Markus i

Bambari Malompe anu nauki ni

Markus

Pepuua lolita

Mangula pesumbaa pekiri nu tau anu mepotuu si Kerisitu ni banimpia, sura ei nauki nu sadua tomoane anu rasanga i Markus. I Markus etu, mpolinguruna mangula i Paulu tempona lau mopadongka Bambari Malompe. Mpane mamporangai i Peturu i polumakoana mopadongka Bambari Malompe. Apa anu naepe lako si Peturu, etumo anu nauki i rara nu sura ei.

Ane tabasa Bambari Malompe anu nauki ni Markus ei, tainsani apa anu nababei ai anu napaguru ni Yesu Kerisitu. I Yesu mopadongka Bambari Malompe anu manguli kaina dongkana peparenta ni Pue Ala i dunia ei (1:14-15). Makuasa Ia mopakaosa tau madua ai mampopeloso seta anu mokuasai tau. Tadulako nu toYahudi moewa i Yesu, ai mangkadelo sira dala bona pensani sira mampopate Ia (3:6). Agaiana i Yesu manginsani tunggaiara ai Napopainsanika amimo kaina rapopateNa (8:31; 9:31; 10:33-34). Naoaka ni Yesu lau i Yerusale, lawi Natunggai mokiraka wotoNa rapopate mosorema tau lako i dosara (10:45). Ai awetu Ia mampolumakoi kamate, agaiana tuwu mpesola Ia (16:1-8).

Tunggaia ni Markus mouki sura ei, bona mopakanoto i tau ka i Yesuna Datu Topesorema ai Ana ni Pue Ala (1:1, 11, 24; 3:11; 5:7; 8:29; 9:7; 14:61-62; 15:39). Tunggaiana mbui, bona mopakaroso pepotuuta meula si Yesu nauda ba apa anu morumpa kita (8:34-38; 10:29-31).

Isi nu Sura

1. Pepuua pobago ni Yesu Kerisitu Ana ni Pue Ala (1:1-13)

2. I Yesu mepatudu ai mopatongawa kuasaNa i tana Galilea (1:14–6:13)

3. I Yesu mepatudu ai mopatongawa kuasaNa i boea-boea i tana Galilea (6:14–8:30)

4. I Yesu lau i Yerusale bona rapopate (8:31–10:52)

5. Pobago ai patudu ni Yesu i kota Yerusale (11:1–13:37)

6. I Yesu rasoko ai rapopate (14:1–15:47)

7. I Yesu tuwu mpesola (16:1-20)