Totomana nu toYahudi motunggai mampopate i Yesu
26
1 Awetu i Yesu roomo mopadongka ope-ope pepatuduNa etu, Naulikamo sira topeguruNa, 2 “Niinsani roeodamo ina dongkamo Eo Posusa Pasa. Ana Manusia ina rasusu i iwaliNa bona rapaku Ia i kau anu rapopombesape.”3 I tempo etu, kapala-kapala tadulako menomba ai totomana nu toYahudi, mogulumo sira i tombi nu Tadulako Menomba Mabose, anu rasanga i Kayapas. 4 Mampogombo sira, adiwa dalara mosoko ngkandii-ndii i Yesu, ai rapopatera. 5 Agaiana raulira, “Inee sala tasoko i eo posusa ei, bona ntena ria kaguneo i olo nu tau wori.”
Sadua towawine mobumbusi i Yesu ai lana wongi
6 Tempo ni Yesu ria i boea Betania, i tombi nu sadua tau anu rasanga i Simo, anu ni banimpia ketangga. 7 Tongora mangkoni i se etu, dongkamo sadua towawine mangkeni sabotolo lana wongi anu masuli mpii balukina, nabubu i woo ni Yesu tanda pebilana. 8 Awetu raita nu topeguruNa apa anu nababei nu towawine etu, marumpu sira, raulira, “Mangkiada mpane lana anu masuli dou, ratende mbero ngkida? 9 Aginamo lana wongi etu, rapobalu bona balukina rakiraka sira tau anu mesiasi.”
10 Nainsani ni Yesu pampekirira, etumo mpane Naulika sira, “Mangkiada mpane nipakasusa rara nu towawine ei? Apa anu nababei si Aku, malompe. 11 Ane tau anu mesiasi, ria mani tempomi motulungi sira lawi ria liliu sira si komi. Agaiana Aku, baria Aku ria liliu si komi. 12 Towawine ei mokando lana wongi i wooKu mopatimama ami ia wotoKu i karapaiwuKu. 13 Kuulika komi: i sumalele dunia, imba ngkida Bambari Malompe rabambari, apa anu nababei nu towawine ei batena rakaendo, baria ina rakalingaka.”
I Yudasi mosusu i Yesu i iwaliNa
14 Ni tempo etu, sadua lako i topeguru ni Yesu anu sampulu rodua, anu rasanga i Yudasi Iskariot, lau i kapala-kapala tadulako menomba, 15 napekune sira, “Ane kususu i Yesu si komi, apa anu ina nikiraka aku?” Mewali rakirakara ia doi pera tolu mpulu mpeka. 16 Lako i se etu, nakadelo ni Yudasi tempo anu malompe bona mosusu i Yesu si sira rasokora.
I Yesu mangkoni pangkoni Posusa Pasa simbela-mbela ai topeguruNa
17 I eo pepuuana Posusa Roti Anu Baria Raragii, maimo sira topeguruNa si Ia, rapekunera, “Pue, imba peundeaMu kipasilolonga pangkoni Pasa anu ina takoni?”
18 Nasonoi ni Yesu, “Laumode komi i sadua tau i rara nu kota, niulika ia ewa ei: ‘Nauli ni Guru, dongkamo tempoKu. Kuunde mamposusai Eo Posusa Pasa ai topeguruKu i tombimu.’” 19 Lau mpuumo sira topeguru ni Yesu, rapeulaira apa anu Naulika sira, mpane mopasilolonga sira pangkoni Pasa.
20 Awetu kawengimo, i Yesu ai topeguruNa anu sampulu rodua momeso sira mangkoni. 21 Tongora mangkoni, nauli ni Yesu, “Nipetingai, sadua lako i olomi ina mampobalu Aku i iwaliKu.”
22 Awetu raepe nu topeguruNa pololitaNa, mapari rarara, mewali sadua-sadua sira mekune si Yesu, raulira, “Ba aku Pue?”
23 Nasonoi ni Yesu, “Tau anu motubuka rotina santabo-ntabo ai Aku, iamo anu ina mampobalu Aku. 24 Mamonso mpuu, Ana Manusia batena mamate ewa anu tepakanotomo i rara nu Sura Ngkora Magali. Agaiana maruminsi kasurewu nu tau anu mampobalu Ana Manusia. Aginamo tau etu, ineemo rapoanaka.”
25 Lako i se etu, nauli ni Yudasi anu ina mampobalu i Yesu, “Ba aku Pue?”
Nasonoi ni Yesu, “Ewa pangulimu etumo!”
