11
1 Awetu i Yesu roomo mopatudu topeguruNa anu sampulu rodua, laumo Ia mepatudu ai mobambari Bambari Malompe lako si Pue Ala i kota-kota anu gompi.I Yesu ai Yohane Toperiu
2 Ni tempo etu, i Yohane Toperiu anu tongona ratarunggu, mangepe apa anu napobago ni Kerisitu, natudumo ni Yohane basangkia topeguruna lau mopadongka pampekunena si Yesu. 3 Mewali laumo sira, mpane rapekunera, raulira, “Ba i Tua mpuumo Datu Topesorema anu nadandi ni Pue Ala? Ba ria mani anu ntanina anu kipegia?”
4 Awetu naepe ni Yesu pampekunera, Naulika sira, “Pesolamode komi, mpane nipetumbuika i Yohane apa anu niepe ai anu niitamimo, iamo 5 anu mabilo meitamo, anu mapalu molumakomo, anu ketangga maosamo, anu bongo meepemo, tau anu mamate tuwu mpesolamo, ai Bambari Malompe tebambarimo i tau anu mesiasi katuwura.a 6 Matono mpuu sira tau anu baria bata-bata rarana mepotuu si Aku.”
7 Awetu mesolamo sira topeguru ni Yohane Toperiu, napololitamo ni Yesu i tau wori kono si Yohane, Nauli, “Apa tunggaiami lau si Yohane i pada lori ni banimpia? Ba mampenoka ngkida komi mangita owo anu nawui nu pambui wilau wimai? Baria!b 8 Mewali, apada anu nipenoka lau nipeita? Ba mampenoka komi mampeita tau anu merae pesampina? Baria mbui, lawi tau anu merae pesampira meari ngkida sira i tombi nu datu. 9 Mewali, apada anu nipenoka lau nipeita? Ba mampenoka komi mampeita nabi? Ane awetu peundeami, mamonso mpuu i Yohane sadua nabi. Agaiana Kuulika komi, ia melumbu lako i nabi-nabi anu ntanina. 10 Lawi i Yohane etumo anu natunggai i rara Sura Ngkora Magali, anu manguli ewa ei:
‘Eimo tau anu Kutudu moilodo,
bona mopatimama dalaMu lako baria mani Iko Kutudu.’” (Maleaki 3:1)
11 Nauli mbui ni Yesu, “Bona niinsani: Lako i ope-ope tau anu rapoanaka i dunia ei, baria ria sadua anu melumbu kabosena katuwuna lako si Yohane Toperiu. Agaiana, sadua tau anu tepakoi katuwuna i rara peparentaa ni Pue Ala, melumbu kabose nu katuwuna mpane i Yohane. 12 Mepuu lako i pobago ni Yohane Toperiu dongka i tempo ei-ei, tau anu madaa sira rapari-parira moewa tau ni Pue Ala ai rapenokara mokuasai sira. 13 Lawi lako baria mani dongka i Yohane Toperiu, ope-ope anu nauki ni Musa, ai ope-ope anu rauki nu nabi-nabi ni banimpia, mampololita apa anu ina mewali i tempo ei-ei. 14 Mewali, ane niunde mampotuu lolita ei, i Yohanemo anu natunggai ni nabi Maleaki ni banimpia anu mopadongka kadongkana i nabi Elia.* 15 Malompe mpii ane nikaendo liliu, apa anu niepemo!
16 Tau anu tuwu ei-ei, ina Kupandiri ewa apa? Kupandiri sira ewa rontobu anakoi anu mowadi-wadi i pobalu-balua, anu santobu raulira masisimbuku i santobuna,
17 ‘Kipotawuika komi tulali,
agaiana baria komi madota matono-tono,
kipoduluaka komi ai dulua nu kawiora rara,
agaiana baria komi madota motumangi.’
18 Kamai ni Yohane, baria ia manginu anggoro ai baria ia mangkoni roti. Ai nisapuaka liliu, niuli ewa ei: ‘napesuangi Ia nu seta!’ 19 Mpane, kamai nu Ana Manusia, manginu ai mangkoni Ia. Agaiana nisapuaka mbui Ia, niuli: ‘Peita! Topesioro, tau malangu, rangara toperuru asele ai tomadosa!’ Agaiana nauda ewa etu, kamatopa ni Pue Ala tongawa i apa anu Nababei.”
I Yesu mokambaroka sira toYahudi i Galilea anu baria sira mepotuu
20 Lako i se etu, i Yesu mokambaroka sira toYahudi anu meari sira i basangkia kota i tana Galilea, lawi nauda paka Nababeika sira tanda kuasa i kotara, agaiana baria mpuu sira menonso lako i babeiara anu madaa. 21 Nauli ni Yesu, “Masurewu komi toKorasim ai toBetsaida! Maisi mpuu tanda kuasa anu Kubabei i kotami, agaiana baria mpuu komi menonso ai mopalengi dalami anu masala. Ane rapana tanda kuasa etu Kubabei i rara nu kota Tirus ai i Sidon, nauda baria sira toYahudi, kemasaemo sira menonso ai mopalengi dalara anu masala. Kemopakemo sira sampi nu kasusa rara, ai wotora raawuira, tanda penonsoramo. 22 Mewali, bona niinsani: I eo pobotusi kasopoa dunia, ina maruminsi mpuu pesuku ni Pue Ala si komi, mpane lako i toTirus ai toSidon.
23 Ai komi mbui toKapernaum! Ba nipenoka ina naore komi ni Pue Ala dongka i suruga? Baria! Agaiana ina Napopendoluda komi i pearia nu tomate! Ane rapana tanda kuasa anu Kubabeimo i kotami, Kubabei i kota Sodomo ni banimpia, kota etu kebaria napakaropu ni Pue Ala, keria mani duduuna ei-ei. 24 Mewali, bona niinsani: I eo pobotusi kasopoa dunia, maruminsi mpuu pesuku ni Pue Ala si komi, mpane lako pesukuNa i toSodomo anu madaa babeiara ni banimpia.”
I Yesu mekakae ai moronde tau mai si Ia
25 Ni tempo etu, mekakaemo i Yesu, Nauli, “O TuamaKu, anu makuasa i langi ai i dunia! Kuuli maisi kalompena si Iko, lawi ope-ope etu Nuwunikai lako ope-ope tau anu matopa ai anu mapande. Agaiana Nupatongawa i tau anu tepaiwoi katuwura. 26 Lawi etumo peundeaMu.”
27 Roo awetu, nauli mbui ni Yesu, “Ope-ope nakirakamo Aku nu TuamaKu. Ai TuamaNa ngkida anu manginsani AnaNa, awetu mbui AnaNa ngkida anu manginsani TuamaNa, ai i tau anu Napopainsanika nu AnaNa.
28 Ope-ope anu mawowe ai anu mantimi kolongami, maimo komi si Aku. Ina mansumba komi katuwu anu malene. 29 Nikolomode kolonga anu Kupakoloka komi, ai pegurumode komi si Aku, lawi maalusu Aku ai mengkaiwoi Aku, bona mansumba komi kamalene rara. 30 Lawi kolongaKu anu Kupakoloka komi mangaa, ai patuduKu mepakatono.”