I Yesu motudu topeguruNa mopadongka Ngkora Magali
9
1 I Yesu moronde sira topeguruNa anu sampulu rodua, mpane Nakiraka sira kuasa mampopeloso seta ai mopakaosa sira tau anu madua. 2 Natudu sira lau mopadongka bambari kono i peparenta ni Pue Ala ai mopakaosa sira tau anu madua. 3 Naulika sira ni Yesu, “Inee komi mangkeni apa-apa i rara polumakoami. Inee komi mangkeni lai, ba tas pambolia bokumi, ba doi. Badumi, sondomo anu i wotomi. 4 Ane ria sadua modoko komi i tombina, pearimode komi i se etu duduumi lambu lau i boea ntanina. 5 Ane dongka komi i boea-boea, mpane baria komi radoko nu tumpu boea, nipalengi boea etu, mpane nitaronta awu anu mentaka i talampa paami, lempona mewali sambua pepopainga si sira.”6 Awetu roomo i Yesu mopatudu sira, meongkomo sira lau i boea-boeana mobambari Bambari Malompe, mpane mopakaosa sira tau anu madua imba-imba ngkida.
I Datu Herode ai i Yesu
7 Ni tempo etu, i Herode Antipas anu mewali topoparenta i Galilea. Awetu naepe ope-ope anu nababei ni Yesu, mawulimo rarana. Lawi ria anu manguli, “I Yesu iamo i Yohane Toperiu anu tuwu mpesola.” 8 Ria mbui anu manguli, “I Yesu iamo i nabi Elia anu dongka mpesola.” Ai ria mbui anu manguli, “I Yesu iamo sadua nabi ni banimpia anu tuwu mpesola.” 9 Nauli ni Herode, “Kutudumo tau motompoki tambolo ni Yohane. Mewali, imada i Yesu ei? Mawori mbela kuepe tau mololita kono si Ia.” Etumo mpane i Herode mangkadelo dala mampomberumpaka i Yesu.
I Yesu mopakoni lima nsobu dua tau
10 I pesola nu suro ni Yesu anu sampulu rodua,* mopadongka sira si Yesu ope-ope anu rababeiramo i boea-boeana. Roo awetu, i Yesu mangkeni sira lau i kota Betsaida. Tunggaia ni Yesu bona mopalengi sira tau wori. 11 Agaiana tau wori manginsani kalauaara, etumo mpane meulamo sira si Yesu. Kadongkara si Yesu, Nadoko sira mpane Napatudu sira kono i peparenta ni Pue Ala, mpane ima ngkida anu madua, Napakaosa.
12 Ina malimpamo eo, laumo sira topeguruNa anu sampulu rodua si Yesu, raulikara, “Guru, pearia ei karao lako i boea. Aginamo Nutudu sira tau wori lau i boea-boea anu gompi lako se ei, bona mangkadelo sira pangkonira ai paturuara.”
13 Agaiana nasonoi ni Yesu, “Komida anu mopakoni sira.”
Rasonoi nu topeguruNa, “Apamopae anu kikiraka sira? Lawi anu ria si kami, wule lima ogu roti ai rombaa bau. Mewali sangangaa laupae kami mobaluki pangkoni nu tau wori ei?” 14 Kaworira kira-kira lima nsobu dua tomoane.
Nauli ni Yesu i topeguruNa, “Nitudu sira tau wori aretu momeso motobu-tobu, lima mpulu dua i rarana santobu.” 15 Apa anu natuduka sira ni Yesu, rapeulai mpuumo nu topeguruNa.
16 Momesomo sira ope-ope, nadoamo ni Yesu roti lima ogu mpane bau rombaa, mengoamo Ia i langi manguli maisi kalompena si Pue Ala. Roo awetu, Nabinse-binsemo roti ai bau aretu, mpane Nakiraka sira topeguruNa bona rakiraka sira tau wori. 17 Mangkonimo sira ope-ope duduura mabosu. Awetu roomo sira mangkoni, pangkoni etu melabi. Awetu ragulu nu topeguruNa labina, sampulu rombingka mani.
I Peturu mopangaku ka i Yesuna Datu Topesorema
18 Sambela tempo, i Yesu tongoNa mekakae saduduaNa, dongkamo topeguruNa si Ia. Mekunemo i Yesu i topeguruNa, “Mangula panguli nu tau wori, ima Aku ei?”
19 Rasonoira, “Ria sira anu manguli Yohane Toperiu anu tuwu mpesola. Ria mbui sira anu manguli i nabi Elia. Ria mbui sira anu manguli Iko sadua nabi ni banimpia anu tuwu mpesola.”
