I Maria mobasaika lana wongi i paa ni Yesu
12
1 Aono eo lako baria mani Eo Posusa Pasa, laumo i Yesu i Betania, boea pearia ni Lasarus, anu Napatuwu mpesola ni banimpia. 2 Awetu Ia dongka, tau sira i se etu moparia sira susa, lawi matono sira modoko i Yesu i boeara. I Marta morora torare, mpane i Lasarus ai torare sira ria mangkoni simbela-mbela ai i Yesu.3 Tongora mangkoni, maimo i Maria mangkeni lana wongi sabotolo. Lana etu, rababei lako i rari nu kau anu mawongi, ai masuli mpuu balukina. Nabasaika ni Maria lana wongi etu i paa ni Yesu, mpane naparisi ai wuluana. Mawongi sumalele i rara nu tombi etu. 4 Sadua topeguru ni Yesu anu rasanga i Yudasi Iskariot, anu ina mampobalu i Yesu i iwaliNa, manguli: 5 “Masuli mpuu balukina lana etu, kira-kira tolu atuna doi pera.a Mangkiada mpane baria rapobalu ngkimo, mpane balukina rakiraka sira tau anu mesiasi?” 6 Kamonsona, i Yudasi baria mampekiri katuwu nu topesiasi, lawi ia topanangka! Ia anu mopatoro doira topeguruNa, mpane paka naala ngkandii.
7 Nauli ni Yesu, “Pogeakamode! Apa anu nababei ei, mopatimama amimo wotoKu i karapaiwuKu. 8 Ane tau anu mesiasi, ria liliu sira ai komi, agaiana Aku baria ria liliu ai komi.”
Tadulako nu toYahudi motunggai mampopate i Lasarus
9 Mawori toYahudi mangepe kariana i Yesu i Betania, etumo mpane laumo sira mampeita Ia. Kalaura ni tempo etu, baria wule mampeita i Yesu, agaiana mampenoka mbui sira mangita i Lasarus anu nipatuwu mpesola ni Yesu ni banimpia. 10 Mewali, kapala-kapala tadulako menomba, mogombomo sira mampololita tunggaiara mampopate mbui sira i Lasarus. 11 Nakeningka iana, mawori toYahudi mopalengi kapala-kapala tadulako menomba, mpane mepotuu sira si Yesu.
I Yesu mesua i Yerusale radupa nu tau wori
12 Ewa ineilena, mawori tau anu ina mamposusai Susa Pasa, mangepe kamai ni Yesu monontosi Yerusale, 13 mewali mangalamo sira tawe nu kau anu ewa tawe nu pangana,b mpane lau radupara. Monganga-nganga liliumo sira, raulira:
“Hosana!
I Pue Ala mowati Ia anu mai i rara nu sangaNa!
I Pue Ala mowati Datu nu toSaraeli!” (Dulua Petoia 118:25-26)
14 Naalamo ni Yesu sambaa ana kalide, Napodara. PampodaraNa ana kalide etu mopabukei Ia lolita nu nabi ni banimpia anu manguli:
15 “Towawine Sion,c inee komi maeka.
Peita! Dou mai Datumi,
mampodara sambaa ana kalide.” (Sakaria 9:9)
16 Ni tempo etu, topeguruNa baria mani manginsani apa lempona anu mewali etu. Agaiana awetu roomo i Yesu rapopate mpane rapomabose, mokaendomo sira apa anu teuki i rara Sura Ngkora Magali anu mopadongka amimo apa anu mewali si Yesu.
17 Ria mbui sira tau wori i Yerusale anu simbela-mbela ai i Yesu ni banimpia i porondeNa i Lasarus lako i rara nu talumba i ka Napatuwuna mpesola. Tau aretu mololita liliu sira kono apa anu mewali. 18 Etumo mpane mawori mpii sira tau lau mampomberumpaka i Yesu, lawi mangepe sira ka Iana anu mobabei tanda kuasa etu. 19 Mololitamo sira toParisi, raulira sadua ai sadua, “Manangimo kita ei! Peita, ope-ope tau i dunia meula si Ia.”
ToYunani mampenoka mangita i Yesu, mpane i Yesu mampololita kono i kamateNa
20 Mawori tau lau i Yerusale, bona mamposusai Eo Posusa Pasa. I olo nu tau aretu, ria mbui sira basangkia dua toYunani. 21 ToYunani aretu lau sira si Pilipu, raulira, “Mampenoka kowo kami mampomberumpaka i Yesu.” (I Pilipu etu lako i Betsaida i tana Galilea.)
22 Laumo i Pilipu mopadongka pololitara si Andaria, mpane roo awetu, sira roduara lau mopadongkaka i Yesu. 23 Naulika sira ni Yesu, “Dongkamo tempona, Ana Manusia rapomabose. 24 Kamonsona Kuulika komi: Aku pensani rapandiri ewa saogu gandu. Ane saogu gandu baria manawu nsalaa i tana mpane mamate, batena ia saogu gandu ngkida. Agaiana ane rasawumo ina tuwu mpane mewali maisi. 25 Tau anu wule mampokakaia katuwuna, baria ina mansumba katuwu. Agaiana tau anu baria mampokakaia katuwuna i dunia ei, ina mansumba katuwu malompe anu baria mokasopoa. 26 Tau anu mampenoka mewali batuaKu, sangangaa meula si Aku, bona imba kalauaaKu, i se etu mbui ia. Ai ima anu mewali batuaKu ina nabila nu TuamaKu.”