26 Tongora mangkoni, naalamo ni Yesu roti mpane manguli maisi kalompena si Pue Ala. Roo awetu, Nabinse-binsemo roti etu mpane Nakiraka sira topeguruNa, Nauli, “Nialamode, ai nikonimode. Eimo wotoKu.” 27 Roo awetu, Naala mbui sambua panginua anu keisi anggoro, mpane manguli maisi kalompena si Pue Ala, mpane Nasusuka sira, Nauli, “Panginumode komi ope-ope. 28 Lawi eimo raaKu anu ina tebubu i kamateKu luwu anu mopakaroso dandi ni Pue Ala, bona teampuni dosa nu manusia. 29 Bona niinsani: mepuu ei-ei, bariamo Kuinu anggoro ei duduuna manginu Aku anggoro anu bou simbela-mbela ai komi, i rara peparentaa nu TuamaKu.” 30 Roo awetu, moduluamo sira sampangka dulua petoia. Awetu roomo sira modulua, lambumo i Yesu ai topeguruNa lako i kota lau i Bulu Saitun.
I Yesu mampopainsanika pesapuaka ni Peturu
31 Lako i se etu, naulika sira ni Yesu, “I kawengi ei mbui, komi ope-ope ina mopalengi Aku, lawi ria teuki i rara nu Sura Ngkora Magali ewa ei:
‘Ina Kupopate Toporewu etu,
duduuna dimbaNa masawu.’ (Sakaria 13:7)
32 Agaiana i ka NapatuwuKu mpesola luwu, moilodo Aku lau i tana Galilea.”
33 Nauli ni Peturu, “Naudapae ope-ope tau mopalengi Iko Pue, agaiana aku baria!”
34 Nauli ni Yesu, “Nukaendo Peturu: i kawengi ei ngkimo lako baria mani motuturua manu, tolu mbelamo Aku nusapuaka.”
35 Nauli ni Peturu, “Naudapae aku mamate simbela-mbela ai Iko, baria mpuu ina kusapuaka ka kuinsaniMu!” Ewa etu mbui pololita nu topeguruNa ntanina.
I Yesu mekakae i Getsemani
36 Roo awetu, dongkamo sira i bonde anu rasanga Getsemani. I se etu, nauli ni Yesu i topeguruNa, “Pomesomode komi i se ei. Lau sala Aku mekakae si dou.” 37 Nabawai i Peturu ai ana ni Sebedeus anu rodua bona mamporangai Ia. Ni tempo etu, mepuumo mawiora Ia ai baria maroroo raraNa. 38 Naulika sira, “Mapari mpuu raraKu, ewa ina mamate Kuepe. I se eimo sala komi, ai mainga-inga komi simbela-mbela ai Aku!”
39 Roo awetu, lau Ia karao saudi, molingkudumo Ia motumpa mekakae, Nauli, “TuamaKu, ane pensani, Nupakarao kowo kapari anu ina morumpa Aku ei. Agaiana baria peundeaKu, peundeaMuda anu mewali.”
40 Roo awetu, mesola Ia i topeguruNa anu tolu, Nasumba sira tongora leta. Nauli si Peturu, “Bariapae nibuku baria leta nauda mogalo sajaa ngkida, mamporangai Aku! 41 Mainga-inga komi ai mekakae komi, bona ntena komi narumpa nu pekelo. I rarami niunde mpuu mobabei anu manoto, agaiana baria nibuku lawi wotomi batena malede.”
42 Lako ni se etu, lau mbuimo Ia mekakae saduduaNa, Nauli, “TuamaKu, ane kapari ei sangangaa mewali si Aku ai baria pensani rapakarao lako si Aku, batena peundeaMuda anu mewali.” 43 Roo awetu, mesola mbuimo Ia i topeguruNa anu tolu, Nasumba sira maleta mbuimo nakeningkaruminsina katetunduara.
44 Napalengi sira ni Yesu lau mekakae mpesola katolu mbelana. PekakaeNa etu simbela ai pekakaeNa anu ni mpongone. 45 Awetu roomo Ia mekakae, mesola mbuimo Ia i topeguruNa anu tolu, Naulika sira, “Maturu ai leta manidapae komi? Peita, dongkamo tempona Ana Manusia rasusu i tau anu madaa. 46 Pematamode komi! Mesolamo kita! Peita, doumo mai tau anu mampobalu Aku.”
I Yesu rasoko
47 Tongona mani i Yesu mololita, dongkamo i Yudasi, sadua lako i topeguruNa anu sampulu rodua, simbela-mbela ai tau wori anu mangkeni guma ai pewombe. Tau aretu raposawaaka sira nu kapala-kapala tadulako menomba ai totomana nu toYahudi, bona lau sira mosoko i Yesu. 48 Naulika amimo sira ni Yudasi tanda, bona rainsanira kaumbana i Yesu, nauli, “Ima anu kuiki, Iamo. Sokomode!” 49 Mewali, awetu sira dongka, laumo i Yudasi mampomberumpaka i Yesu, nauli, “Tabea, Guru!” Mpane naiki.
