I Yesu rasoko
18
1 Awetu roomo i Yesu mekakae ewa etu, Ia ai topeguruNa lau i sambuteka ue Kidron. I se etu ria sambua bonde, mewali i Yesu ai topeguruNa sira mesua i rara nu bonde etu. 2 I Yudasi anu mampobalu i Yesu, manginsani kaimbana bonde etu, lawi i Yesu ai topeguruNa sira paka mogulu i se etu. 3 Mewali i Yudasi laumo i bonde etu, simbela-mbela ai samporangaa surudado nu toRoma ai topokampai Tombi ni Pue Ala. Sira aretu anu raposawaaka nu kapala-kapala tadulako menomba ai toParisi lau sira mosoko i Yesu. Ni tempo etu mamposulo sira lantera ai obor, ai mangkeni sira panaguntu.4 Nainsani ni Yesu ope-ope anu sangangaa mewali i wotoNa. Etumo mpane, laumo Ia mampomberumpaka tau aretu, Napekune, “Ima anu nikadelo?”
5 Rasonoira, “I Yesu toNasare.”
Nauli ni Yesu, “Aku eimo i Yesu.” I Yudasi anu mampobalu i Yesu i iwaliNa, meongko i se etu simbela-mbela ai sira.
6 Awetu naulika sira ni Yesu, “Aku eimo i Yesu”, madungka sira i tana tepatumbole. 7 Napekune mbui ni Yesu, “Ima anu nikadelo?”
Rasonoira, “I Yesu toNasare.”
8 Nauli ni Yesu, “Kuulimowo ni mpongone, Aku eimo i Yesu. Mewali, ane Aku mpuu anu nikadelo, nipogeaka sira topeguruKu ei lambu.” 9 (Nauli ewa etu bona tepabukei Ngkora anu niuliNa amimo, “Lako i ope-ope tau anu Nukiraka Aku, baria ria sadua anu matonto.”)
10 Lako ni se etu, i Simo Peturu mowuka gumana motimbe sadua batua nu Tadulako Menomba Mabose, kono talingana kuana mpane mapudu. Sanga nu batua etu, i Malkus. 11 Nauli ni Yesu si Peturu, “Unsa mpesola gumamu i panguluana! Nipenokamupae Kupoginsuka kapari anu napakanotoka amimo Aku nu TuamaKu?”a
I Yesu i lio ni Hanas
12 Roo awetu, surudado nu toRoma ai tadulako nu surudado aretu, ai topekampai-topekampai anu ratudu nu tadulako nu toYahudi, laumo sira mosoko i Yesu, mpane rasilura paleNa. 13 Mpolinguruna rakeni Ia lau si Hanas, pomaniana ni Kayapas. I Kayapas etu, iamo Tadulako Menomba Mabose ni pae etu. 14 I Kayapas etu anu mopatudu sira tadulako nu toYahudi ni banimpia, nauli, “Aginamo sadua tau mamate mopasuru ope-ope tau.”*
I Peturu mosapuaka peulana si Yesu
15 I Simo Peturu ai sadua topeguru ni Yesu anu ntanina meula sira si Yesu. TopeguruNa anu sadua etu, manginsani nu Tadulako Menomba Mabose. Mewali, topeguruNa etu mesuamo simbela-mbela ai i Yesu i karawaa tombi nu Tadulako Menomba Mabose. 16 I Peturu mepegia ngkida i raoa boboka. Lako ni se etu, topeguruNa anu sadua etu, lau mpesolamo ia i raoa merade i towawine anu mokampai boboka, bona i Peturu rapaliu mesua, mpane i Peturu mesuamo i rara simbela-mbela ai ia.
17 Towawine topokampai boboka tombi nu tadulako menomba mabose etu mangulika i Peturu, “Bariapae iko mbui sadua topeguru nu tau dou?”
Nauli ni Peturu, “Baria!”
18 Ni tempo etu, tempo malengi. Mewali, basangkia dua batua ai topekampai sira modumpuli gate apu i karawaa, mpane motoleliki apu rapanderuira. I Peturu mbui meongko mpane manderu simbela-mbela ai sira.
I Hanas mekune si Yesu
19 I rara nu tombi etu, Tadulako Menomba Maboseb mekunemo si Yesu, nauli, “Imada sira ope-ope topeguruMu? Apa anu Nupaguruka sira?”
20 Nauli ni Yesu, “Mololita Aku i kanoto-notona i ope-ope tau. Mepatudu liliu Aku i tombi penombaa ai i Tombi ni Pue Ala, anu paka rapoterusui nu toYahudi. Baria ria anu Kuwunikai. 21 Mewali, mangkiada mpane nupekune Aku ewa etu? Pekunemode i tau anu mangepe Aku mepatudu. Sangangaa rainsanira apa anu Kuuli.”