20 Napekune mbui sira, Nauli, “Ane pesumbaa mpekirimi, ima Aku ei?”
Nasonoi ni Peturu, “Ikomo Datu Topesorema anu nadandi ni Pue Ala!”
21 Agaiana naombo mpuu sira ni Yesu bona inee sala raulira si ima ngkida.
I Yesu mampololita kono i kamateNa
22 Nauli mbuimo ni Yesu, “Ana Manusia, sangangaa mansumba maisi kapari. Ina rasapuaka Ia nu totomana toYahudi, kapala-kapala tadulako menomba ai guru-guru agama. Ina rapopate Ia, agaiana i eo katolu ina tuwu mpesola Ia.”
23 Lako ni se etu, i Yesu mangulika sira ope-ope tau, “Ima anu mampenoka meula si Aku, sangangaa baria mampeulai peundeana saduduana mpane i eo-eona sangangaa mosimbu ia kau popakua iaa ai meula liliu si Aku. 24 Ima anu napari-pari mampeparai katuwuna, katuwu malompe anu ria si ia ina matonto. Agaiana ima anu matonto katuwuna nakenimpeulana si Aku, iamo anu mansumba katuwu malompe. 25 Baria ria bunduna morompu ope-ope peawa i dunia ei, ane peawa etu ina mopakarugi wotona saduduana ai baria mansumba katuwu malompe anu baria mokasopoa. 26 Ima anu maea mopangaku peulana si Aku ai mampokaea patuduKu, Ana Manusia ina maea mbui mopangaku ka iana topeulaNa i kadongkaNa mpesola i dunia ei. I tempo etu, Ana Manusia ina mendolu mai lako i suruga i rara mpeawaNa nakeningkamakuasaNa ai kuasa nu TuamaNa ai peawa nu malaekaNa. 27 Bona niinsani: Ria i olomi i se ei, anu ina mangita peparenta ni Pue Ala, lako baria mani ia mamate.”
I Yesu rapopeawa i wongko bulu
28 Awetu liumo saminggu lako i pepatuduNa etu, i Yesu mangkeni i Peturu, i Yohane ai i Yakobu mempanai lau i tumu bulu bona mekakae. 29 Tongo ni Yesu mekakae, tebalikimo lioNa, ai pesampiNa mabula mengkila-ngkila. 30 Ungangkidamo ria sira rodua nabi anu molololita ai Ia, iamo i Musa ai i Elia. 31 Mewangka mpuu sira raita tau anu rodua aretu, mololita sira ai i Yesu kono i kamate ni Yesu anu bariamo masae ina mewali i Yerusale.
32 Ni tempo etu, i Peturu ai rangana maleta sira. Awetu sira malike, raitara i Yesu i rara mpeawaNa ai rodua tau anu i tumbiriNa. 33 Awetu sira ina lambu tau anu rodua aretu mopalengi i Yesu, nauli ni Peturu si Ia, “Guru, masana mpuu kiepe i se ei. Aginamo kibabei tolu ogu bambaru, saogu si Iko, saogu si Musa, mpane saogu mbui si Elia.” (Agaiana baria nainsani apa anu napololita.)
34 Tongona mani i Peturu mololita, mendolumo gawu mobalungkusi sira. Mewali maeka sira. 35 Ungangkidamo sira mangepe wotu lako i rara gawu anu manguli, “Eimo AnaKu anu Kupelisi. Nipetingai pololitaNa!”
36 Awetu sira mangepe wotu etu, raitara i Yesu saduduaNa ngkidamo. Apa anu raita nu topeguruNa anu tolu etu rawunikaira.
I Yesu mopakaosa anakoi anu napesuangi nu seta
37 Ewa ineilena, mendolumo sira lako i wongko bulu, mawori sira tau mai mampomberumpaka i Yesu. 38 Ria sadua tomoane i olo nu tau wori anu monganga-nganga, nauli, “Guru, tulungi aku! Peita kowo anaku. Ia anaku saduduana. 39 Bela-belana napesuangi nu seta, monganga-ngangada mpane morada-rada wotona, duduuna mowure ngangana. Seta etu mampopesiasi liliu anakoi etu, ai baria madota mensuwu. 40 Kuperademo i topeguruMu bona seta etu rapopensuwura, agaiana baria rabukura.”
