Matiu 10

I Yesu mokiraka kuasa i topeguruNa anu sampulu rodua

(Mrk. 3:13-19; Luk. 6:12-16)

1 Sambela tempo, naronde ni Yesu topeguruNa anu sampulu rodua, mpane Nakiraka sira kuasa mampopeloso seta ai mopakaosa ope-ope tau anu madua ai tau anu baria masinokai wotora. 2-4 I Pue Yesu mampelisi sira mewali suroNa. Sangara iamo:

I Simo anu rauli mbui i Peturu;

i Andaria toi ni Simo,

i Yakobu ai i Yohane ana ni Sebedeus,

i Pilipu,

i Bartolomeus,

i Tomas,

i Matiu toperuru asele,

i Yakobu ana ni Alfeus,

i Tadeus,

i Simo toSelot,

ai i Yudasi Iskariot anu ina mampobalu i Yesu i iwaliNa.

I Yesu mopatudu topeguruNa sira mpane Natudu sira lau mobambari Bambari Malompe

(Mrk. 6:6b-13; Luk. 9:1-6)

5 TopeguruNa anu sampulu rodua aretu natudu sira ni Yesu lau mobambari Bambari Malompe. Lako baria mani sira mangoka, Napatudu sira ewa ei, “Inee komi lau i boea nu tau anu baria sira toYahudi. Inee komi lau i kota nu toSamaria. 6 Agaiana lau i toSaraelida komi. Siramo ewa dimba anu mapusa. 7 Niulika sira ewa ei: ‘Bariamo masae i Pue Ala ina meparenta i dunia.’ 8 Nipakaosa tau anu madua, nipatuwu tau anu mamate, nipakaosa tau anu mosaki tangga, nipopeloso seta anu mampesuangi tau. Adiwa i Pue Ala mowati ntoo komi sadua-sadua, ewa etu mbui komi motulungi ai mowati tau ntanina.

9 Inee komi mangkeni doi bulawa, doi pera, doi salaka. 10 Inee komi meboku, inee komi mangkeni badumi morontau ba kandupa rombua ba lai. Lawi sadua topobago sintoto mansumba sarona.

11 Ane dongka komi i sambua boea ba kota, nikadelo i se etu tau anu malompe rarara anu raundera modoko komi i rara nu tombira. Meari liliu komi si sira duduumi mangoka lau i boea ba i kota ntanina. 12 Ane mesua komi i rara nu tombi, niulika sira tumpu tombi: ‘Kalompe nu katuwu lako si Pue Ala ria simbela-mbela ai komi!’ 13 Ane malompe rara nu tumpu tombi modoko komi, ina nawati sira ni Pue Ala. Agaiana ane baria raundera modoko komi, pewati ni Pue si sira etu, mesola si komi. 14 Ane ria tumpu tombi ba tumpu boea anu baria modoko ba anu baria raundera mampetingai pololitami, nipalengi tombi ba boea etu, ai nitaronta awu anu mentaka i talampa paami mewali sambua tanda pesuku ni Pue Ala si sira. 15 Bona niinsani: I eo pobotusi kasopoa dunia, maruminsi mpuu pesuku ni Pue Ala i tau aretu, mpane lako pesukuNa i tau anu meari i kota Sodomo ai Gomora ni banimpia.”

Pepopesiasi i eo anu ina mai

(Mrk. 13:9-13; Luk. 12:2-9; 21:12-19)

16 “Mainga-inga komi, lawi Kutudu komi lau i tau anu madaa, ewa dimba i tongo-tongo nu serigala. Etumo mpane sangangaa matopa komi ewa ule, ai nipakaalusu mbui pangkeniakami ewa tosi manggebodo. 17 Mainga-inga komi, lawi ina rasoko komi mpane rakeni lau i topobotusi kara-kara agama. Ina rasepe-sepe komi i rara nu tombi penombaara. 18 Ai nakenimpeulami si Aku, ina rasusu komi i topoparenta ai i datu-datu. I tempo etumo, tempomi mopadongka kono i pepotuumi si Aku i lio nu tau aretu, ai i tau anu baria mani sira manginsani i Pue Ala.

19 Mewali, ane rakeni komi lau i topobotusi kara-kara, inee nipopari rara kaapana anu ina niuli ai apa anu ina nipoposonoi sira. Lawi i tempo etu, apa anu ina niuli ai anu nipoposonoi sira, ina Napopainsanika komi. 20 Lawi apa anu nipoposonoi sira baria lako i rarami saduduami, agaiana lako i Inosa Magalida anu nakiraka komi nu Tuamami.

