasuku mamate nakeni nu babeiata anu madaa, agaiana Ia, baria sintoto rasuku mamate.” 42 Roo awetu, nauli mbui nu tau etu, “Yesu, Nukaendo kowo aku, ane dongka Iko i rara peparentaMu!”
43 Nauli ni Yesu, “Mamonso mpuu anu Kuulika iko, mepuu i eo ei ngkimo, simbela-mbela iko ai Aku i rara nu Paradesi.”b
Kamate ni Yesu
44 Togomo eo, kira-kira tinti sampulu dua, ungangkidamo madedi i sumalele tana etu, duduuna dongka tinti tolu. 45 Rindi bana anu ratoe i rara nu Tombi ni Pue Ala, masepa ntongo. 46 Roo awetu, naulimo ni Yesu masisimbuku, “Uma, i rara nu paleMu Kususu InosaKu!” Awetu roomo Ia mololita ewa etu, opemo inosaNa.
47 Awetu naita nu tadulako surudado apa anu mewali etu, motoiamo ia i Pue Ala, nauli, “Tongawa mpuu! Ia ei tau anu manoto!”
48 Tau wori anu mai mosabiki apa anu mewali etu, mesolamo sira ai penonso anu maruminsi. 49 Ai ope-ope sira tau anu sampombeinsani ni Yesu tepesua sira towawine anu meula lako i Galilea, meongko ngkarao sira mampeita sinangkana anu mewali etu.
I Yesu rapaiwu
50-51 Ni tempo etu, ria sadua tomoane anu rasanga i Yusupu anu lako i kota Arimatea i tana Yudea. I Yusupu etu iamo tau anu malompe rarana ai manoto babeiana. Masaemo ia mampegia kadongkana peparenta ni Pue Ala. Ia mbui sadua lako i topobotusi kara-kara nu toYahudi, agaiana baria napomakono pobotusi nu tadulako-tadulako aretu anu manguli i Yesu sangangaa rapopate. 52 I kamate ni Yesu, laumo i Yusupu mampomberumpaka i Pilatu mamperade bona wotowata ni Yesu rakiraka ia bona napaiwu. Mewali nakiramo ni Pilatu wotowata ni Yesu rapaiwu. 53 Mewali, napopendolumo wotowata ni Yesu lako i kau anu rapopombesape, nabungkusi ai bana anu mabula, mpane nadampa i rara nu talumba anu rakae i tabingke nu bulu watu. Talumba etu baria mani sambela rapopaiwui tomate.
54 Eo etu, iamo eo pampasilolongaa, lawi ineilena eo penombaa. Mangula ada nu toYahudi, mepuu i kawengi etu, bariamo pensani tau mobago. 55 Tempona nakeni wotowata ni Yesu lau i talumba, ope-ope towawine anu mamporangai i Yesu lako i Galilea, meulamo sira si Yusupu mampeita talumba etu, ai mampeita ba rapadiwaka wotowataNa rapaiwu. 56 Roo awetu, mesolamo sira lau mopatimama rampa-rampa ai lana wongi anu ina rabasaikara wotowata ni Yesu, agaiana i eo penombaa baria sira mobago mangula Atura ni Musa.