Bambari Malompe anu nauki ni
Yohane
Ngkora ni Pue Ala mewali manusia
1
1 Mpolinguruna, lako baria mani dunia rateru, riamo Ngkora.Ngkora etu, aminamo simbela-mbela ai i Pue Ala,
ai Ngkora etu iamo i Pue Ala saduduaNa.
2 Mpolinguruna Ia simbela-mbela ai i Pue Ala.
3 Sinangkana anu mewali nateru ni Pue Ala mampoliungi Ia.
Baria ria sampangka anu mewali ane baria mampoliungi Ia.
4 Iamo puu nu katuwu.
Ai katuwuNa mopakabaa rara nu manusia.
5 Iamo pewangka anu mewangka liliu i rara nu dunia anu madedi ei,
ai baria Ia pensani nanangi nu kamadedi.
6 Sambela tempo, dongkamo sadua tau anu natudu ni Pue Ala, sangana i Yohane.a 7 I Yohane mopadongka kono i pewangka etu i ope-ope tau, bona mampotuu sira pewangka etu. 8 Agaiana i Yohane baria pewangka etu. Mai ia mopadongka kono i pewangka etu i ope-ope tau.
9 Ngkora etu iamo pewangka anu mamonso
anu mopakabaa rara nu ope-ope tau.
Iamo anu dongka i dunia.
10 Riamo Ia i rara dunia ei. Mampoliungi Ia, dunia rateru
Agaiana ni tempona ria i dunia,
baria Ia rainsani nu tau.
11 Mai Ia i tauNa sira,
agaiana baria Ia radoko nu tauNa sira
12 Agaiana ima-ima anu modoko ai mepotuu si Ia,
siramo anu napopewali ana ni Pue Ala.
13 Baria sira mewali ana ni Pue Ala
lako i karapoanakara ai kuasa nu manusia
ba lako i peundea nu manusia.
Agaiana batena i Pue Ala mpuu anu mampopewali sira anaNa.
14 Ngkora etu mewali manusia.
Mpane meari i olota i dunia ei.
Kiitamo kabose nu kuasaNa.
KuasaNa etu Nasumba lako i TuamaNa,
lawi iamo AnaNa saduduaNa.
Mampoliungi Ia, manginsani kita kabula rara ni Pue Ala ai kamanotoNa.
15 I Yohane mampopainsanika i tau wori kaimana Ngkora etu. Napadongka masisimbuku, nauli, “Ia eimo anu kupakanotoka komi ni banimpia! Kuuli: ria anu ina mai roo aku, agaiana melumbu kuasaNa lako si aku. Lawi lako baria mani aku rapoanaka, ria amimo Ia.”
16 AsiNa baria mokasopoa,
ai lako i asiNa etu, Nawatimo kita ope-ope.
Baria mabotu-botu pewati anu tasumba lako si Ia.
17 Ni banimpia, mampoliungi i nabi Musa modokomo kita Atura ni Pue Ala.
Agaiana ei-ei mampoliungi i Yesu Kerisitu, tainsani kabula rara ni Pue Ala ai kamanotoNa.
18 Baria ria sadua tau anu mangita i Pue Ala,
batena AnaNa saduduaNa,
anu ria liliu simbela-mbela ai Ia.
Iamo anu mopakanotoka kita kaimana i Pue Ala.
Pesabiki ni Yohane Toperiu
19 Eimo popadongka ni Yohane anu mopadongka kaimana ia. Sambela tempo, tadulako nu toYahudi i Yerusale motudumo sira basangkia dua tadulako menomba ai toLewi lau si Yohane. Awetu sira dongka si Yohane, raulira, “Tunggaiaki mai i se ei bona mekune si iko ba ima iko?”
20 Nasonoi ni Yohane i kamonso-monsona, nauli, “Baria aku Datu Topesorema.”
21 Mekune mbuimo sira, “Ane ewa etu, ima iko? Ba i nabi Elia iko?”
Nauli ni Yohane, “Baria.”
Mekune mbuimo sira, “Ba ikomo i nabi maboseb anu radandi ni banimpia anu rauli ina mai i dunia?”
Nauli ni Yohane, “Baria mbui aku.”
22 Lako ni se etu, raulira, “Ane awee, nuulika kami ba ima mpuu iko, bona ria sonoina pekune nu tau anu motudu kami. Apa pesonomu kono i wotomu saduduamu?”
23 Nasonoi ni Yohane ai lolita ni nabi Yesaya ni banimpia, nauli:
“Aku ei, tau anu mongare-ngare i pada lori mopadongka:
‘Kaina dongkana i Pue.
Nipatimama dalaNa!’” (Yesaya 40:3)
24-25 Rauli mbui tudua nu toParisi aretu, “Ane baria iko i Datu Topesorema, baria iko i nabi Elia, ai baria mbui iko nabi anu radandi, mangkiada mpane pebai iko moriu tau?”