21 I tempo etu, ina ria anu mewali ewa ei: tau sira ina mosusu poka wotora ba anara bona rapopate nakenimpeulara si Aku. Ria mbui anakoi anu ina moewa tomanara ai mosusu tomanara bona rapopate. 22 Komi ina rakasisi nu ope-ope tau nakenimpeulami si Aku. Agaiana tau anu meula liliu si Aku duduuna i kasopoana ina mansumba sira katesorema. 23 Ane rapopesiasi komi i kota anu sambua, melangka komi lau i kota anu ntanina. Bona niinsani: Lako baria mani komi roo mobambari Bambari Malompe i sumalele tana nu toSaraeli, Ana Manusia dongkamo.

24 Topeguru baria melumbu karabilana mpane lako i guruna. Sadua batua baria melumbu karabilana mpane lako i tuana. 25 Sondomo ane sadua topeguru mewali simbela ai guruna, ai sadua batua mewali simbela ai tuana. Mewali, ane rapakoimo Aku i posangara Aku i Beelsebul datu nu ope-ope seta, apa mani komi anu meula si Aku.

26 Agaiana nauda awetu, inee sira nipokaeka tau anu moewa komi. Lawi sinangka-nangkana anu tewuni mani ina tewungkesi. Ai ope-ope anu rawunikai mani batena ina tongawa. 27 Apa anu wule si komi ngkida Kuulika, sangangaa nipololita i ope-ope tau. Apa anu Kukukuwika i talingami, nipasimbuku ka nipadongkana i tau wori. 28 Inee komi mampokaeka tau anu wule pensani mampopate wotomi, agaiana baria ria kuasara mampopate tanuanami. Anu sangangaa nipokaeka iamo i Pue Ala, lawi Ia anu makuasa motende wotomi ai tanuanami i rara naraka.

29 Rombaa dena pensani rapobalu sampeka doi anu saudi mpii imbana. Agaiana nauda awetu, baria ria mogalo sambaa anu pensani manawu ane baria peundea ni Pue Ala Tuamami. 30 Apa mani komi, mogaloda wuluami, nainsani ni Pue Ala kaisina. 31 Mewali inee komi maeka. Lawi mobundu mpii mani komi, mpane dena.

32 Ima anu mopangaku peulana si Aku i lio nu tau wori, ia mbui ina Kupangaku i lio nu TuamaKu anu i suruga ka iana topeulaKu. 33 Agaiana ima anu mosapuaka peulana si Aku i lio nu tau wori, ina Kusapuaka mbui ia i lio nu TuamaKu anu i suruga.”

Mapari meula si Yesu

34 “Inee nisarumaka kamaiKu i dunia ei, ina mopasintuwu tau. Baria! KamaiKu ei ina mampopobungka tau. 35-36 NakeningkamaiKu ei, tau anu santombi ina mobungka-bungka, lawi ria sira anu meula si Aku, ria sira anu baria. Anara tomoane moewa tuamana, anara towawine moewa tinana, maniana moewa pomanianana.

37 Ima anu melumbu pampokaasina tinana ba tuamana mpane lako pampokaasina Aku, baria ia sintoto mewali topeulaKu. Awetu mbui, ima anu melumbu pampokaasina anana mpane pampokaasina Aku, baria ia sintoto mewali topeulaKu. 38 Ima anu baria madota mosimbu kau popakua ia, ai baria meula si Aku, baria ia sintoto mewali topeguruKu. 39 Ima anu napari-pari mampeparai katuwuna, katuwu malompe anu ria si ia ina matonto. Agaiana ima anu matonto katuwuna nakenimpeulana si Aku, iamo anu mansumba katuwu malompe.

40 Ima anu modoko komi, simbelamo Aku anu nadoko. Ima anu modoko Aku, simbelamo i Pue Ala anu nadoko, lawi Iamo anu motudu Aku. 41 Ima anu modoko sadua nabi nakeningka nabina, tau etu ina modoko saro nu sadua nabi. Ai ima anu modoko sadua tau anu manoto nakeningkamanotona, tau etu ina mansumba saro nu sadua tau anu manoto. 42 Ima anu motulungi sadua topeulaKu anu kokoi katuwuna, nauda wule ue ntoo ngkida nakiraka tau etu, batena nasumba surungina.”