Topeguru ni Yesu mopupu gandu i eo penombaa
6
1 Sambela tempo i eo penombaa,a i Yesu ai topeguruNa moliu sira i sambua bonde. Tongora moliu i bonde etu, topeguru ni Yesu mopupu wua nu gandu ranukura mpane rakonira.2 Awetu naita nu toParisi, kasaliu rakambaroka sira, raulira, “Mangkiada mpane niliungi atura agamata? Mobago komi i eo penombaa?”
3 Nasonoi sira ni Yesu, Nauli, “Bariapae nibasa apa anu nababei ni Datu Daudi, i tempona ia ai rangana maoro? 4 Mesuamo i Daudi i rara nu Bambaru Penombaa, mangkoni roti anu rapopenomba si Pue Ala, mpane nakiraka mbui sira rangana. Mangula ada agamata, tadulako menomba ngkida anu pensani mangkoni roti etu.”
5 Napaliliu ni Yesu pololitaNa, Nauli, “Awetu mbui Ana nu Manusia anu makuasa manguli apa anu pensani rababei i eo penombaa.”
I Yesu mopakaosa sadua tau anu mawara palena sambali
6 Sambela tempo i eo penombaa anu ntanina, laumo i Yesu i tombi penombaa nu toYahudi mepatudu i se etu. I tombi penombaa etu, ria sadua tau anu mawara palena mbai kuana. 7 Ria mbui sira basangkia toParisi ai guru agama anu mangkadelo kamasala ni Yesu, ba ina mopakaosa tau Ia i eo penombaa. Etumo mpane rapeitara mpuu apa anu ina nababei ni Yesu, lawi raundera mosalai Ia. 8 Agaiana nainsani ni Yesu tunggaia nu rarara. Etumo mpane naulika tau anu mawara palena etu, “Maingko meongko i se ei, i lio!” Lau mpuumo ia meongko i se etu. 9 Roo awetu, i Yesu mekune si sira, Nauli, “Mangula atura agamata, apa anu pensani tababei i eo penombaa: Mobabei anu malompe ba anu madaa? Motulungi kita tau, ba mampopate tau?” 10 Membalilimo i Yesu mototoki sira ope-ope, mpane Naulika tau anu mawara palena etu, “Ona palemu!” Naona mpuumo palena, ai kasaliu maosa.
11 Lako ni se etu, marumpu mpuumo sira guru agama ai toParisi. Etumo mpane mogombomo sira mangkadelo dala, ba apa anu ina rababeikara i Yesu.
I Yesu mampelisi topeguruNa anu sampulu rodua
12 Sambela tempo, i Yesu laumo i kawaneana, mpane mekakae Ia sambengia si Pue Ala. 13 Awetu simbamo eo, Narondemo sira tau anu meula si Ia, mpane Napelisi sampulu rodua lako i olora. Sira etumo anu Napakanoto ni Yesu bona mewali suroNa. 14-16 Eimo sangara:
I Simo (anu nauli ni Yesu i Peturu),
i Andaria toi ni Simo,
i Yakobu ai i Yohane,
i Pilipu ai i Bartolomeus,
i Matiu ai i Tomas,
i Yakobu ana ni Alfeus,
i Simo toSelot,b
i Yudasi ana ni Yakobu,
ai i Yudasi Iskariot anu mampobalu i Yesu i iwaliNa.
I Yesu mopakaosa tau anu madua
17 Roo awetu, mendolumo i Yesu lako i kawaneana simbela-mbela ai topeguruNa. Mengkaroomo sira i lempena, lawi i se etu mawori sira tau anu meula si Ia mepegia. Ni se etu, ria mbui sira mawori tau anu lako i tana Yudea, lako i kota Yerusale ai lako i kota Tirus ai Sidon anu i wiwi nu tasi. 18 Dongka sira ni se etu, lawi raundera mangepe lolita ni Yesu ai mamperade sira bona Napakaosa. Anu napesuangi nu seta mai mbui sira si Ia, mpane Napakaosa sira. 19 Mawori sira tau anu mopari-pari mampetui i Yesu, lawi ria kuasaNa anu mensuwu lako i wotoNa anu mopakaosa sira ope-ope tau.
Matono komi anu mampeulai peundea ni Pue Ala
20 I Yesu mototoki topeulaNa mpane Naulika sira:
“Matono mpuu komi anu manginsani kamaledemi,
lawi komimo anu mewali tau ni Pue Ala i rara nu peparentaaNa.
21 Matono mpuu komi anu maoro ei-ei,
lawi komimo anu ina rapakabosu.
Matono mpuu komi anu motumangi ei-ei,
lawi komimo anu ina matono-tono.
22 Matono mpuu komi anu rakasisi, baria komi rahaile, rakaisii lolita ai rasasalai nu tau nakenimpeulami i Ana Manusia. 23 Etu mbui rababeikamo nu nabi-nabi ni Pue Ala ni banimpia. Mewali, ane etu anu rababeika komi, mensende-sende komi nakeningkatonona nu rarami. Sangangaa matono komi lawi mabose surungina anu nisumba i rara nu suruga.
24 Agaiana masurewu mpuu komi anu pebuku ei-ei,
lawi nisumbamo katonomi.
25 Masurewu mpuu komi anu mabosu ei-ei,
lawi ina maoro komi.
Masurewu mpuu komi anu matono ei-ei,
lawi masusa rarami ai motumangi komi.
26 Masurewu mpuu komi ane ratoia komi nu ope-ope tau,
lawi tau anu mopangaku wotora ewa sadua nabi mole baria sira nabi, ratoia mbui sira nu ulububura ni banimpia.”
