19
1 Roo awetu, natudumo sira ni Pilatu surudadona, lau mangala i Yesu mpane rasepera. 2 Surudado aretu mobabeimo sambua songko nu datu agaiana rababeira lako i walaa anu modui, mpane rasongkoikara i Yesu. Roo awetu, rajubai Ia ai juba anu makamumu ewa juba nu datu. 3 Laumo sira motumpa i lioNa, raulikara, “Kibila Iko, datu nu toYahudi!” Roo awetu, rasopomo lioNa.4 Lako ni se etu, mensuwu mbuimo i Pilatu, naulika sira toYahudi, “Peita, kukenimo mai si komi, bona niinsani kabariana ria kusumba salaNa mogalo saudi.” 5 Lako ni se etu, rakenimo i Yesu i raoa, mamposongko dui ai mejuba makamumu ewa juba nu datu. Nauli ni Pilatu, “Nipeita Tau ei!”
6 Awetu kapala-kapala tadulako menomba ai topokampai tombi ni Pue Ala mangita i Yesu, mongangamo sira, raulira, “Pakumode Ia i kau anu rapopombesape! Pakumode Ia i kau anu rapopombesape!”
Nauli ni Pilatu, “Ane nipenoka mopaku Ia i kau anu rapopombesape, nialamode. Komi anu sangangaa mopaku Ia i kau anu rapopombesape, lawi aku, baria ria kusumba salaNa.”
7 Rauli nu toYahudi, “Ane kami, mangula atura agamaki, sangangaa rasuku mamate Ia, lawi Nauli ka Iana Ana ni Pue Ala.”
8 Awetu naepe ni Pilatu pololitara etu, tetambaimo kaekana. 9 Mesua mpesolamo ia i rara nu tombi kadatua, mpane mekune mbuimo si Yesu, “Lako imba Iko mai?” Agaiana i Yesu baria mesono. 10 Nauli mbui ni Pilatu, “Mangkiada mpane baria Iko madota mosonoi aku? Bona nuinsani, aku ei ria kuasaku mopawia Iko ba mopaku Iko i kau anu rapopombesape!”
11 Nauli ni Yesu, “Ane baria iko nakiraka ni Pue Ala kuasa etu, baria ria kuasamu si Aku. Mewali, tau anu mosusu Aku si iko, melumbu kabosena nu dosana mpane lako iko.”
12 Mepuu ni se etu, i Pilatu mangkadelo dala bona mopawia i Yesu. Agaiana monganga mbuimo sira toYahudi, raulira, “Ane nupawia Ia, baria iko ranga ni Kaisar! Ima ngkida anu mopangaku ka iana datu, tau etu meewa si Kaisar!”
13 Awetu naepe ni Pilatu pololitara, nakenimo i Yesu i raoa. Roo awetu, momesomo ia i pomesoa pobotusia kara-kara i sambua pearia anu rasanga Lobo Watu. (I rara basa nu toYahudi sangana Gabata) 14 Ni tempo etu, ina togomo eo, saeoa lako baria mani eo Posusa Pasa. Nauli ni Pilatu i toYahudi aretu, “Eimo Datumi!”
15 Monganga-ngangamo sira, raulira, “Popate Ia! Popate Ia! Paku Ia i kau anu rapopombesape!”
Nauli ni Pilatu, “Sangangaa kupaku i kau anu rapopombesape mpuupae Datumi?”
Rasonoi nu kapala-kapala tadulako menomba, “I Kaisar ngkida datuki.” 16 Kasopoana i Pilatu mosusumo i Yesu si sira bona rapakura i kau anu rapopombesape.
I Yesu rapaku i kau anu rapopombesape
Lako ni se etu raalaramo i Yesu mpane rakeni lau i raoa nu kota. 17 Mpane mopari-pari sira i Yesu mosimbu kau anu rapopombesape anu ina rapopakui Ia, dongka i Bulu Bangawoo. (I rara basara toYahudi sangana Golgota.) 18 Ni se etu, mopakumo sira i Yesu i kau anu rapopombesape. Ria mbui rodua tau ntanina anu rapaku i kau anu rapopombesapera sadua-sadua simbela-mbela ai Ia i se etu, sadua mbai i kabeoNa, sadua mbai i kuanaNa.
19 I Pilatu motudu surudadona mopataka sampeka pata i kau anu rapopombesape popakuaa i Yesu. I pata etu, teuki: I Yesu toNasare, Datu nu toYahudi. 20 Ukina etu rauki i rarana tolu mpangkana basa: basa nu toYahudi, basa nu toRoma, ai basa nu toYunani. Mawori toYahudi mobasa uki i pata etu, lawi popakua i Yesu etu gompi i kota. 21 Mewali, kapala-kapala tadulako menomba mangulika i Pilatu, “Inee rauki: Datu nu toYahudi! Aginamo rauki: ‘Tau ei manguli ka Iana datu nu toYahudi.’”
