I Yesu mobaliki ue mewali anggoro
2
1 Liumo roeo lako ni se etu, ria posusa pebua i boea Kana i tana Galilea. Tina ni Yesu ria i posusa etu. 2 I Yesu ai topeguruNa raronde mbui sira lau i posusaa etu. 3 Tongora mosusa, nakaopei sira nu anggoro. Tina ni Yesu mangulika i Yesu, “Opemo anggorora.”4 Nauli ni Yesu, “Tina, apa tunggaiamu mangulika Aku ewa etu? Baria mani dongka tempona Kupopainsanika sira kaimana Aku.”
5 Agaiana, nauli nu tina ni Yesu i topobago i susa aretu, “Apa ngkida anu natuduka komi ni Yesu, nibabei!”
6 I tombi etu, ria aono mbuana gumba anu mabose. Gumba aretu raisii ai ue rapakera mobakosi mangula ada nu toYahudi. Kaisina isi nu gumba aretu, saogu isina kira-kira rongatu kati. 7 Naulika sira ni Yesu topobago aretu, “Nipakabuke gumba aretu ai ue.” Rapakabukera mpuumo gumba aretu ai ue. 8 Roo awetu, Naulika sira, “Sibuiki saudi, mpane nikenika nu topotadulakoi susa.” Rasibuikira mpuumo mpane rakenira lau i topotadulakoi susa.
9 Topotadulakoi susa etu mampemina ue anu rapopewalimo anggoro. Agaiana baria nainsani kalako imbana mai anggoro etu, anu manginsani batena ngkida topobago aretu. Awetu roomo napemina anggoro etu, narondemo tomoane anu rabua, 10 naulika, “Matomo mpuu anggoro ei. Saweweina, anggoro anu matomo sangangaa ilodo rainu nu toposusa. Ane manginumo sira ope-ope anggoro anu matomo etu, lako rapopensuwuda anggoro anu baria gaga matomo rainu. Agaiana iko, nuboli liliu anggoro anu matomo, duduuna ei-ei.”
11 I Yesu mobabei tanda kuasa anu mpolinguruna etu i boea Kana i tana Galilea. Ai tanda kuasa etu, mopatongawa Ia peawaNa. Ni se etu topeguruNa mepotuumo sira si Ia.
12 Roo posusa etu, laumo i Yesu i kota Kapernaum simbela-mbela ai tinaNa, pokaNa ai topeguruNa. Meari sira i se etu basangkia eo kasaena.
I Yesu moliwu topobalu-balu lako i Tombi ni Pue Ala
13 Gompimo tempona eo mabose agama Yahudi anu rauli Eo Posusa Pasa,a etumo mpane laumo i Yesu i Yerusale. 14 I karawaa Tombi ni Pue Ala, Naita sira tau anu mampobalu japi, dimba, ai tosi manggebodo. Ria mbui sira topontolosi doi anu momeso i se etu. 15 Awetu naita ni Yesu ope-ope etu, Nababeimo popesepe lako i koloro mpane moliwu ope-ope japira ai dimbara i karawaa nu Tombi ni Pue Ala. Nadungka-dungkamo mejara topontolosi doi, duduuna masawu doira. 16 Roo awetu, Naulika sira topobalu-balu tosi manggebodo, “Nikeni ope-ope aretu lau i raoa! Tombi nu TuamaKu inee nipopewali tombi pobalu-balua!”
17 TopeguruNa mokaendo apa anu teuki i rara nu Sura Ngkora Magali anu manguli ewa ei:
“Maruminsi pampokakaiaKu TombiMu Pue, etumo anu mosuweki raraKu” (Dulua Petoia 69:10)
18 Lako ni se etu, tadulako nu toYahudi mangulika i Yesu, “Ima anu mokiraka Iko kuasa mobabei etu? Ane ria mpuu kuasaMu, Nupopeitaka kami sambua tanda kuasa!”
19 Nauli ni Yesu, “Nigeromode Tombi ni Pue Ala ei, mpane ina niita mpuu i rarana tolu eona Kuwangu mpesola.”*
20 Rapotingkara nu tadulako nu toYahudi aretu, etumo mpane raulira: Tombi ni Pue Ala ei anu rawangu i rarana iba mpulu aono mpaena. “Pensanipae, ina Nuwangu mpesola i rarana tolu eo ngkida?”
21 Kamonsona, wotoNa saduduaNa anu Natunggai i tempoNa mololita kono i Tombi ni Pue Ala. 22 Mewali, i katuwu mpesola ni Yesu, topeguruNa mokaendo pololitaNa etu, mpane rapotuuramo apa anu teuki i rara nu Sura Ngkora Magali ai apa anu nauli ni Yesu.
I Yesu manginsani rara nu ope-ope tau
23 Tongo ni Yesu i Yerusale i Eo Posusa Pasa, mawori tau mepotuu si Ia, lawi mangita sira tanda-tanda kuasa anu Nababei. 24 Agaiana i Yesu saduduaNa baria Napotuu tau aretu, lawi Nainsani asa apa anu i rara nu ope-ope tau aretu. 25 Baria paraluu tau mangulika Ia kono si ima ngkida, lawi Nainsani mpuu apa anu i rara nu manusia.