Bambari Malompe anu nauki ni
Markus
I Yohane Toperiu mopadongka Ngkora ni Pue
1
1 Eimo Bambari Malompe, kono si Yesu Kerisitu, Ana ni Pue Ala. 2 Bambari Malompe ei, mepuu ewa anu nauki ni nabi Yesaya ni banimpia. I Pue Ala manguli ewa ei:“Eimo tau anu Kutudu moilodo,
bona mopatimama dalaMu lako baria mani Iko Kutudu.” (Maleaki 3:1)
3 “Iamo anu mongare-ngare i pada lori, nauli:
‘Ina dongka i Pue!
Nipatimama dalaNa.
Nipakanoto dala anu ina Napoliungi.’” (Yesaya 40:3)
4 Mangula apa anu teuki etu, dongka mpuumo i Yohane Toperiu i pada lori. Meriu ia ai mobambari Ngkora ni Pue Ala i tau wori, nauli, “Penonsomode komi lako i dosami ai nisusumode wotomi rariu bona dosami naampuni ni Pue Ala.” 5 Mawori tau lau i pada lori mampenoka mampetingai lolita ni Yohane. Ria sira anu lako i kota Yerusale ai anu lako i sumalele tana Yudea. Awetu raepera pololita ni Yohane Toperiu, rapangakura ai rapenonsoira dosara, mpane nariu sira ni Yohane i ue Yarade.
6 Pesampi ni Yohane rababei lako i wulu onta, pampouna lako i kolimba,a pangkonina kakomba ai tinasa. 7 Napadongka ni Yohane Toperiu bambari ei, nauli, “Ina dongka sadua Tau anu melumbu kamakuasaNa mpane lako si aku. Mogaloda mokakasi petapu nu kandupaNa, baria aku sintoto. 8 Aku moriu komi ai ue, agaiana Ia ina moriu komi ai Inosa Magali.”
I Yesu nariu ni Yohane ai nakelo Datu nu Seta
9 Roo awetu, dongkamo i Yesu lako i Nasare i tana Galilea, mampoperiu si Yohane i ue Yarade. Mewali nariumo Ia ni Yohane Toperiu. 10 Awetu i Yesu mensuwu lako rara nu ue, mengoa Ia, Naita langi tebungkasi mpane Inosa Magali mendolu mai ewa tosi manggebodo mengkatoa si Yesu. 11 Roo awetu, raepemo wotu ni Pue Ala lako i langi anu manguli, “Ikomo AnaKu anu Kupokakaia ai Kupokatono.”
12 Roo awetu, Inosa Magali mangkeni i Yesu lau i pada lori. 13 Meari Ia i se etu iba mpulu eo kasaena, ai ni tempo etu nakelo Ia Datu nu Seta. I pearia etu, ria binata anu maila, ai tempoNa ni se etu, malaeka-malaeka morora Ia.
I Yesu moronde iba tau mewali topeguruNa
14 Baria mani masae lako i karoona i Yohane Toperiu rasoko mpane ratarunggu, laumo i Yesu i tana Galilea, ai mopadongka Bambari Malompe anu lako si Pue Ala, 15 Nauli, “Dongkamo tempona peparenta ni Pue Ala i dunia, ina rapepuumo! Penonsomode komi lako i dosami, nipotuumode Bambari Malompe.”
16 Tongo ni Yesu molumako i wiwi rano Galilea, Naitamo rodua tau ntalitoi, sangara: I Simo ai i Andaria, toina. Ni tempo etu, tongora mojala i rano, lawi sira aretu bagora topangkadelo bau i ue. 17 Naulika sira ni Yesu, “Maingkomode komi niula Aku! Bariamo bau anu nijala, agaiana manusiamo.” 18 Rapalengira mpuumo jalara, ai mepuu ni eo etu, meulamo sira si Yesu.
19 Roo ni se etu, napaliliumo ni Yesu polumakoNa, mpane Naita mbui rodua tau ntalitoi: i Yakobu ai i Yohane, ana ni Sebedeus, tongora mopakalompeki jalara i rara duanga. 20 Naronde sira ni Yesu bona meula sira si Ia. Mewali, rapalengira mpuumo tuamara ai topobagora i rara nu duangara, mpane meulamo sira si Yesu.
