I Yesu mokambaroka toParisi lawi baria sira mampeulai sawaa ni Pue Ala
15
1 Sambela tempo, ria sira toParisi ai guru-guru agama nu toYahudi anu lako i Yerusale lau mampomberumpaka i Yesu, rapekunera, 2 “Mangkiada mpane topeguruMu moliungi sira ada nu ulububuta? Ane mangkoni sira, baria sira memando nsalaa.”3 Nasonoi ni Yesu, “Mangkia mbui mpane niliungi sawaa ni Pue Ala, nakenimpangulami ada nu ulububumi? 4 Lawi nauli ni Pue Ala:
‘Bila tuamamu ai tinamu,’ ai ‘Ima anu motunda-tunda tuamana ba tinana sangangaa rapopate.’ (Pensuwu nu toSaraeli 20:12; 21:17)
5-6 Agaiana komi mepatudu ewa ei: baria komi masala ane baria komi motulungi tinami ai tuamami, ane anu-anumi anu sangangaa nipopotulungi tinami ai tuamami etu nipopenombamo si Pue Ala. Mewali, nakenimpangulami ada anu nidokomo lako i ulububumi etu, mopakoi komi Ngkora ni Pue Ala. 7 Komi tau anu mengkalompe! Mamonso mpuu apa anu nauli ni Pue Ala si nabi Yesaya ni banimpia kono si komi ewa ei:
8 ‘Tau aretu, i ngudura ngkida mobila Aku,
agaiana rarara karao lako si Aku.
9 Baria ria bunduna penombara si Aku,
lawi patudu anu rapatudukara tau sira, lako i manusia.’” (Yesaya 29:13)
10 Roo awetu, narondemo ni Yesu tau wori, mpane Napadongkaka sira, Nauli, “Nipetingai lompe ai nipairara bona niinsani! 11 Pangkoni anu mesua i ngangata, baria etu anu mopakakeraki kita. Agaiana lolita anu mensuwu lako i ngudutada, etu anu mopakakeraki kita.”
12 Lako i se etu, maimo sira topeguruNa mangulika Ia, “Bariapae Nuinsani makoi rara nu toParisi mangepe pololitaMu ni mpongone?”
13 Nasonoi ni Yesu, “Sira aretumo anu ewa tuda-tuda anu baria natuda nu TuamaKu anu ria i suruga, ai batera rawuka. 14 Ineemo nihaile toParisi aretu! Sira ewa tadulako anu mabilo, ane sadua tau anu mabilo monini singka tobilona, batena ina manawu sira roduara i rara nu kalolu.”
15 Nauli ni Peturu, “Guru, ane pensani Nupakanotoka kami ngkora pandiri etu ni mpongone.”
16 Mesono i Yesu, Nauli, “Baria mbuipae niinsani lempona? 17 Niinsanimo, pangkoni anu mesua i rara ngangata kasaliu mesua i rara nu taita, roo awetu tatende. 18 Agaiana pololitata anu keraki mepuu lako i rarata ai mensuwu i nguduta, etumo anu mopakakeraki kita i petotoki ni Pue Ala. 19 Lawi lako i rarata mensuwu sinangka pekiri anu madaa, mampopewali kita mepopate, mebualosi, mobabei babeia anu merikati, manangka, mewali sabi dongko ai mesasalai. 20 Babeia ewa etumo, anu mopakakeraki kita i petotoki ni Pue Ala. Baria babeia baria memando lako baria mani mangkoni.”
Sadua towawine anu baria toYahudi merade tulungi si Yesu
21 Roo awetu, laumo i Yesu i tana anu gompi i kota Tirus ai Sidon. 22 I se etu, ria sadua towawine toKanaan. Towawine etu mai si Yesu, mpane merade tulungi, nauli, “Pue, pemulea ni Datu Daudi! Pokaasi kowo aku! Anaku towawine napesuangi nu seta, maruminsi kamaduana.”
23 Agaiana i Yesu baria mesono. Etumo mpane mai sira topeguruNa mogompilisi Ia, raulira, “Guru, tudumode lambu towawine etu, lawi monganga-nganga ia meula si kita.”
24 Nasonoi ni Yesu, “I Pue Ala motudu Aku mai motulungi pemulea nu toSaraeli ngkida, lawi sira ewa dimba anu mapusa.”
25 Agaiana mai ngkida towawine etu molingkudu motumpa i lio ni Yesu, nauli, “Pue, tulungi kowo aku!”
26 Nasonoi ni Yesu, “Baria malompe mangala pangkoni nu anakoi mpane rakiraka dike.”a
27 Mesono towawine etu, nauli, “Mamonso mpuu, Pue, agaiana dike mbui mangkoni wuta nu pangkoni anu manawu lako i wongko nu meja pangkonia nu tumpuna.” 28 Nauli ni Yesu, “Tina, mabose mpuu pepotuumu! Mewali apa peundeamu tepabukeimo.” Tempo etu ngkimo, maosa mpuu anana.
I Yesu mopakaosa tau wori
29 Roo awetu, lambu mbuimo i Yesu lako i se etu, molumako i wiwi rano Galilea. Mpane mempanai lau i mungkuna ai momeso i se etu. 30 Moguguruma sira tau wori lau monontosi Ia, mangkeni sira tau anu mapalu, anu baria masinokai wotora, anu mabilo, anu baria pensani mololita ai tau ntanina mbui anu madua. Raboli sira gompi mbai i lio ni Yesu, mpane Napakaosa sira. 31 Mawuli tau wori mangita ope-ope tau anu napakaosa ni Yesu: tau anu baria pensani mololita, mololitamo sira, anu baria masinokai wotora, malompemo wotora, anu mapalu molumakomo sira, anu mabilo meitamo sira. Etumo mpane tau aretu motoia i Pue Ala anu rapenombai nu toSaraeli.
I Yesu mopakoni iba nsobu tau
32 Roo awetu, i Yesu moronde topeguruNa, Naulika sira, “Maasi raraKu mangita tau anu mawori ei. Tolu eomo sira simbela-mbela ai Aku, bariamo ria pangkonira. Baria turu raraKu motudu sira mesola tongora maoro, malimpu sira luwu i dala.”
33 Rauli nu topeguruNa, “Lako imba ina tasumba pangkoni anu tapopopakoni tau sawei kaworira, lawi pearia ei tepatani karao?”
34 I Yesu mekune si sira, “Sangkia ogu roti anu ria si komi?”
Rasonoira, “Pitu ogu, ai bau anu kokoi basangkia mbaa ngkida.”
35 Mpane, Natudumo sira tau wori aretu momeso i tana. 36 Naalamo roti pitu ogu ai bau anu kokoi basangkia mbaa, mpane Nauli maisi kalompena si Pue Ala. Roo awetu, Nabinse-binsemo roti ai bau etu, Nakiraka sira topeguruNa bona ratibo-tiboka tau wori aretu. 37 Mangkonimo sira ope-ope duduura mabosu. Awetu roomo sira mangkoni, nagulu nu topeguruNa labina, pitu bingka. 38 Kaworira anu mangkoni ni tempo etu, iba nsobu tomoane, baria teimba towawine ai anara. 39 Roo awetu, Natudumo sira tau wori aretu mesola lau i tombira, mpane mensawimo Ia i duanga lau i tana Magadan.