I Yesu ratoia nu tau wori tempoNa ina mesua i Yerusale
11
1 Gompimo sira i kota Yerusale, dongka sira i boea Betpage ai Betania i Bulu Saitun. I se etu, i Yesu motudumo rodua topeguruNa moilodo, 2 Naulika sira, “Laumode komi i boea anu talio dou mai. Ane dongka komi si dou, ina niita sambaa ana kalide anu tetaka, anu baria mani sambela rapodara. Nikakasi lako i potakaana mpane nikenika Aku mai. 3 Ane ria tau mekune si komi mangkiada mpane nikakasi, niulika sira: ‘Naparaluu ni Pue, polo Napopesola mboto.’”4 Kalau nu topeguruNa anu rodua aretu, rasumbara mpuumo sambaa ana kalide anu tetaka i wiwi nu dala, gompi i boboka nu tombi, mewali kasaliu rakakasira. 5 Tau anu meongko sira i se etu mekune si sira, “Mangkiada mpane nikakasi kalide ei?”
6 Rasonoira ewa anu naulika sira ni Yesu ni mpongone. Awetu raepe nu tau aretu pololitara, rapatumbeika sira mangkeni kalide etu si Yesu. 7 Kalide etu rakenira lau si Yesu mpane ralampiira ai jubara. Roo ralampiira, mensawimo i Yesu, laumo sira monontosi Yerusale. 8 Dongkamo tau wori, ria sira anu mowoke jubara i tongo dala anu napoliungi ni Yesu, ai ria mbui sira modampa daa nu kau anu ketawe i tongo dala, anu radoara mai i bonde anu i wiwi dala etu, tanda pampomabosera i Yesu. 9 Tau wori aretu, ria anu i talikuNa, ria sira anu ilodoNa, monganga-nganga liliu sira, raulira:
“Hosana!a
Rawatimo Ia anu mai i rara nu sanga ni Pue!
10 Ina tongawa peparentaNa.
Rawatimo peparenta ni Datu Daudi, ulububuta.
Sorema kami Pue Ala ai sinangka kamakuasaMu!” (Dulua Petoia 118:25-26)
11 Kadongka ni Yesu i kota Yerusale, kasaliu mesua Ia i rara nu Tombi ni Pue Ala. I se etu Napeita lompe mantoleli. Roo ni se etu, lawi ina kawengimo, mesola mbuimo Ia ai topeguruNa anu sampulu rodua lau sira maturu i boea Betania.
I Yesu mogane kau ara
12 Ewa ineilena lako i Betania, mesola mpesola sira lau i Yerusale. Tongora molumako maoromo i Yesu. 13 Karao mani, Naita sampuu kau ara anu mabumbu tawena. Laumo Ia i kau etu Napeita ba ria wuana. Agaiana baria mogalo saogu wuana, lawi baria mani tempona mowua. 14 Etumo mpane i Yesu moganemo kau etu, Nauli, “Mepuu eo ei, bariamo ria sadua tau anu ina mangkoni wuamu.” Raepe nu topeguruNa pololitaNa etu.
I Yesu moliwu tau anu mobalu-balu i Tombi ni Pue Ala
15 Dongka mbuimo sira i Yerusale, laumo i Yesu i karawaa Tombi ni Pue Ala. Ni se etu, Naliwumo sira tau anu mobalu-balu ai topebaluki sira. Nadungka meja nu topontolosi doi, ai Nadungka mbui pomesoa nu topobalu-balu tosi manggebodo. 16 Baria Napaliu tau mangkeni anu-anura mambonta karawaa nu Tombi ni Pue Ala. 17 Roo awetu, Napatudu sira, Nauli, “Bariapae niinsani apa anu teuki i rara Sura Ngkora Magali? Nauli ni Pue Ala ewa ei:
‘TombiKu iamo tombi pekakaeaa anu rapake nu tau lako i sumalele dunia.’
Agaiana komi, nipopewalida tombi nu toperampaki!” (Yesaya 56:7; Yeremia 7:11)
18 Awetu raepe nu kapala-kapala tadulako menomba ai guru-guru agama, apa anu nababei ai anu napololita ni Yesu, karao rarara lawi ope-ope tau wori tedii rarara mampetingai pepatuduNa. Etumo mpane mangkadelomo sira dala mampopate Ia. 19 Awetu ina madedimo, i Yesu ai topeguruNa lambumo sira lako i kota Yerusale.
Patudu ni Yesu kono i pekakae
20 Ewa ineilena madondo-dondo, lau mbuimo sira i Yerusale. I tongo dala, mangita sira kau ara anu nagane ni Yesu, matemo mabangi dongka i rarina. 21 Nakaendomo ni Peturu lolita ni Yesu. Etumo mpane naulika i Yesu, “Guru! Peitapae kau ara anu niganeMu etu, mabangimo!”
22 Nauli ni Yesu, “Pepotuumode komi si Pue Ala! 23 Kamonsona, ane niparentai bulu etu: ‘Teongko ai tetende i rara nu tasi!’ Batena mewali asala lako i rarami mpuu ai nipotuu apa anu niuli etu. 24 Mewali, nipetingai pololitaKu ei: ane mekakae komi mamperade ba apa-apa, nipotuu mpuu ka Nakirakami ni Pue Ala apa anu niperade etu, batena nidoko.
25 Ane ina mekakae komi, agaiana baria mani komi mombesingkalompe ai tau anu niposisalaka, sangangaa niampuni nsalaa tau etu, bona Tuamami anu i suruga moampuni mbui salami. [ 26 Agaiana ane baria niampuni tau etu, Tuamami anu i suruga baria mbui moampuni kamasalami.”]
Tadulako agama Yahudi mampekune si Yesu kalako imbana kuasaNa
27 Mewali i Yesu ai topeguruNa mopapulo sira polumakoara lau i Yerusale. Tongo ni Yesu molulumako i karawaa nu Tombi ni Pue Ala, dongkamo sira kapala-kapala tadulako menomba, guru-guru agama ai totomana nu toYahudi anu ntanina. 28 Mekune sira si Yesu, raulira, “Nuulika kami, lako imba kuasaMu mobabei ope-ope etu? Ima anu mokiraka Iko kuasa etu?”
29 Nasonoi ni Yesu, “Ria mbui sampangka pampekuneKu si komi. Ane nisonoi Aku, lako Kuulida kaimana anu mokiraka Aku kuasa mobabei ope-ope etu. 30 Lako imba mai kuasa ni Yohane Toperiu moriu tau? Lako si Pue Ala, ba lako i manusia?”
31 Mololitamo sira tadulako nu toYahudi etu, sadua ai sadua raulira, “Adiwamo ka tasonoina? Ane tauli lako si Pue Ala kuasaNa, ina Naulika kita: ‘Ane awetu, mangkiada mpane baria komi mepotuu si Yohane?’ 32 Agaiana mapari mbui ane tauli lako i manusia ngkida kuasana.” Tadulako nu toYahudi etu maeka sira mopakoi i Yohane Toperiu ntena sira raewa nu tau wori, lawi ope-ope tau manguli i Yohane etu sadua nabi. 33 Mewali rasonoira, “Baria kiinsani.”
Etumo mpane naulika sira ni Yesu, “Ane awetu, baria mbui komi ina Kuulika kalako imbana kuasaKu mobabei ope-ope etu!”