22 Awetu nauli ni Yesu ewa etu, sadua topokampai tombi nu tadulako menomba mabose anu meongko i tumbiriNa mosopomo lioNa, nauli, “Pebai mpuu Iko mololita ewa etu i Tadulako Menomba Mabose!”
23 Nauli ni Yesu, “Ane baria mamonso anu Kuuli, nuuli ngkimo i se ei apa salaKu. Agaiana ane mamonso pololitaKu, mangkiada mpane nusopo Aku?”
24 Lako ni se etu, i Hanas motudumo sira mangkeni i Yesu lau i Tadulako Menomba Mabose i Kayapas. I tempo etu, pale ni Yesu tesilu mani.
Pesapuaka ni Peturu karombelana ai katolu mbelana
25 I Simo Peturu, tongona mani meongko manderu simbela-mbela ai topokampai. Ria tau anu mangulika ia, “Bariapae iko mbui sadua topeguruNa?”
Nasapuakamo ni Peturu, nauli, “Baria kowo aku!”
26 Ria mbui i se etu sadua batua nu Tadulako Menomba Mabose. Batua etu poka nu tau anu nitimbe ni Peturu talingana. Nauli nu batua etu si Peturu, “Bariapae iko anu kuita ni mpongone i bonde etu simbela-mbela ai i Yesu?”
27 Nasapuaka mbuimo ni Peturu, nauli, “Baria!” Ni tempo etu, motuturuamo manu.
I Yesu rakeni i lio ni Gubernur Pilatu
28 Madondo-dondo, i Yesu rakeni lako i tombi ni Kayapas lau i tombi nu gubernur. Tadulako nu toYahudi, baria sira mesua i rara nu tombi ni gubernur ntena sira mewali keraki mangula atura agamara toYahudi, lawi i gubernur etu baria toYahudi. Ai ane mesua sira i rara nu tombina, baria sira pensani mangkoni pangkoni Pasa. 29 Mewali, i Gubernur Pilatu laumo i raoa mampomberumpaka sira ai mampekune sira, “Apa anu nisalaika tau ei?”
30 Rasonoira, “Ane rapana baria Ia tau anu madaa, kebaria kikeni si gubernur.”
31 Nauli ni Pilatu, “Nialamode Ia! Mpane nipomeso-mesoka kara-karaNa mangula aturami saduduami!”
Rauli nu toYahudi aretu, “Kami, baria rapaliu mosuku tau duduuna mamate.” 32 (Ei mewali bona tepabukei apa anu nauli ni Yesu kono i kamateNa.)c
33 Lako ni se etu, i Pilatu mesua mpesolamo i rara tombi, mpane natudumo sira tauna mangkeni i Yesu i liona, mpane napekune, “Iko mpuupae datu nu toYahudi?”
34 Nasonoi ni Yesu, “Pampekunemu etu, ba lako si iko saduduamu, ba wule nuepe i tau ntanina anu mangulika iko kono si Aku?”
35 Nasonoi ni Pilatu, “Nuinsani mboto, baria aku toYahudi! Agaiana singka toYahudiMuda ai kapala-kapala tadulako menomba, anu mangkeni Iko mai si aku. Sala apada anu Nubabei?”
36 Nauli ni Yesu, “KadatuaKu baria lako i dunia ei. Ane kadatuaKu lako i dunia ei, tau anu meula si Aku batena meewa mamperurui Aku bona baria Aku rasoko ai rasusu i tadulako nu toYahudi. Agaiana kadatuaKu baria lako i dunia ei.”
37 Nauli mbui ni Pilatu, “Datu mpuupae Iko?”
Nasonoi ni Yesu, “Iko saduduamu anu manguli ka Akuna ei datu. Etumo mpane rapoanaka Aku i dunia ei, bona Kupadongka apa anu mamonso. Tau anu mangunde mangula apa anu manoto, mampotuu sira pololitaKu.”
38 Nasonoi ni Pilatu, “Apada lempona kamanoto etu?”
I Yesu rasuku mamate
Roo awetu, lau mbuimo i Pilatu i raoa naulika sira toYahudi, “Baria ria mogalo saudi salaNa kusumba. 39 Agaiana, mangula adami pae-paena i Eo Posusa Pasa, kupawiaka komi sadua tau anu ratarunggu, ba ima peundeami. Mewali, adiwa? Ba niunde ane kupawiaka komi datu nu toYahudi ei?”
40 Monganga-ngangamo sira, raulira, “Inee, inee Ia! Aginada i Baraba!” (I Baraba etu, sadua toperampaki.)