9
1 Nauli mbuimo ni Yesu, “Bona niinsani, Kuulika komi: ria i olomi i se ei anu baria ina mamate lako baria mani ia mangita i Pue Ala meparenta ai kuasaNa.”I Yesu rapopeawa i wongko bulu
2 Aono eo lako ni se etu, i Yesu mangkeni tolu topeguruNa mempanai lau i tumu bulu anu mawane. TopeguruNa anu tolu dua etu iamo: i Peturu, i Yakobu ai i Yohane. Anu ria ni tempo etu, i Yesu ngkida ai topeguruNa anu tolu etu. Tongora i se etu, tebalikimo lense ni Yesu. 3 SampiNa mewali mabula mengkila-ngkila; baria ria i dunia ei anu melumbu kabulana lako sampiNa etu. 4 Mpane ungangkidamo topeguruNa mangita i Yesu mololita ai rodua nabi. Nabi anu rodua etu iamo i Musa ai i Elia. 5 Lako ni se etu, nauli ni Peturu si Yesu, “Guru, masana mpuu kiepe i se ei. Aginamo kibabei tolu oguna bambaru: saogu si Guru, saogu si Musa, mpane saogu mbui si Elia.” 6 Kamonsona, baria nainsani ni Peturu apa anu nauli nakeningkaekara.
7 Ungangkidamo mendolu gawu mobalungkusi sira, ai lako i rara nu gawu etu raeperamo wotu anu manguli, “Ia eimo AnaKu anu Kupokakaia. Nipetingai pololitaNa!”
8 Ai ni tempo etu mbui, metotoki sira mantoleli, bariamo ria tau ntanina simbela-mbela ai sira, batena i Yesudamo. 9 Pendolura lako i tumu bulu etu, naombo sira ni Yesu, “Inee niuli-uli si ima ngkida apa anu niita ni mpongone, lako baria mani Ana Manusia rapatuwu mpesola lako i kamate.”
10 SawaaNa etu rapeulaira mpuu, baria rapololita si ima ngkida apa anu mewali ni mpongone. Agaiana i olo nu topeguruNa etu, mombepekune sira ba apa tunggaia ni Yesu manguli “kaina tuwuNa mpesola lako i kamate”. 11 Ai mekunemo sira si Yesu, raulira, “Mawuli raraki. Mangkiada mpane rauli nu guru-guru agama, i nabi Elia sangangaa dongka ilodo, mpane lako dongkada Datu Topesorema?”
12 Nasonoi, “Mamonso mpuu, i Elia sangangaa dongka ilodo, lawi ia anu mopatimama sinangkana. Agaiana adiwa ai Ana Manusia? Mangkiada mpane teuki i rara Sura Ngkora Magali: Ana Manusia ina mansumba maisi kapari ai rakaisii lolita nu tau? 13 Agaiana Kuulika komi, dongkamo i nabi Elia, ai rapopesiasi ia nu tau mangula peundeara, ewa anu teuki i rara Sura Ngkora Magali kono si ia.”a
I Yesu mopakaosa sadua tau anu nakuasai nu seta
14 Roo awetu, i Yesu ai topeguruNa anu tolu etu mesolamo sira lako i wongko bulu lau mampomberumpaka topeguruNa anu ntanina. Kadongkara i se etu, mangita sira tau wori anu metoleliki topeguruNa, ai basangkia guru agama tongora mombesonoi ai topeguruNa. 15 Awetu raita nu tau wori doumo mai i Yesu, matingkara sira mpane melangka lau mampomberumpaka Ia. 16 Mekune i Yesu i topeguruNa, “Apada anu nipombesesei ai guru-guru agama etu?”
17 Sadua lako i tau wori etu manguli, “Guru, mai aku mangkeni anaku bona Nupakaosa. Anaku baria pensani mololita lawi nakuasai nu seta. 18 Ane nakuasai ia nu seta, madungka ia i tana, mowure ngangana, mokei-kei bagana, ai makodo wotona. Kukenikamo sira topeguruMu bona mampopeloso sira seta etu, agaiana baria rabukura.”
19 Nauli ni Yesu, “Adiwada komi ei? Mangkiada mpane baria mani maroso pepotuumi? Sangkia mani kasaena ina simbela-mbela Aku ai komi? Sangkia mani kasaena sangangaa manoa Aku si komi? Keni mai anakoi etu!”
20 Rakeni mpuumo anakoi etu si Yesu. Awetu naita nu seta etu i Yesu, mampoporada-rada ia woto nu anakoi etu duduuna madungka ai mengkangkanduli i tana, ai mowure ngangana. 21 Mekune i Yesu i tuama nu anakoi etu, Nauli, “Sangkiamo kasaena narumpa nu saki ei?”
Nauli nu tuamana, “Mepuu lako kokoi mani ia. 22 Mawori mbelamo seta anu mokuasai ia, modungka ia i rara nu apu ba i rara nu ue, bona mamate ia. Ane Nubuku Guru, Nupokaasi kami ai Nutulungi kami!”