22 Nauli ni Pilatu, “Apa anu kuuki, baria ina kubaliki!”
23 Awetu surudado roomo mopaku i Yesu, sampiNa raalamo mpane ragaa iba, sadua-sadua santau. Agaiana jubaNa, baria ragaa-gaa lawi baria ria podaloana ratanu mewali santau bana. 24 Etumo mpane mololita sira surudado, raulira, “Inee tapua-pua juba ei. Aginamo taundi mopakanoto ima anu mansumba.” Etu mewali bona tepabukei apa anu teuki i rara Sura Ngkora Magali, anu manguli:
“SampiKu raala mpane ragaa-gaa.
Anu mansumba jubaKu rapakanoto ai undi.” (Dulua Petoia 22:18)
Ai kalawiana surudado-surudado aretu mobabeimo ewa etu.
I Yesu mosusu tinaNa bona nakadipuraka nu sadua topeguruNa
25 Gompi i kau popakua i Yesu, meongkomo nu tinaNa ai sadua poka nu tinaNa anu towawine mbui. Ria mbui i Maria towawine ni Kleopas, ai i Maria Magdalena. 26 Awetu naita ni Yesu tinaNa meongko i se etu i tumbiri nu sadua topeguruNa anu Napokaasi, Naulika tinaNa, “Tina, ia etu nupoanamo.” 27 Mpane Naulika mbui topeguruNa etu, “Ia etu nupotinamo.” Roo awetu, topeguruNa etu mokadipurakamo tina ni Yesu i rara nu tombina.
Kamate ni Yesu
28 Nainsani ni Yesu karoonamo napolumakoi ope-ope tunggaia ni Pue Ala si Ia, mpane Nauli, “Mangkamara Aku” bona mopabukei apa anu teuki i rara Sura Ngkora Magali. 29 Ni se etu, ria samangku anggoro anu mangilumo. Ria sira tau anu lau mandoa lomo, raeme i anggoro etu, raboli i wuntu daa nu kau, mpane rapakakonoka i ngudu ni Yesu. 30 Napeminamo ni Yesu, mpane Nauli, “Sopomo!” Roo awetu, motumpa Ia, opemo inosaNa.
Surudado motambuku gumpeta ni Yesu
31 Eo pewalina karapaku ni Yesu i kau anu rapopombesape etu, ewa neilena eo penombaa nu toYahudi. Mangula paliara baria pensani ria tomate anu tetoe i kau anu rapopombesape i eo penombaa. Apa mani lawi ina kono Posusa Pasa. Etumo mpane tadulako nu toYahudi merade si Pilatu bona tau anu rapaku aretu ratepo paara bona maliga sira mamate. Merade mbui sira bona wotora rapopendolu. 32 Mewali, lau mpuumo sira surudado motepo paara, anu ilodo ratepo iamo rodua anu rapaku simbela-mbela ai i Yesu. 33 Agaiana awetu i Yesumo anu ina ratepora paaNa, bariamo mewali ratepora paaNa lawi raitara matemo Ia. 34 Agaiana ria sadua surudado anu motambuku gumpetaNa ai tawalana. I karatambukuNa etu, kasaliu mensuwumo raa ai ue.
35 Tau anu mangita anu mewali etu, iamo anu mopadongka apa anu naita, bona mepotuu mbui komi. Pololitana ei mamonso, ai nainsani kamonsona. 36 Etu mewali bona mopabukei apa anu teuki i rara Sura Ngkora Magali anu manguli, “Baria mpuu ria sambua wukuNa anu ina ratepo.” 37 Ria mbui anu teuki i rara Sura Ngkora Magali anu manguli, “Ina motirangai sira anu ratambukuramo.”
I Yesu rapaiwu
38 Ni tempo etu, ria sadua tau anu rasanga i Yusupu lako i kota Arimatea. Ia mepotuu ngkandii si Yesu, lawi mampokaeka tadulako nu toYahudi. Awetu mamatemo i Yesu, i Yusupu laumo si Pilatu, mpane mampetompai wotowata ni Yesu bona rapaiwu. Napaliumo ni Pilatu, mewali laumo i Yusupu mangala wotowata ni Yesu. 39 Ria mbui sadua tau anu lau simbela-mbela ai i Yusupu, sangana i Nikodemus. Ni banimpia i Nikodemus etu anu lau mampomberumpaka i Yesu ni kawengi. Laumo sira rodua tau aretu mokadipuraka wotowata ni Yesu. Tempora nalau, i Nikodemus mangkeni lana mur ai gaharu anu ragalomo, kira-kira tolu mpulu kilo kamantimina. 40 Tau anu rodua aretu mandoa sira wotowata ni Yesu, rabungkusi bana bula anu roomo rapambolii lana wongi mangula ada popaiwu nu toYahudi.
41 Gompi i popakua i Yesu, ria sambua bonde, ai i rara bonde etu ria kalolu anu rakae i tabingke bulu anu rapasilolonga mewali talumba. Talumba etu mabou mani, baria mani sambela rapopaiwui. 42 Mewali, nakeningkabarianamo masae ina mepuumo eo penombaa nu toYahudi, ai nakeningkagompina talumba anu ina rapopaiwui Ia, etumo mpane wotowata ni Yesu polo rapaiwu i talumba etu.