I Yesu mopakaosa tau anu nakuasai nu seta
21 Lako ni se etu, i Yesu ai topeguruNa dongka i kota Kapernaum. Awetu i eo penombaa nu toYahudi, mesua i Yesu i rara nu tombi penombaa mpane mepuu mepaguru. 22 Mawuli rara nu tau sira mangepe pepatuduNa, lawi pepatuduNa baria ewa pepatudu nu guru-guru agama Yahudi. Lawi mepatudu Ia i rara nu kamakuasaNa.
23 I tempo etu, ria sadua tau anu nakuasai nu seta mesua mbui i tombi penombaa, mpane monganga-nganga, nauli, 24 “Ee Yesu toNasare! Ina Nupadiwaka kami? Ba Nupenoka mopakaropu kami? Kuinsani ka Ikona mpuu anu magali lako si Pue Ala.”
25 Agaiana nauli ni Yesu, “Mandii iko! Pelosomode lako i tau etu!” 26 Seta aretu mampopokarumbetu tau etu, mpane monganga-nganga. Ni tempo etu mbui, melosomo seta aretu.
27 Tingkaramo sira ope-ope tau anu mangita etu, duduuna mololita sira, raulira sadua ai sadua, “Apa ei? Eimo patudu anu bou, ai Tau ei makuasa mpuu! Mogaloda seta, mampeulai sawaaNa!” 28 Lako ni se etu, bambari kono si Yesu tebambarimo i sumalele tana Galilea.
Yesu mopakaosa mawori tau
29 Pesola ni Yesu lako i tombi penombaa etu, simbela-mbela Ia ai i Yakobu, i Yohane, lau sira i tombi ni Simo ai Andaria. 30 Kadongkara ni se etu, raulikara i Yesu: pomaniana woto ni Simo anu towawine, tongona napawembe i paturuana. 31 Mewali mesuamo i Yesu, Napatoro palena ai Napopomeso, kasaliu maosa towawine etu ai kasaliu morora sira.
32 Awetu malimpamo eo, mawori tau mai si Yesu mangkeni ope-ope tau anu madua ai anu nakuasai nu seta. 33 Mawori tau i kota etu, mai moterusu i karawaa nu tombi ni Simo. 34 Mpane i Yesu mopakaosa mawori tau lako maisi mpangkana saki, ai mampopeloso mawori seta. Agaiana seta aretu, baria sira napaliu ni Yesu mololita, lawi rainsanira mpuu kaimana Ia.
I Yesu mepatudu i kota-kota ntanina
35 Ewa ineilena gompi mabaa, mematamo i Yesu mpane lambu lako i kota etu lau i pearia anu maboa, mpane mekakae. 36 Mewali i Simo ai rangana lau mangkadelo Ia. 37 Rasumbaramo, raulikara, “Mawori tau mangkadelo Iko Guru.”
38 Nasonoi sira ni Yesu, “Laumo kita i kota ntanina anu gompi, bona Kubambari mbui Ngkora ni Pue Ala si dou. Lawi etumo tunggaiaKu mai i dunia.” 39 Roo ni se etu, laumo i Yesu ai topeguruNa mobambari Bambari Malompe i sumalele tana Galilea. Mepatudu Ia i rara nu tombi-tombi penombaa, ai mampopeloso seta anu mokuasai tau.
I Yesu mopakaosa sadua tau anu mosaki tangga
40 Ria sadua tau anu ketangga anu mai molingkudu i lio ni Yesu. Merade tulungi ia, nauli, “Kuinsani ka Nubukuna mopakaosa aku. Ane Nuunde, pakaosa kowo aku.”
41 Maasi rara ni Yesu mangita ia. Etumo mpane Napatoro tau etu ai Naulika, “Kuunde, kaosamode!” 42 Ungangkidamo, maosa ia. 43 Roo ni se etu, natudu ni Yesu bona lambu ia, Naulika: 44 “Inee mpuu nupololita si ima ngkida apa anu mewali ni mpongone. Laumode nupopeitaka wotomu i tadulako menomba, bona napakanoto kamaosamumo, ai nukeni popenombamu mangula sawaa anu teuki i rara Atura ni Musa, bona tongawa i ope-ope tau kamaosamumo.” 45 Agaiana, imba ngkida kalauaana tau etu, mampololita liliu ia ka Napakaosanamo ni Yesu. Etumo mpane, i Yesu baria pebai mopatongawa wotoNa ane mesua i rara nu kota, lawi mawori tau anu mangkadelo Ia. Mewali i Yesu, meari ngkida i raoa nu kota i pearia anu maboa. Agaiana nauda ewa etu, mawori liliu tau anu dongka lako i kota-kota mampenoka mampomberumpaka Ia.