27 “Masusa raraKu. Baria Kuinsani apa anu sangangaa Kuuli, lawi napombediingi Aku nu raraKu. RaraKu ei mampenoka mekakae ewa ei: ‘Uma, Nupawia kowo Aku lako i kapari anu ina morumpa Aku ei!’ Agaiana etumo tunggaiaKu mai i dunia, bona mantodisa Aku kapari etu. 28 Uma, toiamode sangaMu!”
Roo awetu, ria sambua wotu lako i langi anu manguli, “Roomo Kutoia sangaKu ai ina Kutoia mpesola.”
29 Tau wori anu mangepe wotu etu, manguli, “Etu pomomoni nu gumpata!” Agaiana ria mbui sira manguli, “Baria! Ria sadua malaeka anu tongona mololita ai Ia!”
30 Naulika sira ni Yesu, “Wotu anu niepe etu, baria dongka si Aku, agaiana dongka si komi, bona maroso pepotuumi. 31 Ei-ei dongkamo tempona i Pue Ala sangangaa mobotusi kara-kara nu manusia i dunia. Ai dongka mbuimo tempona Datu nu Seta anu mokuasai dunia ei sangangaa ranawu. 32 Agaiana Aku, ane rapakawane Aku i dunia, ina Kukeni ope-ope taud si Aku.” 33 Lolita ni Yesu etu mopakanoto adiwa kaina rapopateNa.
34 Rauli nu tau wori, “I rara Atura ni Musa teuki: Datu Topesorema tuwu duduuna kasae-saeana. Mangkiada mpane Nuuli Ana Manusia sangangaa rapakawane i dunia? Ima Ana Manusia etu?”
35 Naulika sira ni Yesu, “Sampalai ngkida, pewangka anu mopakabaa komi ei-ei bariamo ina ria simbela-mbela ai komi. Molumako liliumo komi i rara kamabaana i tempona pewangka etu ria mani si komi, bona ntena komi narumpa nu kamadedi. Tau anu molumako i rara kadediana, baria sira manginsani imba kalauaara. 36 Nipotuumode pewangka etu, i tempona mani pewangka etu ria i olomi, bona tuwu komi i rara nu pewangka.”
Awetu i Yesu roomo mopadongka ope-ope etu, malambumo Ia lako i se etu, ai bariamo Ia mopatongawa wotoNa i tau wori.
ToYahudi baria mepotuu si Yesu
37 Naudapae maisi tanda kuasa anu nababei ni Yesu i lio nu toYahudi, baria mani sira mepotuu si Ia. 38 Bona tepabukei lolita ni nabi Yesaya ni banimpia anu manguli:
“Pue, ima anu mepotuu i pobambariki?
Naudapae sira Nupopeitaka kuasaMu, baria mani sira mepotuu.” (Yesaya 53:1)
39 Mewali, baria sira pensani mepotuu, lawi ria mbui anu nauki ni nabi Yesaya ni banimpia ewa ei:
40 “Nauli ni Pue Ala:
‘Kuoaka sira Kupakabilo, ntena sira meita.
Kupakakoo rarara, bona baria sira manginsani peundeaKu.
Kasopoana baria sira mesola si Aku,
ai baria sira Kusorema.’” (Yesaya 6:10)
41 Lolita etu napadongka ni nabi Yesaya ni banimpia kono si Yesu, lawi naita amimo peawaNa.
42 Naudapae ewa etu, ria mbui sira tadulako nu toYahudi anu mepotuu si Yesu. Agaiana i rarara ngkida mepotuu, lawi mampokaeka sira toParisi; maeka sira ina bariamo rapaliu mesua i tombi penombaa. 43 Lawi anu rapailodo mpii iamo petoia lako i manusia, baria sira mangkadelo petoia anu lako si Pue Ala.
Lolita ni Yesu anu kasopoana i tau wori
44 I Yesu mololita masisimbuku, Nauli, “Tau anu mepotuu si Aku, baria Aku ngkida anu rapotuura, mepotuu mbui sira si Pue Ala anu motudu Aku. 45 Tau anu mangita Aku, mangita mbui sira i Pue Ala anu motudu Aku. 46 Mai Aku i dunia ei mewali pewangka, bona ope-ope tau anu mepotuu si Aku bariamo sira meari i rara nu kadediana.
47 Tau anu mangepe pololitaKu agaiana baria rapeulaira, baria Aku anu mosuku sira. Lawi tunggaiaKu mai i dunia ei, baria Aku mai mosuku manusia. Mai Aku, bona mosorema sira lako i suku dosara. 48 Tau anu mosapuaka Aku ai baria modoko pololitaKu, riamo anu ina mosuku sira. Lolita anu Kupadongka, etumo anu ina mosuku sira i eo pobotusi kasopoa dunia. 49 Lawi pololitaKu baria lako i peundeaKu saduduaKu. Kupadongka ai Kupololita apa anu napatuduka Aku nu TuamaKu, lawi Iamo anu motudu Aku mai. 50 Ai Kuinsani: parentaNa etu moparia katuwu malompe anu baria mokasopoa. Mewali, apa anu Kuuli ei, batena lolita anu Napadongka amimo nu TuamaKu.”