50 Nauli ni Yesu, “Eidapae tunggaiamu mai, bale!” Mewali mai sira tau wori mogompilisi i Yesu mpane rasokora. 51 Agaiana, sadua topeguruNa anu ria simbela-mbela ai Ia mowuka gumana mpane motimbe batua nu Tadulako Menomba Mabose etu, pudu talingana. 52 Nauli ni Yesu, “Unsa mpesola gumamu! Lawi ima anu mopake guma mampopate rangana, batena ina rapopate mbui ia ai guma. 53 Bariapae nuinsani, ane merade tulungi Aku i TuamaKu, sampalai ngkida ina Naposawaaka mai sampulu rontobu surudado nu malaekaNa, ba melabi mbotoda! 54 Agaiana ane Kubabei ewa etu, baria ina tepabukei apa anu teuki i rara nu Sura Ngkora Magali anu manguli, ope-ope etu sangangaa mewali si Aku.”
55 Ni tempo etu, nauli mbui ni Yesu i tau wori, “Ba tau anu madaada Aku ei, mpane mai nisoko Aku mangkeni komi guma ai pewombe? Molentano eo-eona niinsani mboto kariaKu mepatudu i karawaa nu Tombi ni Pue Ala. Mangkiada mpane baria Aku nisoko ni tempo etu? 56 Agaiana ope-ope ei sangangaa mewali, bona tepabukei apa anu rauki nu nabi-nabi i rara nu Sura Ngkora Magali.” Roo awetu, melangkamo sira ope-ope topeguruNa mopalengi Ia.
I Yesu i lio nu topobotusi kara-kara nu toYahudi
57 Lako ni se etu, tau sira anu mosoko i Yesu mangkeni Ia lau i tombi nu Tadulako Menomba Mabose i Kayapas. Guru-guru agama ai totomana nu toYahudi mogulumo sira i se etu. 58 I Peturu meula ngkarao ngkida, duduuna dongka i karawaa tombi nu Tadulako Menomba Mabose. Mesua Ia i karawaa mpane momeso simbela-mbela ai topokampai i Yesu, lawi mampenoka mangita ba apa anu ina mewali si Yesu.
59 I tempo etu, kapala-kapala tadulako menomba ai ope-ope topobotusi kara-kara nu toYahudi mangkadelo sabi anu baria mamonso bona i Yesu pensani rasuku mamate. 60 Nauda mawori tau anu mewali sabi anu mosalai i Yesu, agaiana posabikira baria pensani mopakanoto bona rasuku mamate Ia. Kasopoana, ria rodua sabi anu lau i lio nu topogombo aretu anu simbela pesonora, 61 raulira, “Nauli nu Tau ei: ‘Tombi ni Pue Ala pensani Kugero, mpane i rarana tolu eo pensani Kuwangu mpesola.’”
62 Meongkomo Tadulako Menomba Mabose naulika i Yesu, “Bariapae Nusonoi tau anu mosalai Iko etu?” 63 Agaiana baria nasonoi ni Yesu. Nauli mbuimo nu Tadulako Menomba Mabose si Ia, “I rara sanga ni Pue Ala anu tuwu, Nuulika kami anu manoto! Ba mamonso mpuu Iko Datu Topesorema, Ana ni Pue Ala?”
64 Nasonoi ni Yesu, “Iko saduduamu anu manguli ewa etu. Ai Kuulika mbui komi: mepuu ei-ei ina niita Ana Manusia, momeso mbai i kuana ni Pue Ala anu makuasa, ai ina niita mbui Ia mendolu mai lako i suruga i wongko gawu.”
65 Awetu naepe nu Tadulako Menomba Mabose apa anu nauli ni Yesu, nasepamo jubana nakeningkarumpuna, mpane nauli, “Tau ei mopakoi i Pue Ala! Bariamo paraluu ria sabi! Niepemo pololitaNa, mopakoi i Pue Ala. 66 Mewali adiwamo pobotusimi?”
Mesono sira ope-ope, raulira, “Sangangaa rapopate Ia!”
67 Lako ni se etu, ria sira anu mowangelusi lio ni Yesu ai morurugii Ia. Ria mbui sira motuko mataNa ai mosopo Ia, 68 mpane raulikara, “Ee! Datu Topesorema! Ulito ba ima anu mosopo Iko?”
I Peturu mosapuaka peulana si Yesu
69 I tempo ni Peturu momeso i karawaa, maimo sadua towawine anu mobago i tombi nu Tadulako Menomba Mabose mangulika i Peturu, “Bariapae iko mbui sadua ranga ni Yesu toGalilea etu?”
70 Agaiana nasapuaka ni Peturu i lio nu ope-ope tau, nauli, “Baria kuinsani apa anu nuuli!”
71 Lako ni se etu laumo i Peturu meongko gompi i boboka nu karawaa. Ria mbui sadua towawine anu mangita ia, mpane naulika sira tau anu i se etu, “Ia ei ria mbui simbela-mbela ai i Yesu toNasare etu.”
72 Nasapuaka mbuimo ni Peturu ai mosumpa, nauli, “Baria mpuu kuinsani tau etu!”
73 Baria masae lako ni se etu, tau anu meongko sira i se etu mogompilisi mbui i Peturu, raulikara, “Manoto ka ikona mpuu sadua rangaNa! Manoto lako i pololitamu, ka toGalileamu.”