23 Nauli ni Yesu, “Mangkiada mpane nuuli ‘Ane Kubuku?’ Ope-ope pensani mewali i tau anu mepotuu.”
24 Nasonoi nu tuama nu anakoi etu masisimbuku, “Mepotuu aku, Pue! Tulungi aku, lawi aku ei baria mani maroso pepotuuku.”
25 Awetu naita ni Yesu maworimo tau moterusu, mokambaroka Ia seta etu, Nauli, “Ee, seta anu mepakabongo ai mepakadoio! Peloso lako i anakoi etu, ai ineemo iko mesua mpesola.” 26 Monganga-nganga seta etu, mampoporada-rada anakoi etu, mpane melosomo. I peloso nu seta etu, bariamo mokale-kale anakoi etu, ewa anu mamate, duduuna mawori tau manguli, “Matemo ia!” 27 Agaiana i Yesu mopatoro palena motulungi ia mengkawangu. Mengkawangu mpuumo anakoi etu.
28 Roo awetu, i Yesu ai topeguruNa lambu sira lako i se etu mesua i rara nu tombi. Awetu i Yesu i rara nu tombimo, mekunemo sira topeguruNa si Ia, raulira, “Guru, mangkiada mpane baria kibuku mampopeloso seta etu ni mpongone?”
29 Nasonoi, “Seta anu ewa etu baria pensani rapopeloso ai kapande apa ngkida, batena ngkida ai pekakae.”b
Karombelana i Yesu mampololita kono i kamateNa
30 Roo awetu, i Yesu ai topeguruNa mangoka lako i se etu mopaliliu polumakora moliu i tana Galilea. Ni tempo etu, baria naunde ni Yesu rainsani nu tau wori kaimbara. 31 Lawi topeguruNa ngkida anu Napenoka Napaguru. Naulika sira, “Ana Manusia, ina rasusu i kuasa manusia. Ina rapopate Ia, agaiana i eo katolu, ina tuwu mpesola Ia.” 32 Agaiana baria rainsani nu topeguruNa, apa tunggaiana pololita ni Yesu, ai baria mbui sira pebai mekune si Ia.
Ima anu tepomabose i olo nu topeguruNa
33 Dongkamo sira i Kapernaum. I rara nu tombi, mekunemo i Yesu i topeguruNa, Nauli, “Apada anu nipololita liliu i tongo dala ni mpongone?” 34 Baria sira mesono, lawi anu rapombeseseira i tongo dala iamo: ba ima anu melumbu kabosena katuwuna i olora. 35 Mewali, momesomo i Yesu mpane moronde topeguruNa anu sampulu rodua, Naulika sira, “Ima anu mampenoka bona melumbu kabosena katuwuna, sangangaa mengkaiwoi ia lako i ope-ope rangana, ai sangangaa mewali toperora i ope-ope tau.” 36 Roo awetu, Naalamo sadua anakoi, Napopeongko i liora. Nakalupuimo anakoi etu, Naulika topeguruNa: 37 “Ima anu modoko sadua tau ewa anakoi ei, simbelamo ai Aku anu nadoko. Ai ima anu modoko Aku, baria wule Aku ngkida anu nadoko, agaiana modoko mbui ia i Pue Ala anu motudu Aku.”
38 Roo awetu, nauli ni Yohane, “Guru, niitaki sadua tau anu mampopeloso seta i rara nu sangaMu, agaiana kiombo lawi baria ia meula si kita.”
39 Nauli ni Yesu, “Inee raombo, lawi tau anu mobabei tanda kuasa i rara nu sangaKu, baria sira mopakadaa Aku. 40 Tau anu baria moewa kita, sira etumo anu simbela ai kita.
41 Bona niinsani: Ima ngkida anu motulungi komi nakenimpeulami si Kerisitu, ina mansumba surungina i eo anu ina mai. Naudapae ue ntoo ngkida nakiraka komi nakenimpeulami si Kerisitu, ina mansumba ia surungina.
42 Agaiana ima anu mopakanawu sadua tau anu malede mani pepotuuna si Aku, ewa anakoi anu malede mani ei. Aginamo sambua watu anu mabose anu rapake mogili, rataka i tambolona mpane rapopopakatiri ia i tasi.
43 Mainga-inga komi bona inee komi madosa. Ane palemu sambali anu mangkeni iko madosa, nupuaki ngkimo. Aginamo sambali ngkida palemu, mesua i peparentaa ni Pue Ala, mpanena rombali mani palemu, agaiana kasopoana ope-ope wotomu ratende i rara apu naraka anu mambugi liliu. 44 [I se etu, ketanadu anu tuwu liliu, ai keapu anu mambugi liliu.] 45 Ane paamu sambali mangkeni iko madosa, nupuaki ngkimo. Aginamo sambali ngkida paamu, mesua i peparentaa ni Pue Ala, mpanena rombali paamu, agaiana kasopoana ratende iko i rara nu naraka. 46 [I se etu, ketanadu anu tuwu liliu ai keapu anu mambugi liliu.] 47 Ai ane rapana matamu sambali mangkeni iko madosa, nudungkiki ngkimo. Aginamo sambali ngkida matamu mesua i rara nu peparentaa ni Pue Ala mpanena rombali matamu, agaiana ratende iko i naraka. 48 I se etu, ketanadu anu tuwu liliu ai keapu anu mambugi liliu. 49 Lawi ope-ope tau sangangaa rapakagali luwu ai apu, ewa ope-ope pangkoni anu rapopenomba si Pue Ala sangangaa rapakagali ai bure.c
50 Bure, mobundu mpii, agaiana ane matawoomo, bariamo pensani rapopominaa bure mpesola. Ewa etu mbui komi anu meula si Aku, sangangaa rapakagali liliu komi, ai sangangaa mosintuwu liliu komi i rara nu katuwumi.”