Kamate ni Yohane Toperiu
14
1 I tempo etu i Herode, topeparenta i Galilea mangepe apa anu nababei ni Yesu, 2 etumo mpane naulika sira topobagona, “I Yesu iamo i Yohane Toperiu anu tuwu mpesola lako i kamate. Etumo mpane ria kuasaNa mobabei tanda anu mewulii.”3-4 Eimo tunturakana kamate ni Yohane Toperiu. Datu Herode mandoa i Herodias napotombika. I Herodias etu iamo samboko nu pokana anu rasanga i Pilipu. Mawori mbelamo i Yohane mokambaroka i Herode kono i babeiana etu, naulika, “Baria iko pensani mampotombika towawine etu!” Etumo mpane i Herode motudu surudadona mosoko i Yohane, rasilu mpane rapopesua i rara nu tarunggu. 5 Kamonsona, napenoka ngkimo ni Herode mampopate i Yohane, agaiana mampokaeka ia tau wori, lawi rauli nu tau wori iamo sadua nabi.
6 Lako i se etu, i tempo ni Herode moparia susa mokaendo eo karapoanakana, ana ni Herodias anu towawine motaro i lio nu torare. Matono mpuu i Herode mangita potarona. 7 Nakeningkatonona, modandimo ia napakaroso ai sumpana i anantowawine etu, naulika, “Apa ngkida anu nuperade, ina kukiraka iko!”
8 Awetu naepe ni Herodias pololitana etu, moatei ia anana bona mamperade woo ni Yohane Toperiu. Mewali, nauli nu anantowawine etu si Herode, “Kuperade woo ni Yohane Toperiu, raboli i wongko dula!”
9 Awetu naepe ni Herode pamperadena, maparimo rarana. Agaiana dandina i anantowawine etu bariamo pensani nadii mpesola, lawi modandimo ia i lio nu torarena. Etumo mpane i Herode mosawaamo bona pamperade nu anantowawine etu rapabukei. 10 Natudumo surudadona lau i rara nu tarunggu motompoki tambolo ni Yohane. 11 Woo ni Yohane rakeni i wongko dula, mpane rakiraka i anantowawine etu, mpane nakeni lau i tinana. 12 Awetu raepe nu topeguru ni Yohane apa anu mewali, lau sira mangala wotowata ni Yohane mpane rapaiwura. Roo awetu, laumo rabambarikara i Yesu.
I Yesu mopakoni lima nsobu tau
13 Awetu naepe ni Yesu bambari kono i kamate ni Yohane, malambu Ia. Mewali, memponemo Ia i duanga lau i pearia anu maboa. Agaiana tau wori manginsani pangoka ni Yesu, etumo mpane mopalengimo sira boeara mpane mampeula i Yesu mangula dala anu metalinti i rano. 14 Pendolu ni Yesu lako i duanga, Naita tau wori mampegia Ia. Maasi raraNa mangita sira, mpane Napakaosa tau anu madua.
15 Sindulau eomo, maimo sira topeguruNa mogompilisi Ia, raulikara, “Guru, pearia ei karao lako i boea, ai ina malimpamo eo. Aginamo Nutudu sira tau wori lau i boea anu gompi lako i se ei, bona mobaluki sira pangkonira.”
16 Nauli ni Yesu, “Ineemo sira lau. Komi anu mopakoni sira.”
17 Rasonoi nu topeguruNa, “Anu ria si kami wule lima ogu roti ai rombaa bau.”
18 Nauli ni Yesu, “Keni mai.” 19 Lako ni se etu, Natudumo sira tau wori momeso i owo. Momesomo sira i owo, naalamo ni Yesu roti lima ogu ai bau rombaa, mpane mengoa Ia i langi manguli maisi kalompena si Pue Ala. Roo awetu, Nabinse-binsemo roti etu, mpane Nakiraka sira topeguruNa bona ratibo-tibo i tau wori. 20 Mangkoni sira ope-ope duduura mabosu. Awetu roomo sira mangkoni, awetu ragulu nu topeguruNa, sampulu rombingka mani labina. 21 Kaworira anu mangkoni ni tempo etu, kira-kira lima nsobu tomoane, baria mani teimba towawine ai anara.
I Yesu molumako i wongko ue
22 Roo awetu, i Yesu motudumo topeguruNa sira moduanga moilodo lau i sambuteka rano, ai motudu Ia tau wori mesola. 23 I pesolara tau aretu, mempanaimo i Yesu lau i bulu, mpane mekakae saduduaNa. Ia saduduaNa i se etu duduuna madedi.
24 I tempo etu, topeguruNa i tongo ranomo sira, karaomo lako i lore. Duangara narumpa balumba, lawi maruminsi mpii pambui anu mewui lako i lio nu duangara. 25 Gompi mabaamo, i Yesu molumako i wongko ue monontosi sira. 26 Awetu raita nu topeguruNa ria tau anu molumako i wongko ue, maeka sira, mpane raulira, “Dou mai tanuana!” Mongangamo sira nakeningkaekara.
27 Agaiana kasaliu naulika sira ni Yesu, Nauli, “Pakaroso rarami! Inee komi maeka! Aku mboto ei.”
28 Nauli ni Peturu, “Ane Iko mboto mpuu Pue, posawaaka aku molumako i wongko ue lau si Iko.”
29 Nauli ni Yesu, “Maingkomode!” Mendolu mpuumo i Peturu lako i rara duanga, mpane molumakomo ia i wongko ue monontosi i Yesu.
30 Agaiana awetu naita balumba nu rano mabose nakenimpewui nu pambui marimbuku, maeka ia ai mepuumo ia matiri. Mongare ia, nauli, “Pue tulungi aku!”
31 Naonamo ni Yesu paleNa mosintaki i Peturu, Naulika, “Peturu, baria mani maroso pepotuumu! Mangkiada mpane bata-bata mani raramu?”
32 Mensawimo sira i rara duanga, kasaliu mengkaroo pambui. 33 TopeguruNa anu i rara duanga etu menomba sira si Ia, raulira, “Mamonso mpuu, i Tua Ana ni Pue Ala!”
I Yesu mopakaosa tau wori anu madua i Genesaret
34 Kadongkara i sambuteka rano, mensoremo sira lau i tana anu rasanga Genesaret. 35 Awetu rainsani nu tau kariana i Yesu i kotara, rabambarira i sumalele kota etu, duduuna ope-ope tau anu madua rakenira si Yesu. 36 Merade sira si Yesu, raulira, “Ane pensani, kambana wuntu nu jubaMumo kipetui.” Mewali ope-ope tau anu mampetui wuntu nu jubaNa, kasaliu maosa mpuu sira.