Nipokaasi iwalimi
27 “Agaiana komi anu mampetingai pololitaku, eimo parentaKu: Nipokaasi iwalimi, ai nibabei anu malompe si sira anu mokasisi komi. 28 Niwati sira anu motunda-tunda komi, nipekakaeka sira anu madaa si komi. 29 Pandirina ane ria tau anu mosopo kalimpimi sambali, inee nisurungi. Nikiraka mbui kalimpimi anu sambali. Ane ria anu morampaki jubami, nikiraka mbui badumi. 30 Ane ria anu merade ba apa ngkida, nikiraka kowo. Ai ane ria mbui anu morampaki ba apa-apa lako si komi, inee niperade bona napopesolaka komi. 31 I pangka-pangkana, apa anu niunde rababeika komi nu tau ntanina, etu mbui anu sangangaa nibabeika sira.
32 Ane tau anu mampokaasi komi ngkida anu nipokaasi, inee nipenoka i Pue Ala ina mowati komi. Mogaloda tau anu madaa, maasi mbui sira i tau anu mampokaasi sira. 33 Ane babeiami malompe wule i tau anu mobabei kalompe si komi ngkida, inee nipenoka i Pue Ala ina mowati komi. Mogaloda tau anu madaa, ewa etu mbui babeiara. 34 Ane nikiraka doimi rapebolo, lawi nisarumaka ina mansumba komi tambai nu doimi etu, inee nisarumaka i Pue Ala ina mowati komi. Mogaloda tau anu madaa, mokiraka mbui sira doira i singka rangara anu madaa, lawi rasarumakara ina rapopesola ngkida.
35 Inee komi awetu! Sangangaa nipokaasi iwalimi, ai sangangaa nibabei apa anu malompe si sira. Ane ria tau anu mampenoka mebolo lako si komi, nikiraka kowo ai inee nisarumaka ina napopesolaka komi. Ane ewa etu nibabei, maisi pewati ina nakiraka komi ni Pue Ala, ai komi ina mewali ana ni Pue Ala anu melumbu mpii kuasaNa. Lawi ewa etumo kalompena rara ni Pue Ala i tau anu madaa ai i tau anu baria rainsanira manguli maisi kalompena si Ia. 36 Kamaasimi sangangaa ewa kamaasi nu Tuamami i suruga.”
Inee nisalai rangami
37 Mololita mbuimo i Yesu, Nauli, “Inee nisalai tau ntanina, bona baria mbui komi ina nasalai ni Pue Ala. Inee komi mosuku tau ntanina, bona ntena komi nasuku ni Pue Ala. Niampuni kamasala nu tau, bona naampuni mbui komi ni Pue Ala. 38 Nipokiraka sira tau, bona i Pue Ala mbui mampokiraka komi. Ai apa anu nakiraka komi ni Pue Ala, pensani rapandiri ewa pobae anu nauda ragua-gua ai rapii-pii i rara nu sambua pesoka, batena melumbea. Lawi pesoka anu nipake mosoka tau, etu mbui anu ina rapoposoka komi.”
39 Napaliliu ni Yesu pololitaNa ai ngkora pandiri ei, “Ane ria sadua tau anu mabilo anu monini singka tobilona, batena ina manawu sira i rara nu kalolu. 40 Awetu mbui, baria ria toposikola anu melumbu karabilana mpane lako i guruna. Ane sopomo posikolana, lako simbelada ia ai guruna.”
41 Roo awetu, i Yesu mopadongka ngkora pandiri ei, Nauli, “Mangkiada mpane nipeita parupu i rara mata nu rangami, molentano rangka nu kau anu ria i matami baria niita? 42 Adiwa mpane pensani komi mangulika rangami: ‘Poka, mai kilaliki parupu i matamu’, molentano rangka nu kau i rara nu matami baria niita? Komi anu mengkalompe! Sangangaa nilaliki nsalaa rangka nu kau anu ria i rara nu matami, ane telalikimo lako manotoda petotokimi molaliki parupu i mata nu pokami.”
Kau ai wuana
43 “Baria ria kau anu malompe anu madaa wuana, ai baria ria kau anu madaa anu malompe wuana. 44 Niinsani kalompena sinangka kau ane niitamo powuana. Anggoro baria rapupu lako i walaa anu modui. Walaa anu modui baria mampowua wua ara. 45 Awetu mbui i manusia. Tau anu malompe ina mampololita apa anu malompe, lawi rarara buke kalompe. Tau anu madaa ina mampololita apa anu madaa, lawi rarara buke kadaa. Lawi apa anu ria i rarata, etu mbui anu tapopensuwu i nguduta.”
Tombi anu rawangu i wongko watu ai tombi anu rawangu i wongko nu wungi
46 “Mangkiada mpane nironde Aku, Pue, Pue, agaiana baria nipeulai parentaKu? 47-48 Ima ngkida anu dongka si Aku mpane mangepe ai mampeulai pololitaKu, pensani rapandiri ewa sadua tau anu matopa mowangu tombi. Mokae ia tana napakandala, naboli nsalaa watu, lako nawanguda tombi i wongko nu watu etu. Sambela tempo, toa uda marimbuku, membalamo ue morumpa tombina, agaiana baria madungka lawi tombina rawangu i wongko watu. 49 Agaiana tau anu mangepe pololitaKu mpane baria napeulai, ia ewa sadua tau anu mowangu tombina i wongko nu wungi ngkida. Awetu membala ue morumpa tombina, tombina kasaliu mapoka ai marupu.”