I Yesu mopakaosa sadua tau anu mapalu
2
1 Baria masae lako ni se etu, i Yesu mesola i kota Kapernaum. Mewali tebambarimo kariana i Yesu i rara nu saogu tombi. 2 Etumo mpane tau wori mai, duduuna buke i rara nu tombi, i boboka ai i lio boboka nu tombi etu buke mbui tau. Napadongkaka sira ni Yesu Ngkora ni Pue Ala. 3 TongoNa mololita, dongkamo sira mai iba dua tau mokowa rangara anu mapalu. 4 Agaiana baria ria dalara mogompilisi i Yesu lawi tombi etu buke tau. Etumo mpane memponemo sira lau i wongko nu tombi etu, mobungkasi ata nu tombi etu anu mototoi i Yesu, ai raulura rangara ai ali bona toa i lio ni Yesu. 5 Awetu naita ni Yesu kabosena pepotuura, Naulika tau anu mapalu etu, “AnaKu, teampunimo dosamu.”6 Ria mbui sira basangkia guru agama nu toYahudi anu momeso i rara nu tombi etu. Mampempekiri sira, nauli nu rarara: 7 “Pebai mpuu tau ei mololita ewa ee! Mopakoi Ia i Pue Ala? Baria ria sadua tau anu pensani moampuni dosa, batena i Pue Ala ngkida.”
8 Agaiana nainsani ni Yesu apa anu ria i rarara. Etumo mpane Naulika sira, “Mangkiada mpane mampekiri komi anu madaa i rarami? 9 Umba anu mamura rauli: ‘Teampunimo dosamu,’ ba ‘peongko, wilulumode alimu, ai polumakomode?’ 10 Bona niinsani, i dunia ei, Ana Manusia, makuasa moampuni dosa.” Lako ni se etu, membalilimo i Yesu i tau anu mapalu ni mpongone etu, 11 Naulika, “Pengkawangu, wilulumode alimu, mpane pesolamode i tombimu!”
12 Meongko mpuumo tau mapalu etu, nawilulu alina, ai molumakomo ia lau i olo nu tau wori. Awetu raita nu tau wori apa anu mewali etu, tingkara sira ope-ope, etumo mpane motoia sira i Pue Ala, raulira, “Baria mani sambela taita anu mewali ewa ei!”
I Yesu moronde i Lewi mewali topeguruNa
13 Roo ni se etu, lau mbuimo i Yesu i wiwi rano Galilea. Mawori mpuu tau mai si Ia, ai Napatudu sira. 14 Tongo ni Yesu molumako, Naita sadua toperuru asele anu momeso i pearia mogulu asele, sangana i Lewi ana ni Alfeus. Nauli ni Yesu si ia, “Peulamode si Aku!” Meongkomo i Lewi, ai kasaliu meula si Ia.
15 Roo awetu, i Yesu ai topeguruNa mangkoni sira i tombi ni Lewi. Tongora mangkoni, mai mbui sira mawori toperuru asele ai tau ntanina mangkoni simbela ai sira, lawi mawori sira meula si Yesu. Tau aretu raimba tau anu madaa babeiara. 16 Ria sira basangkia dua guru agama nu toParisi, mangita i Yesu mangkoni simbela-mbela ai toperuru asele ai tau ntanina anu raimba tau anu madosa, rapekune nu guru-guru agama aretu i topeguruNa, “Mangkiada mpane gurumi mangkoni simbela ai toperuru asele ai tau anu madosa?”
17 Naepe ni Yesu pololitara, etumo mpane Naulika sira, “Tau anu baria madua, baria paraluu mangkadelo sando. Tau anu madua ngkida anu paraluu mangkadelo sando. Baria Aku mai moronde tau anu manoto babeiara. KamaiKu ei, moronde Aku tau anu madosa.”
Topeguru ni Yesu baria mopuasa
18 Sambela tempo, topeguru ni Yohane Toperiu ai topeguru nu toParisi tongora mopuasa. Riamo sira tau anu dongka si Yesu ai mekune si Ia, “Topeguru ni Yohane Toperiu mopuasa. Ewa etu mbui topeguru nu toParisi. Mewali, mangkiada mpane topeguruMu baria sira mopuasa?”
19 Nasonoi sira ni Yesu ai ngkora pandiri ei, Naulika sira, “I posusa pebua, mopuasapae torare ane tomoane anu rabua ria mani i olora? Baria. Lawi ane ria mani tomoane anu rabua i olora, batena mangkoni sira. 20 Agaiana sambela tempo, tomoane anu rabua ina radoa lako i olora. I tempo etuda, lako mopuasada sira.”
21 Roo awetu, napadongka ni Yesu ngkora pandiri anu rompangka, Nauli, “Baria ria sadua tau anu motampilengi badu anu masae ai sansepa bana anu bou. Lawi sansepa bana anu bou kasae-saea kalalaua mengkuru, mpane masepa badu anu masae etu, duduuna kalalaua maemba kasepaana. 22 Ewa etu mbui, baria ria tau anu mokando anggoro anu bou i pamboliaa anu masae. Lawi ane masumawo anggoro etu, ina masepa pambolia anu masae etu, duduuna mabubu anggoro etu, ai marugi mbui pambolia etu. Mewali, anggoro anu bou sangangaa rakando i pambolia anu bou.”b
Tadulako agama Yahudi mosalai i Yesu lawi topeguruNa mobago i eo penombaa
23 Sambela tempo i eo penombaa nu toYahudi, i Yesu ai topeguruNa moliu sira i sambua bonde. Tongora moliu i bonde etu, topeguruNa mopupu sira wua nu gandu. 24 ToParisi anu ria sira i se etu mekune si Yesu, raulira, “Mangkiada mpane topeguruMu moliungi atura agamata? Mobago sira i eo penombaata!”
25 Nauli ni Yesu, “Bariapae nibasa apa anu nababei ni Datu Daudi, i tempona ia ai rangana maoro? 26 I tempona i Abiatar mewali Tadulako Menomba Mabose, mesuamo i Daudi i rara nu Bambaru Penombaa, mpane mangkoni roti anu rapopenomba si Pue Ala, mpane nakiraka mbui sira rangana. Mangula ada agamata, tadulako menomba ngkida anu pensani mangkoni roti etu. Agaiana nauda ewa etu, babeia ni Datu Daudi etu baria rasalai.” 27 Lako i se etu, nauli mbui ni Yesu, “I Pue Ala moparia eo penombaa, baria bona mopakapari manusia, agaiana bona motulungida manusia. 28 Mewali, Ana Manusia, ria kuasaNa manguli apa anu pensani rababei i eo penombaa.”