41 Nauli ni Yesu i tau wori, “Adiwada komi ei? Mangkiada mpane baria maroso pepotuumi si Aku? Sangkia mani kasaena sangangaa simbela-mbela Aku ai komi, ai masabara si komi? Kenimode mai anamu etu.”
42 Tongona anakoi etu molumako monontosi i Yesu, wotona nadungka mbuimo nu seta anu mampesuangi ia, mpane morada-rada. Agaiana i Yesu mampopensuwu seta etu. Mewali mensuwumo seta etu, mpane maosamo anakoi etu. Roo awetu, nauli ni Yesu, “Doamode anamu. Maosamo ia.” 43 Tingkara mpuumo sira ope-ope tau anu mangita kabose nu kuasa ni Pue Ala.
Karombelana i Yesu mampololita kono i kamateNa
Tongora mani tau wori mampotingkara ope-ope tanda kuasa etu, nauli ni Yesu i topeguruNa: 44 “Nipetingai lompe-lompe, ai inee malipa rarami pololitaKu ei: Ana Manusia ina rasusu i kuasa nu manusia.” 45 Agaiana topeguruNa baria manginsani tunggaia lolita ni Yesu, lawi tewunikai mani lempona si sira. Baria mbui sira pebai mekune si Ia apa lempona pololitaNa.
Ima anu mabose katuwuna
46 Sambela tempo, mombesonoi sira topeguru ni Yesu, ba ima lako i olora anu melumbu kabosena katuwuna. 47 Nainsani ni Yesu apa anu ria i rarara. Etumo mpane Nadoamo sadua anakoi, Napopeongko i tumbiriNa, 48 mpane Naulika sira, “Ima anu modoko sadua tau ewa podokona anakoi ei nakeningka Akuna, simbelamo ai Aku anu nadoko. Ai ima anu modoko Aku, ia mbui modoko i Pue Ala anu motudu Aku. Ima anu mengkaiwoi rarana, iamo anu mabose katuwuna.”
49 Nauli ni Yohane, “Guru, ria kiita sadua tau anu mampopensuwu seta i rara nu sangaMu, agaiana kiombo lawi baria ia meula si kita.”
50 Nauli ni Yesu si Yohane, “Inee ia raombo, lawi ima anu baria moewa komi, lempona iamo anu mewali rangami.”
ToSamaria anu baria sira madota modoko i Yesu
51 Gompimo tempona i Yesu ina mengkaore lau i suruga, Naulikamo sira tunggaiaNa ina lau i Yerusale. 52 Mewali Natudumo rodua topeguruNa moilodo. TopeguruNa anu ratudu aretu mensopimo sira i sambua boea nu toSamaria bona mopatimama sira ope-ope anu raparaluu i kadongka ni Yesu. 53 Agaiana tumpu boea etu, baria sira madota modoko i Yesu, lawi rainsanira tunggaiaNa lau i Yerusale. 54 Awetu rainsani nu topeguruNa iamo i Yakobu ai i Yohane kabariara madota modoko Ia, merade sira si Yesu, rauli, “Pue, ane Nuunde, kiperade bona apu lako i langi mampopate sira tumpu boea ei!” 55 Agaiana i Yesu mampembalilingi sira, mpane Nakambaroka sira. 56 Roo awetu, liliumo sira lau i boea ntanina.
Tau anu mampenoka meula si Yesu
57 Tongora molumako, ria sadua tau anu mangulika i Yesu, “Imba ngkida kalauaaMu, kupenoka meula si Iko!”
58 Nasonoi ni Yesu, “Serigala ria kalolu rapeariira, ai tosi ria dumura, agaiana Ana Manusia mogaloda pearia Napodampai wooNa, baria ria.” 59 Roo awetu, nauli ni Yesu i tosaduana, “Meulamo iko si Aku.”
Agaiana nasonoi nu tau etu, “Tua, Nupaliu sala aku lau mopaiwu tuamaku.”
60 Nauli ni Yesu, “Pogeaka sira tomate mopaiwu singka tomatera.b Agaiana iko, laumo iko mopadongka bambari kono i peparenta ni Pue Ala!”
61 Ria mbui sadua anu mangulika i Yesu, “Tua, kuunde mpuu meula si Iko. Agaiana Nupaliu sala aku mesola metompa i tomanaku ai pokaku sira.”
62 Nauli ni Yesu, “Tau anu mepuu mopajeko, baria pensani membalili i talikuna. Awetu mbui tau anu mampenoka meula si Aku, agaiana mokaendo liliu apa ngkida anu napalengi, baria sintoto mewali tau ni Pue Ala i rara peparentaNa.”