26 Nauli ni Yohane, “Aku moriu tau ai ue ngkida. Ei-ei riamo sadua i olomi, agaiana baria mani niinsani. 27 Iamo anu dongka roo aku. Mogaloda mokakasi petapu nu kandupaNa, baria aku sintoto.” 28 Ope-ope etu mewali i Betania, mbai mataeo ue Yarade, i periua ni Yohane.
I Yesu iamo Ana Dimba anu napatimama ni Pue Ala
29 Ewa ineilena, i Yohane mangitamo i Yesu mai si ia. Nauli i tau wori, “Nipeita! Doumo mai Ana Dimba anu napatimama ni Pue Ala. Iamo anu ina mewali pasuru nu wotota anu mosompo dosa manusia. 30 Iamo anu kuuli ni banimpia ina dongka roo aku, agaiana melumbu kuasaNa lako si aku. Lawi lako baria mani aku rapoanaka, Ia aminamo ria. 31 Mpolinguruna, baria mani mbui kuinsani ka Ianamo Datu Topesorema. Agaiana eimo tunggaiaku mai moriu sira toSaraeli ai ue, bona kutudoka sira kaimana Datu Topesorema etu.”
32-34 I Yohane mbui, mopadongka ei, nauli, “Mpolinguruna baria mani kuinsani ka i Yesuna Datu Topesorema. Agaiana i Pue Ala motudu aku moriu tau ai ue, Naulika aku ewa ei: ‘Ane nuita Inosa Magali mendolu mpane meari i sadua tau, Tau etumo anu ina meriu ai Inosa Magali.’ Mewali, kuita mpuumo Inosa Magali mendolu ewa tosi manggebodo lako i langi mpane meari si Yesu. Etumo mpane kuuli: i Yesu iamo Ana ni Pue Ala.”
Rodua topeguru ni Yohane meula si Yesu
35 Ewa ineilena, i Yohane ria mbuimo i se etu simbela-mbela ai rodua topeguruna. 36 Awetu naita i Yesu moliu, nauli, “Peita, dulaumo Ana Dimba ni Pue Ala!” 37 Awetu raepe nu topeguru ni Yohane anu rodua pololitana, laumo sira meula si Yesu.
38 Membalilimo i Yesu, Naita sira meula. Napekune sira, “Apa anu nikadelo?”
Raulira, “Guru, imba peariaMu?”
39 Nauli ni Yesu, “Maimode komi, nipeita saduduami.” Meulamo sira si Ia dongka i peariaNa. Mepuu tinti iba, i se etumo sira simbela-mbela ai Ia.
40 Tau anu rodua aretu meula sira si Yesu nakenimpangepera lolita ni Yohane. Sadua lako si sira, sangana i Andaria, poka ni Simo Peturu. 41 I Andaria kasaliu lau mangkadelo i Simo, naulika, “Kisumbamo anu rauli i Mesias” (Anu rauli mbui i Kerisitu.c) 42 Roo awetu, i Andaria mangkeni i Simo lau si Yesu.
I Yesu mototoki i Simo, Naulika, “Iko Simo ana ni Yohane, mepuu ei-ei, ina rasanga iko i Kefas.” (“I Kefas” rauli mbui “Peturu”.d)
I Yesu moronde i Pilipu ai i Natanael
43 Ewa ineilena, i Yesu lau i tana Galilea. I polumakoana mampomberumpaka i Pilipu mpane Naulika, “Ulamode Aku!” 44 I Pilipu etu, lako i kota Betsaida, boea ni Andaria ai i Peturu.
45 Lako ni se etu, lau mbuimo i Pilipu mampomberumpaka rangana anu rasanga i Natanael, naulika, “Kisumbamo Datu Topesorema, ewa anu teuki i rara nu Sura Atura ni Musa ai sura nu nabi-nabi ni banimpia! Sangana i Yesu lako i Nasare, ana ni Yusupu.”
46 Mesono i Natanael, nauli, “Riapae anu malompe i kota Nasare anu kokoi dou?”
Nauli ni Pilipu, “Maingkomode, bona nuita!” Mewali lau mpuumo sira si Yesu.
47 Awetu naita ni Yesu i Natanael mai mepomberumpaka Ia, mololita Ia, Nauli, “Doumo mai sadua toSaraeli anu malompe mpuu babeiana, baria ia topodongko!”
48 Nauli ni Natanael, “Adiwada mpane Nuinsani aku, Guru?”
Nauli ni Yesu, “Lako baria mani iko naronde ni Pilipu, Kuitamo iko i puu nu kau ara.”
49 Nauli ni Natanael, “Guru, Ana ni Pue Ala mpuu Iko! Iko mpuumo Datu nu toSaraeli!”
50 Nauli ni Yesu, “Ba nakenimpanguliKu Kuitamo iko i puu nu kau ara, mpane nupotuu Aku? Baria wule etu, agaiana ina nuita mbui tanda kuasa anu melumbu kabosena lako i se etu.” 51 Roo awetu, nauli mbuimo ni Yesu, “Bona niinsani: ina niita langi tebungkasi mpane malaeka ni Pue Ala mempone mpane mendolu mai i Ana Manusia.”*